Saturday, Sep 23rd

Headlines:

महाराष्ट्र

पंढरपूर शहराच्या विकासासाठी कॅनडा सरकार करणार आर्थिक सहाय्य

पंढरपूर - पंढरपूर शहराच्या विकासासाठी चक्क कॅनडा सरकारने आर्थिक सहाय्य करण्याची घोषणा केली आहे. कॅनडा सरकारने दोन हजार कोटी रुपयांचा विकास आराखडा तयार केला आहे. मंदिर समितीचे अध्यक्ष अतुल भोसले यांनी यासंदर्भात माहिती दिली आहे.
भारत आणि कॅनडा सरकारच्या मैत्रीला दीडशे वर्षे पूर्ण झाल्याच्या निमित्ताने परदेशी शहराच्या धर्तीवर पंढरपूरचा विकास करण्याला तत्वतः मंजुरी देण्यात आली.
कॅनडा सरकारचे प्रतिनिधी आणि मंदिर समिती अध्यक्ष अतुल भोसले, राज्य सरकार प्रशासन अधिकार्‍यांची बैठक पार पडली. बैठकीनंतर पंढरपूर शहराचा विकास करण्याची घोषणा करण्यात आली. ३ ऑक्टोबरला काऊन्सिल जनरल ऑफ कॅनडा पंढरपुरात येणार आहेत.
या योजनेसाठी कॅनडा सरकार आणि मंदिर समिती, नगरपरिषद यांच्यात करार होणार आहे. पंढरपूर शहराचा चेहरामोहरा बदलण्यासाठी जवळपास दोन हजार कोटी रुपयांची गुंतवणूक कॅनडा सरकार करणार आहे. कॅनडा ट्रेड कॉर्पोरेशनच्या वतीने हे काम हाती घेतलं जाणार आहे.

राज्य सरकारी कर्मचार्‍यांच्या महागाई भत्त्यात ४ टक्क्यांची वाढ

मुंबई - राज्यातील सरकारी कर्मचार्‍यांसाठी घटस्थापनेचा मुहूर्त फलदायी ठरला आहे. राज्य सरकारकडून गुरूवारी कर्मचार्‍यांच्या महागाई भत्त्यात ४ टक्क्‌यांची वाढ करण्यात आल्याची घोषणा करण्यात आली. १ जानेवारी २०१७ पासून ही पगारवाढ लागू होणार आहे. यापैकी ऑगस्टपासूनचा वाढीव महागाई भत्ता कर्मचार्‍यांना रोख स्वरूपात दिला जाईल. तर त्यापूर्वीच्या ७ महिन्यांमधील वाढीव महागाई भत्ता कर्मचार्‍यांना कशाप्रकारे द्यायचा, याबाबत स्वतंत्र आदेश काढण्यात येणार आहे. यापूर्वी एप्रिल महिन्यातही राज्य सरकारी कर्मचार्‍यांच्या महागाई भत्त्यात सात टक्क्‌यांची वाढ करण्यात आली होती. त्यावेळी महागाई भत्ता १३२ टक्क्‌यांपर्यंत वाढवण्यात आला होता. आता त्यामध्ये आणखी चार टक्क्‌यांची भर पडली आहे. राज्य सरकारचे तब्बल १६ लाख कर्मचारी आणि ६ लाख निवृत्ती वेतनधारकांना वाढीव महागाई भत्त्याचा फायदा होणार आहे. काही दिवसांपूर्वीच केंद्रीय सरकारी कर्मचारी आणि निवृत्त वेतनाधारकांच्या महागाई भत्त्यामध्ये १ टक्क्‌याने वाढ करण्यात आली होती. ५० लाख केंद्रीय कर्मचार्‍यांना आणि ६१ लाख निवृत्त वेतनधारकांना या निर्णयाचा लाभ होणार आहे.

