स्थानिक गुन्हे शाखेच्या विशेष पथकाने“सायबर गुन्हेगारी” करणाऱ्या मुसक्या आवळल्या

दिनांक 03/11/2023 रोजी रत्नागिरी जिल्ह्यातील एका शासकिय अधिकार्‍याला त्यांच्या WhatsApp अकाऊंट वर एका अज्ञात इसमा द्वारे, “मी वरिष्ठ आय.पी.एस. पोलीस अधिकारी बोलत आहे” अश्या आशयाचा मेसेज आला व थोड्या वेळानंतर दूसरा मेसेज आला की, “मला ₹ 30,000 पाठवा ते मी तुम्हाला 2 तासात लगेच परत देतो”.
वरील मेसेजची या शासकीय अधिकाऱ्याला शंका आली तसेच याच दिवशी अनेक शासकीय अधिकारी यांना देखील अश्याच प्रकारचे WhatsApp मेसेज आल्याचे कळल्यावरून त्यांनी लागलीच सायबर पोलीस ठाणे येथे सदरबाबत माहिती दिली.
सायबर पोलीस ठाणे येथे सदर अज्ञात इसमा विरुद्ध गुन्हा रजि नंबर 07/2023 भा.द.वी. कलम 419, 420, 170(ब), 511 सह माहिती तंत्रज्ञान अधिनियम 66(ड) अन्वये गुन्हा दाखल करण्यात आला व याचा तपास करण्यात येत होता.
पोलीस अधीक्षक रत्नागिरी श्री. धनंजय कुलकर्णी व अपर पोलीस अधीक्षक श्रीमती. जयश्री गायकवाड यांच्या मार्गदर्शनाखाली पोलीस निरीक्षक श्री. जनार्दन परबकर स्था.गु.शा. रत्नागिरी यांच्या नेतृत्वाखाली या इसमचा स्थानिक गुन्हे शाखेच्या विशेष पथकाद्वारे तांत्रिक विश्लेषण व गुप्त बातमीदार यांच्याद्वारे सातत्याने पाठपुरवा करण्यात येत होता.
सदर आरोपी हा तालुका पसीयना, जिल्हा पटियाला, राज्य पंजाब येथे असल्याचे प्रथम तांत्रिक विश्लेषनाद्वारे निष्पन्न झाले व या नुसार पंजाब राज्यात दिनांक 06/11/2023 रोजी हे पथक रवाना झाले. परंतु गुन्ह्यातील वापरण्यात आलेला मोबाईल हा दोन राज्यांच्या सीमा लगत असल्याचे निष्पन्न झाल्याने पोलीस पथकाला प्रथमतः अडचणींचा सामना करावा लागला व पुढील तपासात हा मोबाईल पटियाला, राज्य पंजाब येथील एका महिलेच्या असल्याचा निष्पन्न होऊन सदर महिलेच्या मोबाईल नंबर वर दिनांक 27/10/2023 ते दिनांक 03/11/2023 या दरम्याने WhatsApp वर कॉलिंग येणे बंद असल्याचे तपास पथकाला निदर्शनास आले व सदर महिलेचा WhatsApp नंबर हा आरोपी इतरत्र बसून वापरत असल्याचे देखील निष्पन्न झाले.
या महिलेला नियमित फेसबूक वर एक “लकी ड्रॉ” व्हिडिओ पाहण्याची सवय होती व त्यामधीलच एका लकी ड्रॉ व्हिडिओ मध्ये आपल्याला आयफोन व आयपॅड गिफ्ट स्वरूपात हवा असल्यास आपला मोबाईल नंबर खालील दिलेल्या कमेन्ट सेक्शन मध्ये नमूद करावा असे त्यामधील जाहिरातीमध्ये नमूद करण्यात आले होते. त्या प्रमाणे व्हिडिओ च्या खाली नमूद कमेन्ट सेक्शन मध्ये या महिलेने आपला मोबाईल नंबर नमूद केला.
याच नंबरचा वापर आरोपीने त्या महिलेला तुम्हाला आयफोन गिफ्ट लागला आहे व तो मिळवण्यासाठी तुमच्या मोबाईलवर आलेला एक ओटीपी शेअर करा असे कॉल करून सांगितले.
या महिलेने ओटीपी शेअर करताच सदर आरोपीने या महिलेचे WhatsApp अकाउंट चे अॅक्सेस घेतले व या WhatsApp अकाउंटचा वापर पुढे जाऊन अनेक लोकांना व पोलीस अधिकार्‍यांना फसवणुकीचे कॉल करण्याकरिता वापर करण्यात आला.
या पथकाद्वारे पुन्हा तांत्रिक विश्लेषण करण्यात आले व असे निष्पन्न झाले की आरोपी हा राजस्थान राज्यात बसून वरिष्ठ आय.पी.एस. पोलीस अधिकारी यांचा फोटो आपल्या WhatsApp च्या डीपीवर ठेवून तोतयागिरी करून फसवणुकीचे कॉल करत होता.
या गुन्ह्या मधील आरोपी हा आपले नाव व पत्ता बदलून वास्तव्य करीत असल्यामुळे या तपासा दरम्यान सदर पथक हे डिग, भरतपूर, राजस्थान येथे प्रचंड प्रमाणातील थंडीमध्ये (7° डिग्री तापमान) आरोपीचा शोध घेणे कामी दिनांक 28/12/2023 ते 08/01/2024 असे 12 दिवस वॉच करीत मुक्कामास होते व अखेर दिनांक 06/01/2024 रोजी 19.20 वाजता या गुन्ह्यातील आरोपी आबिद जाकर, वय 26, रा. सेशन, तालुका पहाडी, जिल्हा डीग, राज्य राजस्थान यास तालुका मथुरा राज्य उत्तर प्रदेश येथून या पथकामार्फत ताब्यात घेऊन अटक करण्यात आली.
आरोपी आबिद जाकर याने हा गुन्हा करण्याकरिता वापरलेला मोबाईल हँडसेट जप्त करण्यात आलेला आहे व या गुन्ह्याचा अधिक तपास सायबर पोलीस ठाणे यांच्या मार्फत सुरू आहे.
ही कारवाई, खालील नमूद पोलीस अधिकारी व अंमलदार यांनी केली आहे.
1) पोलीस निरीक्षक, श्री. जनार्दन परबकर स्था.गु.शा. रत्नागिरी,
2) पोलीस निरीक्षक, श्रीमती. स्मिता सुतार, सायबर पोलीस ठाणे,
3) पोऊनि, श्री. योगेश खोंडे, स्था.गु.शा. रत्नागिरी,
4) पो.हवा/251 श्री. शांताराम झोरे, स्था.गु.शा. रत्नागिरी,
5) पो.हवा/301 श्री. बाळू पालकर, स्था.गु.शा. रत्नागिरी व
6) पो.हवा/444 श्री. रमिज शेख, स्था.गु.शा. रत्नागिरी.
www.konkantoday.com