थरारक: आरोपीने पोलिसांच्या अंगावर गाडी घातली आणि रत्नागिरी पोलिसांनी 130 किलोमीटरपर्यंत पाठलाग केला…

शेवटी कारचा टायर फुटला आणि तो पोलिसांच्या तावडीत सापडला

वाचा विशेष वृत्त…कोकण टुडेवर

रत्नागिरी पोलिसांच्या अंगावर गाडी घालण्याचा प्रयत्न

रत्नागिरी : फसवणुकीच्या गुन्ह्यातील संशयित आरोपीला अटक करण्यासाठी गेलेल्या रत्नागिरी शहर पोलिसांच्या पथकातील पोलिस उपनिरीक्षक आकाश साळुंखे यांच्या अंगावर गाडी घालून त्यांना चिरडण्याचा प्रयत्न करणाऱ्या संतोष जगदाळे (रा. सासवड, पुणे) याला अटक करण्यात आली आहे. हल्ला केल्यानंतर कडाक्याच्या थंडीत भल्या पहाटे तब्बल १३० किलोमीटर पाठलाग करून थरारक पद्धतीने शहर पोलिसांच्या पथकाने संतोष जगदाळेला ताब्यात घेतले. गेले वर्षभर तो पोलिसांना चकवा देत होता. त्याच्याविरोधात सातारा जिल्ह्यातील शिरवळ पोलिस ठाण्यात ३०७ नुसार हत्येचा प्रयत्न करण्यासह शासकीय कामात अडथळा केल्याचा गुन्हा दाखल करण्यात आल्याची माहिती शिरवळ (सातारा) पोलिसांनी दिली.

रत्नागिरी शहरातील प्रियांका साळवी यांनी दि.२६ सप्टेंबर २०२१ रोजी शहर पोलिस ठाण्यात दिलेल्या तक्रारीनुसार, संतोष जगदाळे याने ओळखीचा फायदा घेत गाडीचे कर्ज फेडण्यासाठी सुमारे ७ लाख रुपये रक्कम घेतली होती. काही दिवसात ती रक्कम परत करतो, असे त्याने सांगितले होते. परंतु वर्षभराचा कालावधी उलटल्यानंतरही पैसे परत न दिल्याने प्रियांका साळवी यांनी रत्नागिरी शहर पोलिस ठाण्यात तक्रार दिली. त्यानुसार पोलिसांनी संतोष विश्वनाथ जगदाळे याच्या विरोधात फसवणुकीचा गुन्हा दाखल केला होता. परंतु तेव्हापासून संतोष जगदाळे गायब झाला होता.
संतोष जगदाळे याच्या शोधासाठी शहर पोलिस ठाण्याचे पोलिस उपनिरीक्षक आकाश साळुंखे यांच्या नेतृत्वाखाली कर्मचारी श्री. महाडिक, श्री. कांबळे यांची नियुक्ती करण्यात आली होती. दि. ३० जानेवारी रोजी पोलिसांचे पथक संतोषला पकडण्यासाठी पुणे जिल्ह्यातील सासवड येथे गेले होते. परंतु संतोष मूळ घरी नव्हता. त्याच्या नातेवाईकांकडे चौकशी केल्यानंतरही त्यांनी उडवाउडवीची उत्तरे दिली. संतोष आपल्या पत्नीसह गायब होता. यावेळी सासवड येथील घरी आलेल्या त्याच्या चुलत भावाने पोलिसांची दिशाभूल करून पोलिसांची माहिती संतोषपर्यंत पोहोचवल्याने संतोष परस्पर बाहेरच थांबला होता.
रत्नागिरी शहर पोलिसांच्या खास खबऱ्यांनी दिलेल्या माहितीनुसार संतोष सासरवाडीला जाण्याच्या तयारीत असतानाच तो शिंदेवाडी फाटा ते भोरकडे जाणाऱ्या रस्त्यावरील एका हाॅटेलजवळ थांबला असल्याचे पोलिसांच्या लक्षात आले. त्यानंतर पोलिसांनी आपल्या मोर्चा त्या दिशेला वळवला. पोलिसांनी घटनास्थळी जाऊन त्याचा शोध घेतला. यावेळी या ठिकाणी स्कॉर्पिओ गाडीत संतोष असल्याचे पोलिसांच्या लक्षात आले. त्यानंतर त्याने तेथून पलायन केले. सुमारे एक किलोमीटर पाठलाग केल्यानंतर संतोषने गाडी रस्त्याच्या बाजूला थांबवली. यावेळी पोलिसांनीही आपली गाडी काही अंतरावर उभी केली. त्यानंतर पोलिस उपनिरीक्षक आकाश साळुंखे यांच्यासह पोलिस कर्मचारी संतोषच्या गाडीकडे जात असताना संतोषने पोलिस असल्याची खात्री झाल्याने गाडी मागे घेऊन पोलिसांच्या अंगावर घालून त्यांना चिरडण्याचा प्रयत्न केला. मात्र त्यातून पोलिस कर्मचारी सुदैवाने बचावले. त्यानंतर संतोषने त्यांच्या गाडीला जोरदार धडक दिली. तो तेथून पहाटे पावणे तीनच्या सुमारास पुन्हा गाडीतून पळाला. त्यानंतर पोलिस उपनिरीक्षक आकाश साळुंखे यांनी संतोषचा पाठलाग सुरू केला. तब्बल १३० किलोमीटर पाठलाग केल्यानंतर दि. ३१ जानेवारीच्या पहाटे ५.३० वाजण्याच्या सुमारास संतोषच्या गाडीचे टायर फुटल्याने तो थांबला. त्यानंतर पोलिसांच्या पथकाने त्याला ताब्यात घेतले.
भोर फाटा येथून पोलिसांनी संतोषचा पाटलाग सुरू केला होता. अखेर संतोष सातारा जिल्ह्यातील शिरवळ पोलिस ठाण्याच्या हद्दीत पोलिसांना सापडला. त्यानंतर साळुंखे यांनी संतोष विरोधात शिरवळ पोलिस ठाण्यात तक्रार दाखल केल्यानंतर शिरवळ पोलिसांनी संतोष विरोधात दाखल करून त्याला अटक केले आहे.

सुमारे वर्षभरापूर्वी पोलिस दलात उपनिरीक्षक म्हणून दाखल झालेल्या आकाश साळुंखे यांनी स्वत:चा जीव धोक्यात घालून पोलिसांना वर्षभर चकवा देणाऱ्या संतोष जगदाळे याला अटक केल्याबद्दल त्यांच्यावर कौतुकाचा वर्षाव होत आहे. गुन्ह्याचा तपास शिरवळ पोलिस निरीक्षक नवनाथ मदने यांच्या मार्गदर्शनाखाली पोलिस उपनिरीक्षक सतीश आंदलवार करत आहेत.