मुसळधार पावसामुळे राज्यातील धरणांमधील पाणीसाठ्यात मोठी वाढ

मुंबई - राज्यभरात सुरु असलेल्या मुसळधार पावसामुळे धरणांमधील पाणीसाठ्यात मोठी वाढ झाल्याने मुंबई, ठाण्यासह प्रमुख शहरांतील पाण्याची चिंता मिटली आहे. राज्यातील बहुतांश धरणे पूर्ण भरल्याने त्यामधून पाण्याचा विसर्ग सुरू  करण्यात आला असून त्यालगतच्या गावांना सतर्कतेचा इशारा देण्यात आला आहे. कोयना, खडकवासला, उजनी आदी धरणांतून पाण्याचा विसर्ग सुरू  करण्यात आला आहे. विदर्भातील धरणांत मात्र म्हणावा तसा पाणीसाठा झालेला नाही. अमरावतीत ३२ तर नागपूर विभागात ४१ टक्के पाणीसाठा आहे.
मुंबईला पाणीपुरवठा करणार्‌या धरणक्षेत्रात चांगलाच पाऊस झाल्याने पाणीसाठ्यात मोठ्या प्रमाणात वाढ झाली आहे. मोडक सागर धरण पूर्णपणे भरले असून, त्यामध्ये १२८.९३ दशलक्ष घनमीटर इतका पाणीसाठा आहे. तानसा धरणदेखील जवळपास पूर्णपणे भरले आहे. सध्या तानसा धरणात १४४.५९ दशलक्ष घनमीटर इतका पाणीसाठा उपलब्ध आहे. भातसा धरण क्षेत्रात ९८.६९ टक्के म्हणजेच ९२९.७७ दशलक्ष घनमीटर इतका पाणीसाठा आहे. ठाणे आणि कल्याणला पाणीपुरवठा करणारे बारवी धरण पूर्ण भरले आहे.
मुंबई लगतच्या वसई, विरार, मिरारोड आणि भाईंदरचीही पाण्याची चिंता मिटली असून या महापालिकांसाठी महत्वाचे असलेले पालघर जिल्ह्यातीलो धामणी धरणदेखील १०० टक्के भरले आहे. धामणी धरणाचे ५ दरवाजे उघडण्यात आले आहेत. धामणी आणि कवडास धरण मिळून एकूण १८,८०० क्युसेक्स पाण्याचा विसर्ग सूर्या नदीत केला जात आहे. कडसा बंधरा धरण पूर्ण भरले आहे. सिंधुदुर्ग जिल्ह्यातील तिलारी धरण ९९ टक्के भरले आहे.

मुंबई, कोकणासह पश्‍चिम महाराष्ट्रात पावसाचा जोर काम

औरंगाबाद - मुंबईत पावसाने दमदार हजेरी लावली असताना कोकण किनारपट्टीवरही पावसाची दमदार बॅटिंग सुरु आहे. सिंधुदुर्ग जिल्ह्यात सध्या तुफान पाऊस सुरु आहे. याशिवाय पुणे, सातारा, कोल्हापूर आणि सांगलीतही पावसाचा जोर कायम आहे. सिंधुदुर्ग जिल्ह्यात जबरदस्त पाऊस झाला आहे.
सिंधुदुर्ग जिल्ह्यातील कुडाळ तालुक्यामधील माणगाव-आंबेरी पुलावर मंगळवारी सकाळपासूनच पावसाचे पाणी साचले होते. त्यामुळे माणगाव खोर्‍यातील २७ गावांचा संपर्क तुटला होता. जिल्ह्यातील पावसाचा जोर अद्याप कायम आहे. याशिवाय रायगड आणि रत्नागिरीतही पावसाची संततधार सुरु आहे. मुसळधार पावसामुळे अनेक भागांमधील जनजीवन विस्कळीत झाले आहे. जिल्ह्यात कालपासूनच जोरदार पाऊस बरसतो आहे. दापोलीतील पाजच्या समुद्र किनारी काही बोटी बुडाल्याची घटना घडलीदेखील काल घडली आहे.
पुण्यातही काल दिवसभर मुसळधार पाऊस झाला. मात्र आज पावसाचा जोर ओसरला आहे. काल झालेल्या पावसामुळे खडकवासला धरणातून २३ हजार क्यूसेक वेगाने पाण्याचा विसर्ग सुरु आहे. कोल्हापूर, सातारा, सांगलीतही जोरदार पाऊस झाला आहे. कोल्हापुरात तुफान पाऊस झाल्याने राधानगरी धरणाचे ७ दरवाजे उघडण्यात आले. त्यामधून १२ हजार क्यूसेक वेगाने पाण्याचा विसर्ग सुरु आहे. सातार्‍यावरही वरुणराजाची कृपादृष्टी झाली आहे. त्यामुळे पाचगणी, महाबळेश्वर, कोयना परिसरात दमदार पाऊस झाला आहे. मुसळधार पावसामुळे कोयना धरणातील पाणी साठ्यात वाढ झाली आहे. धरणातील पाणीसाठा दीड टीएमसीने वाढला आहे.

राज्य मंत्रिमंडळाचा लवकरच विस्तार करणार : मुख्यमंत्री

औरंगाबाद - राज्य मंत्रिमंडळाचा विस्तार होईल. याबाबत मराठवाडयात मंत्रिमंडळ बैठक घेण्यात येणार असल्याचे मुख्यमंत्री देवेंद फडणवीस यांनी रविवारी सांगितले. मात्र, हा विस्तार केव्हा होणार याबाबत मुख्यमंत्र्यांनी मौन बाळगले.
पंतप्रधान नरेंद्र मोदी यांनी केंद्रीय कॅबिनेट मंत्रिमंडळ विस्तार काही दिवसांपूर्वी केला. यामध्ये काही मंत्र्यांना डच्चू देण्यात आला तर काही मंत्र्यांच्या खात्यात बदल करण्यात आले. तसेच नव्या चेहऱयांचा समावेश करण्यात आला. त्यानंतर राज्य मंत्रिमंडळाचा विस्तार कधी होणार याबाबत चर्चा सुरु होत्या. यावर मुख्यमंत्र्यांनी मंत्रिमंडळ लवकरच होणार असल्याचे संकेत दिले. या मंत्रिमंडळ विस्तारात नव्या चेहऱयांना संधी मिळणार का ? यावर स्मितहास्य करत विस्तार होणार हे नक्की असल्याचे ते म्हणाले.

स्वस्त धान्य दुकानांतून आता गरीबांना साखर बंद

मुंबई - केंद्र सरकारने अनुदान बंद केल्याने राज्यातील दारिद्रयरेषेखालील (बीपीएल) सुमारे ४५ लाख कुटुंबांना रास्तभाव दुकानांतून मिळणारी साखर बंद करण्याचा राज्य शासनाने निर्णय घेतला आहे. आता फक्त अंत्योदय योजनेतील गरिबातील गरीब कुटुंबांना साखर मिळणार आहे. मात्र त्याचाही दर पाच रुपयांनी वाढविण्यात आला आहे. साखरेचा कोटा कमी केल्यामुळे या योजेनीतील कुटुंबांना महिन्याला फक्त एकच किलो साखर मिळणार आहे.
केंद्र सरकारकडून बीपीएल व अंत्योदय कुटुंबांना स्वस्त दरात साखर वितरित करण्यासाठी अनुदान मिळत होते, परंतु केंद्राने आता फक्त अंत्योदय योजनेतील कुटुंबांनाच अनुदान दिले जाईल, असे राज्य सरकारला कळविले. केंद्र सरकारने अनुदान बंद केल्याने त्याचा ४५ लाख बीपीएल कुटुंबांना फटका बसला आहे. त्यांना रास्तभाव दुकानांतून आता साखर मिळणार नाही.
अंत्योदय योजनेतील कुटुंबांची साखरही महागली आहे. त्यांना आता प्रति किलो १५ रुपयांऐवजी २० रुपये मोजावे लागणार आहेत. खुल्या बाजारात सध्या साखरेचे भाव ४० ते ४५ रुपये प्रतिकिलो आहेत. त्यामुळे गरीब कुटुंबांना २० रुपये दराने साखर खरेदी करणे परवडणारे नाही. दुसरे असे की, पूर्वी दरमहा माणशी ५०० ग्रॅम साखर मिळत होती. त्यातही कपात करण्यात आली आहे. आता एका कुटुंबाला एका महिन्याला फक्त एक किलो साखर दिली जाणार आहे. म्हणजे पूर्वी एका महिन्याला एका कुटुंबाला किमान दोन ते अडीच किलो साखर उपलब्ध व्हायची, ती आता फक्त एकच किलो मिळणार आहे. दसरा, दिवाळी अशा मोठया सणाच्या तोंडावरच गरिबांची साखर बंद करण्याचा व दर वाढविण्याचा राज्य सरकारने निर्णय घेतला आहे.
साखरेवरील अनुदान कमी करण्यात येणार असल्याचे केंद्र सरकारने १२ मे २०१७ रोजी राज्य सरकारला पत्र पाठवून कळविले होते. त्यानुसार १४ जून २०१७ रोजी राज्य सरकारने बीपीएल व अंत्योदय कुटुंबांना रास्तभाव दुकानांमधून वितरित करण्यात येणार्‍या साखरेबाबत निर्णय घेण्यासाठी नेमण्यात आलेल्या मंत्रिमंडळ समितीने घेतलेल्या निर्णयानुसार यापुढे रास्तभाव दुकानांमधून फक्त अंत्योदय योजनेच्या लाभार्थ्यांनाच साखर देण्याचा शुक्रवारी आदेश काढण्यात आला आहे.

आयकर विभागाचे छापे; कांद्याचे दर ३५ टक्क्यांनी घसरले

नाशिक - नाशिकमधील कांदा व्यापार्‍यांची घरे आणि गोदामांवर गुरुवारी सकाळी आयकर विभागाने छापे मारल्यानंतर घाऊक बाजारात कांद्याचे दर तब्बल ३५ टक्क्‌यांनी घसरले. आयकर विभागाने नाशिक जिल्ह्यातील सात व्यापार्‍यांची घरे, कार्यालये आणि गोदामांवर छापे मारले होते. या छापेमारीमुळे घाऊक बाजारातील कांद्याचे दर घसरले.
लासलगाव कृषी उत्पन्न बाजार समितीतील घाऊक बाजारात कांद्याचे दर ३५ टक्क्‌यांनी घसरले. बुधवारी कांद्याचा भाव प्रतिक्विंटल १४०० रुपये होता. तो दुसर्‍या दिवशी सरासरी ९०० रुपयांपर्यंत पोहोचला. कांद्याला प्रतिक्विंटलला किमान ५०० रुपये तर कमाल १३३१ रुपये भाव मिळाला. नाशिकमधील सात कांदा व्यापार्‍यांच्या घरांवर आयकर विभागाने छापे मारले. त्यांची घरे, कार्यालये आणि गोदामांची झाडाझडती घेतली. आयकर विभागाच्या या कारवाईमुळे कांदा व्यापार बाजारात एकच खळबळ उडाली. त्याचा परिणाम कांद्याच्या दरावर झाला. घाऊक बाजारात कांद्याचे दर घसरले, अशी माहिती लासलगाव कृषी उत्पन्न बाजार समितीतील सूत्रांनी दिली. घाऊक बाजारातील कांद्याचे दर घसरल्याने शेतकर्‍यांनी कमी किंमतीत उत्पादित माल विकण्यास नकार दिला. त्यामुळे लिलाव बंद पडला.
दरम्यान, कांद्याचा साठा करून पैसे कमावल्याच्या संशयावरून आयकर विभागाने नाशिक जिल्ह्यातील कांदा व्यापार्‍यांवर छापे मारल्याचे सूत्रांकडून सांगण्यात आले. पिंपळगाव, लासलगाव, सटाणा, कळवण, उमराणा, येवला, चांदवड येथील कांदा व्यापार्‍यांवर आयकर विभागाने ही कारवाई केली. त्यांची कार्यालये आणि गोदामांची झाडाझडती घेण्यात आली. महिनाभरातील कांद्याच्या खरेदी-विक्री व्यवहारांची चौकशी करण्यात येत आहे. व्यापार्‍यांच्या कार्यालयांतील महत्त्वाची कागदपत्रे अधिकार्‍यांनी जप्त केली आहेत. तसेच कांदा साठवणुकीची माहितीही घेतली जात आहे.

कोल्हापुरात पावसाचा धुमाकूळ, २० दुचाकी, ८ चारचाकी गाड्या वाहून गेल्या

कोल्हापूर - कोल्हापूर शहरात काल रात्री मुसळधार पावसाने हाहाकार माजवला. रात्री साडेबारा वाजता पडलेल्या मुसळधार पावसामुळं उपनगरातील अनेक वाहने जयंती नाल्यात वाहून गेली आहेत. तर पाऊस आणि नाल्याचं पाणी घरात घुसल्यामुळं ४०हून अधिक कुटुबांचं स्थलांतर करण्यात आलं आहे.
कोल्हापूर जिल्ह्यात काल रात्री ढगफुटी सदृश्य पाऊस पडल्याने सर्वांचीच दाणादाण उडाली. पावसाचा जोर रात्री १ वाजल्यानंतर वाढल्याने, शहरातून जाणार्‍या जयंती नाल्याचं पाणी रस्त्यावर येण्यास सुरवात झाली. रस्त्यावर ८ फूट पाणी आल्याने ८ चारचाकी, २० हून अधिक दुचाकी, तर ३ रिक्षा वाहून गेल्या आहेत.
रामानंद नगर, जरगनगर, रेणूका मंदिर परिसर, शास्त्रीनगर या परिसरातील नाल्यामधील पाणी अनेक घरांमध्ये घुसल्याने, या परिसरातील नागरिकांना स्थानिक नागरिकांनी सुखरुप बाहेर काढलं. अनेकांचे प्रापंचिक साहित्य वाहून गेलं. या परिसरात असणार्‍या अनेक अपार्टमेन्टच्या बेसमेंटमध्ये पाणी घुसल्याने असंख्या गाड्या पाण्यात बुडाल्या.
आज सकाळपासून महापालिक आणि अग्नीशमन दलाच्या कर्मचा-यांनी घटनास्थळी जाऊन वाहून गेलेल्या गाड्याचा शोध घेण्यास सुरवात केली आहे.

गुढीपाडव्यानंतर प्लॅस्टिक कॅरीबॅगवर बंदी : रामदास कदम

मुंबई - गुढीपाडव्यानंतर संपूर्ण राज्यात प्लॅस्टिक कॅरीबॅगवर बंद घालण्यात येणार आहे. पर्यावरण मंत्री रामदास कदम यांनी याबाबत माहिती दिली. प्लॅस्टिक कॅरीबॅग बंदी संदर्भात मंत्रालयातएका बैठकीचं आयोजन करण्यात आलं होतं. त्यावेळी ते बोलत होते. या बैठकीसाठी प्रधान सचिव सतीश गवई, महाराष्ट्र प्रदुषण महामंडळाचे सदस्य सचिव पी. एन. अनबलगन हे वरिष्ठ अधिकारी उपस्थित होते.
प्लॅस्टिक कॅरीबॅगला पर्याय म्हणून कोणत्या प्रकारच्या पर्यावरणपूरक पिशव्या बाजारात वापरता येतील, याबाबत अनेक संस्थाकडून प्रस्ताव मागवण्यात आले आहेत. शिवाय महिला बचत गटांना अनुदान देऊन त्यांच्याकडून कापडी पिशव्या घेण्याचाही सरकारचा प्रस्ताव आहे.
महिला बचत गटांना यासाठी सबसिडी देण्यात येणार आहे. टप्प्याटप्याने राज्यातील महानगरपालिकांच्या वरिष्ठ अधिकार्‍यांची बैठक घेऊन त्यांनाही प्लॅस्टिकवर बंदी घालण्याबाबत सांगण्यात येणार आहे. तर पालकमंत्र्यांना नाविन्यपूर्ण योजनेसाठी दिलेल्या निधीतून काही निधी पर्यावरणपूरक गोष्टीसाठी खर्च करण्याबाबत चर्चा करण्यात येईल, असं रामदास कदम यांनी सांगितलं.

Page 1 of 148

  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »