Tuesday, Jan 23rd

Headlines:

सिंधुदुर्ग

डंपर उलटून पाचजण जखमी

E-mail Print PDF
मालवण- आचरा मार्गावर भरधाव वेगाने जाणारा डंपर ओझर हायस्कूलजवळील रस्त्यावर उलटून झालेल्या अपघातात डंपरमधील पाच कामगार जखमी झाल्याची घटना गुरुवारी सकाळी आठ वाजण्याच्या सुमारास घडली. जखमींवर ग्रामीण रुग्णालयात प्राथमिक उपचार केल्यावर कुडाळ येथे हलविण्यात आले.
उत्तर प्रदेशमधील १४ वाळू कामगारांना घेऊन हा डंपर देवली येथून हडी येथे जात होता. वेगात असलेला हा डंपर ओझर येथे आला असता चालकाचा ताबा सुटून उलटला. यात डंपरच्या हौद्यातील आणि केबीनमधील कामगार बाहेर फेकले गेले. यामध्ये सुरेश यादव, लव यादव, परमजीत राय, रविशंकर, राम प्रसाद, शाम विहारी, रमेश पटेल, रमेश यादव, राजमिंदर राम, सुग्रीम राम यांचा समावेश होता. जखमींना स्थानिक ग्रामस्थांनी तात्काळ ग्रामीण रुग्णालयात हलविले.
अपघातानंतर रुग्णवाहिकेशी संपर्क होऊ न शकल्याने डंपर मालकाने कोळंब येथील रिक्षा व्यावसायिक गोपाळ शेलटकर यांच्याकडे सहकार्य मागितले. शेलटकर यांनी तात्काळ आपली रिक्षा घटनास्थळी नेऊन जखमींना रिक्षामधून ग्रामीण रुग्णालयात आणले. अन्य जखमींना मार्गावरून जाणाऱया रिक्षा टेम्पोतून उपचारासाठी हलविण्यात आले. अपघातानंतर काही तासांनंतर रुग्णवाहिका घटनास्थळी दाखल झाली.
सुग्रीम राम याचा उजवा कान फाटला आहे, तर अन्य चौघांनाही दुखापत झाली. या मार्गावरून आचरा पोलीस स्टेशनला डयुटीवर जाणाऱया कृष्णा परुळेकर आणि सुनील चव्हाण यांनी जखमींना उपचारासाठी हलविण्यासाठी सहकार्य केले. हा डंपर भरधाव वेगाने जात होता. या मार्गावरून आडवली येथे जात असलेल्या महिला पशुवैद्यकीय अधिकारी मिताली कवटकर सुदैवाने बचावल्या.

‘किल्ले सिंधुदुर्ग’ स्वच्छता मोहिमेचा फज्जा

E-mail Print PDF
मालवण - मालवण तालुका शिवसेनेच्यावतीने मोठा गाजावाजा करून जाहीर केलेली किल्ले सिंधुदुर्ग स्वच्छता मोहीम हाताच्या बोटावर मोजणार्‍या शिवसैनिकांच्या उपस्थितीत करण्यात आली. किल्ले सिंधुदुर्गच्या परिसरात वाढलेल्या झाडीझुडपांची कल्पना शिवसैनिकांना न आल्याने तसेच शिवसैनिकांनी पाठ फिरविल्याने वायरी-भूतनाथ परिसरातील कार्यकर्त्यांव्यतिरिक्त इतर तालुक्यांतून पदाधिकारी या मोहिमेत सहभागी न झाल्याने स्वच्छता मोहिमेचा फज्जा उडालेला दिसून आला.
दरम्यान, किल्ले सिंधुदुर्गातील किल्ले सिंधुदुर्गला भेट देणार्‍या पर्यटकांकडून वायरी-भुतनाथ ग्रामपंचायत कर आकारणी करते. मात्र त्या बदल्यात आवश्यक सुविधा उपलब्ध केल्या जात नाहीत, किल्ल्यात स्वच्छता केली जात नसल्याबाबत आमदार वैभव नाईक यांनी तीव्र नाराजी व्यक्त केली. ग्रामपंचायतीने मिळणाऱया कराच्या बदल्यात ५० टक्के रक्कम किल्ल्‌यात स्वच्छता तसेच अन्य सुविधा उपलब्ध करून देण्यासाठी खर्च कराव्यात, अशा सूचना आमदार नाईक यांनी नवनिर्वाचित सरपंच भाई ढोके यांना दिल्या.
ऐतिहासिक किल्ले सिंधुदुर्गवर तालुका शिवसेनेच्यावतीने स्वच्छता मोहीम राबविण्यात आली. या मोहिमेत आमदार वैभव नाईक यांच्यासह नगराध्यक्ष, तालुक्मयातील शिवसेना पदाधिकारी व वायरी ग्रामपंचायत सहभागी झाली होती. शिवसेना प्रमुख बाळासाहेब ठाकरे याच्या स्मृतिदिनानिमित्त ही मोहीम राबविण्यात आली. काही महिन्यांपूर्वी किल्ल्‌यात स्थानिक रहिवासी तसेच शिवप्रेमींच्या माध्यमातून स्वच्छता मोहीम राबविण्यात आली होती. मात्र यावषी पाऊस उशिरापर्यंत राहिल्याने किल्ल्‌यात मोठया प्रमाणात झाडी वाढली होती. त्यामुळे शिवसेनेच्यावतीने गुरुवारी राबविण्यात आलेल्या मोहिमेत तटबंदीवरील झाडी, शिवराजेश्वर मंदिराकडे जाणाऱया मार्गाच्या दुतर्फा असलेली झाडी तसेच अन्य भागातील झाडी पदाधिकारी, कार्यकर्ते तसेच अन्य कामगारांनी हटवित त्याची विल्हेवाट लावली. सकाळच्या सत्रात तालुका प्रमुख बबन शिंदे, उपतालुकाप्रमुख हरी खोबरेकर, नगराध्यक्ष महेश कांदळगावकर, नगरसेवक पंकज सादये, शहरप्रमुख बाबी जोगी, शहरप्रमुख गणेश कुडाळकर, उपशहरप्रमुख यशवंत गावकर, स्वप्नील आचरेकर, तपस्वी मयेकर, महिला नगरसेविका आकांक्षा शिरपुटे, सुनिता जाधव, तृप्ती मयेकर, शिवसेनेचे अन्य पदाधिकारी तसेच वायरी भुतनाथ सरपंच ललित वराडकर, भाई ढोके यांच्यासह अन्य पदाधिकारी, कार्यकर्ते यांनी या स्वच्छता मोहिमेत सहभाग घेतला.
किल्ल्याचा परिसर पाहता एक दिवसाची स्वच्छता मोहीम राबवून परिसर स्वच्छ होणे शक्मय नसल्याने येत्या आठ दिवसांत पुन्हा स्वच्छता मोहीम राबविली जाईल, असे आमदारांनी स्पष्ट केले. यावेळी शिवसेनेकडून आयोजित करण्यात आलेल्या स्वच्छता मोहिमेचा फज्जा उडाल्याने आमदारांच्या चेहऱयावर साफ नाराजी दिसून येत होती.

अश्‍लील चित्रफीत व्हायरल; महिलेची पोलिसांत धाव

E-mail Print PDF
सावंतवाडी - तालुक्यातील शहराच्या बाजूला असलेल्या गावातील महिलेची अश्‍लील चित्रफीत व्हायरल झाल्याने खळबळ उडाली आहे. पीडित महिलेने पोलिसांत धाव घेतली असून आपल्याला धमकी देऊन हा प्रकार करवून घेतल्याचे तिचे म्हणणे आहे. तिने या प्रकाराची चौकशी करण्याची मागणी केली. मात्र, पोलिस ठाण्यातून दिलेल्या माहितीनुसार महिला सहाय्यता केंद्राकडून चौकशी सुरू असून येत्या दोन दिवसांत गुन्हा दाखल होऊ शकतो, असे अधिकार्‍यांचे म्हणणे आहे.
याबाबत अधिक माहिती अशी, तालुक्यातील एका गावात संबंधित महिला राहते. तिचा पती जिल्ह्यातील एका शासकीय कार्यालयात कार्यरत आहे. त्या महिलेशी संबंधित तरुणाने ओळख करून मैत्री वाढविली आणि त्याचाच फायदा घेऊन तिच्याकडून हा प्रकार करून घेतल्याची चर्चा आहे. संबंधित युवक हा एका एजन्सीवर चालक म्हणून काम करीत आहे.
त्याने आपल्या ओळखीचा फायदा घेऊन व धमकावून क्लिप काढल्याचे व नंतर त्यात फोटोशॉपमध्ये अश्‍लील बदल केल्याचे त्या महिलेचे म्हणणे आहे. आपल्याला बदनाम करण्याच्या उद्देशाने त्याने हा प्रकार केला असेल, असे संबंधित महिलेचे म्हणणे आहे.
सध्या गावातील काही तरुणांच्या मोबाईलमध्ये ही क्लीप फिरत आहे. त्यामुळे या प्रकाराबाबत चर्चा सुरू झाली आहे. याबाबतची माहिती मिळाल्यानंतर संबंधित महिला आज आपल्या पतीसह येथील पोलिस ठाण्यात तक्रार देण्यास आली होती. यावेळी त्या दोघांनी पोलिसांशी चर्चा केली.
याबाबत येथील पोलिस ठाण्याचे निरीक्षक सुनील धनावडे यांच्याशी संपर्क साधला असता एक जोडपे अशी तक्रार घेऊन आले होते; मात्र अशा घटनांचा तपास किंवा चौकशी विशेष महिला अधिकारी नेमून केला जातो. त्यामुळे त्यांना महिला सहाय्यता केंद्राकडे पाठविण्यात आले आहे. त्यानंतर पुढील भूमिका घेण्यात येणार आहे. येत्या दोन दिवसात संबंधित तक्रार दाखल होण्याची शक्यता आहे असे त्यांनी सांगितले.

डोंगर खचल्याने घरावर कोसळली भिंत

E-mail Print PDF
मालवण - मालवण तालुक्यातील देवली- वाघवणे मधलीवाडी  येथील डोंगर अचानक खचला. यामुळे सुभद्रा  राजाराम चव्हाण आणि प्रमोद अनंत चव्हाण यांच्या संरक्षक भिंत कोसळून  घराच्या पाठीमागील पडवी जमीनदोस्त झाली. यामध्ये सुमारे लाखोंचे नुकसान झाले. सोमवारी दुपारी ३ वा. च्या सुमारास ही घटना घडली. सुदैवाने या घटनेत कुठलीही अप्रिय घटना घडली नाही.  या घटनेबाबत मालवण तहसीलच्या आपत्ती व्यवस्थापनाकडे मंगळवारपर्यंत नोंद नव्हती. एवढ्या मोठ्या घटनेबाबत मालवण तहसीलदार व आपत्ती व्यवस्थापन कक्ष अनभिज्ञ असल्याबाबत  ग्रामस्थांनी आश्‍चर्य व्यक्त करत नाराजी व्यक्त केली.
देवली-वाघवणे गावातील अनेक घरे ही डोंगर पायथ्याशी वसलेली आहेत.  मधलीवाडी येथील डोंगर सोमवारी दुपारी ३ वा. च्या सुमारास अचानक  खचला. यामुळे चव्हाण यांच्या घरामागची संरक्षक भिंत थेट घरावर कोसळली. यामुळे घराची मागील पडवी जमीनदोस्त होत ढिगार्‍याखाली गाडली गेली. एकत्र कुटुंब पद्धती असलेल्या या घरात  आठ  माणसे राहतात.  सुदैवाने त्या वेळी घरातील व्यक्ती  बाहेर असल्याने अनर्थ टळला.
या दुर्घटनेत संरक्षक भिंत घरावर कोसळल्याने चिर्‌यांनी बांधलेली पडवी आणि पडवीत असणारे दोन संडास, दोन बाथरुम, छप्परावरील कौले, वासे, रिपी जमीनदोस्त होऊन लाखो रुपयांचे  नुकसान झाले. मात्र महसूल कर्मचार्‌यांनी केलेल्या पंचनाम्यात केवळ ३५ हजार रुपये नुकसान झाल्याची नोंद करण्यात आली आहे. या तटपुंज्या नुकसानीचा लाभ मिळेल याची शाश्‍वती नाही.

डंपरच्या धडकेत तलाठ्याचा मृत्यू

E-mail Print PDF
दोडामार्ग - कुडासे गावचे रहिवासी, माजी सैनिक व मसुरे येथे तलाठी म्हणून कार्यरत असलेले बळीराम अमृत देसाई (४७) यांचा डेगवे येथे डंपरच्या धडकेत जागीच मृत्यू झाला. सोमवारी सकाळी १०.३० वा.च्या दरम्यान डेगवे माऊली मंदिरनजीक सोसायटीसमोर ही दुर्घटना घडली. कुडासे येथून मसुरे येथे कामावर जात असतानाच हा अपघात घडला. या प्रकरणी डंपर चालक अदप्पा बसप्पा पुजारी (२४, रा. विजापूर) याच्यावर बांदा पोलिसांनी गुन्हा दाखल करून अटक केली आहे.
कुडासे भरपालवाडीतील मूळ रहिवासी असलेले देसाई दोडामार्ग येथील गोवेकर कॉलनीत राहत होते. देसाई हे सैन्यातून निवृत्त झाल्यानंतर तलाठी म्हणून शासन सेवेत दाखल झाले होते. २०१० पासून ते तलाठी म्हणून सेवा बजावत होते. सध्या ते मसुरे (ता. मालवण) येथे तलाठी म्हणून कार्यरत होते. शनिवार व रविवार सुट्टी असल्याने ते घरी आले होते. सोमवारी मोटारसायकलने कामावर जात असताना डेगवे येथे त्यांना मोबाईल कॉल आला. दुचाकी रस्त्याच्या बाजूला थांबवून दुचाकीवर बसूनच ते मोबाईलवर बोलत असताना दोडामार्गहून बांद्याच्या दिशेने जाणाऱया डंपरने (जीए  ०५, टी  २४२७) त्यांच्या दुचाकीला जोरदार धडक दिली. या धडकेत देसाई यांच्या डोक्याला व कंबरेच्या खाली जबर मार बसून त्यांचा जागीच मृत्यू झाला.
डेगवे येथील स्थानिक ग्रामस्थांनी घटनास्थळी धाव घेत देसाई यांना पाणी पाजण्याचा प्रयत्न केला. परंतु त्यांच्याकडून कोणताच प्रतिसाद मिळाला नाही. त्यानंतर ग्रामस्थांनी बांदा पोलीस स्थानकात माहिती दिली. अपघातग्रस्त डंपर गोव्यातील असून चालक अदप्पा याला बांदा पोलिसांनी तात्काळ अटक केली. बळीराम देसाई यांच्या पश्चात पत्नी, मुलगा व विवाहित मुलगी असा परिवार आहे. कुडासे भरपालवाडी येथील स्मशानभूमीत शोकाकूल वातावरणात सोमवारी सायंकाळी बळीराम देसाई यांच्या पार्थिवावर अंत्यसंस्कार करण्यात आले. यावेळी विविध क्षेत्रातील मान्यवर उपस्थित होते.

सिंधुदुर्गात लेप्टोचे ३३ रुग्ण आढळले

E-mail Print PDF
कणकवली - जिल्ह्यात लेप्टोस्पायरोसीस तापसरीने थैमान घातले आहे. आतापर्यंत २५ गावांत लेप्टो पोचला असून, ३३ रुग्ण लेप्टो पॉझिटिव्ह आढळले आहेत. त्याला नियंत्रणात आणण्यासाठी जिल्हा आरोग्य विभाग सक्षमपणे कार्यरत आहे. जिल्ह्यासाठी फिजिशियनचे पथक लवकरच दाखल होणार आहे, अशी माहिती जिल्हा आरोग्य अधिकारी डॉ. योगेश साळे यांनी आज येथे दिली.
जिल्ह्यात लेप्टोस्पायरोसीससदृश तापसरीचे प्रमाण वाढले आहे. त्यातच कणकवली, सावंतवाडी व कुडाळ येथे लेप्टोचे रुग्ण आढळल्याने भीतीचे सावट निर्माण झाले आहे. आतापर्यंत २५ गावांत लेप्टो पोचला असून, ३३ रुग्ण लेप्टो पॉझिटिव्ह आढळले आहेत. त्याला नियंत्रणात आणण्यासाठी जिल्हा आरोग्य यंत्रणा ऍलर्ट झाली आहे. याबाबत जिल्हा आरोग्य अधिकारी डॉ. साळे यांनी माहिती दिली.
ते म्हणाले, जिल्ह्यात जवळपास २५ गावांत लेप्टोस्पायरोसीससदृश तापसरी सुरू आहे. काही ठिकाणी यात वाढही होत आहे. जे रुग्ण शासकीय रुग्णालयात येत आहेत, त्यांच्यावर स्पॉट टेस्ट केल्या जात आहेत. लेप्टो पॉझिटिव्ह आढळल्यास पेनिसीलीन देत आहोत. जिल्हा रुग्णालयात विशेष कक्ष सुरू करण्यात आला आहे. या साथीबाबत जनजागृती करून शेतकर्‍यांनी कशा पद्धतीने काळजी घ्यावी, याची माहिती दिली जात आहे. जिल्ह्यातील खासगी दवाखान्यात रुग्ण उपचारासाठी जात आहेत. तेथेही योग्य गाईडलाईनप्रमाणे उपचार व्हावेत म्हणून खासगी डॉक्टरांची कार्यशाळा घेत आहोत. जिल्ह्यासाठी तत्काळ फिजिशियनचे पथक मिळावे, अशी मागणी आहे.’’

आंबोलीतील दरीत सापडला आणखी एक मृतदेह

E-mail Print PDF
सावंतवाडी - कावळेशेत पॉईंट (गेळे) येथील दरीत सुमारे १२०० फूट खोलवर तरुणाचा मृतदेह शनिवारी सापडून आला. सायंकाळी उशिरा हा मृतदेह बाहेर काढला. त्याचे डोके दगडाने ठेचल्याचे दिसून आले. यावरून त्याचा प्रथम खून करून मृतदेह दरीत फेकल्याचे स्पष्ट झाले. सांगली येथील संशयित आरोपीचा मृतदेह महादेवगडच्या दरीत सापडल्यानंतर पुन्हा चार दिवसांतच हा मृतदेह सापडल्याने आंबोलीत खळबळ उडाली आहे. पर्यटनासाठी प्रसिद्ध असलेले हे गाव आता अशा मृतदेहांसाठी कुप्रसिद्ध होत आहे.  
शुक्रवारी संध्याकाळी कावळेशेत पॉईंटच्या रेलिंग फूटपाथवर रक्ताचे डाग काही पर्यटकांना दिसले. चौकस पर्यटकांनी बारकाईने पाहणी केली असता हे डाग काही अंतरापासून सुरू झालेले आढळले. तसेच दरीच्या दिशेने काही तरी वस्तू ओढत नेल्याच्या खुणा दिसून आल्या. पर्यटकांनी ही माहिती स्थानिकांना दिली. शनिवारी सकाळी एका पर्यटकाच्या एचडी कॅमेर्याने या दरीचे फोटो घेतले असता, दरीत मानवी मृतदेह असल्याचे दिसून आले. स्थानिक पोलिसांना ही माहिती दिल्यानंतर पोलिसांनी संध्याकाळी ६ वा. आंबोली पत्कालीन पथक व बाबल अल्मेडा टीमच्या मदतीने मृतदेह बाहेर काढला. आंबोली आपत्कालीन पथकाचे संतोष पालेकर, राकेश अमृस्कर, शंकर गावडे, अजित नार्वेकर आदी, बाबल अल्मेडा टीम व डीवायएसपी दयानंद गवस, सावंतवाडी पोलिस निरीक्षक सुनील धनावदे, एपीआय अरुण जाधव, आंबोली पोलिस हे. कॉ. विश्‍वास सावंत, कॉ. प्रकाश कदम, कॉ.गजानन देसाई व गेळे पोलीस-पाटील घटनास्थळी उपस्थित होते.
हा मृतदेह पुरुषाचा असून त्याचे वय अंदाजे ३५ ते ४० वर्षे आहे. मृतदेहाचे डोके दगडाने ठेचून चेंदामेंदा करण्यात आला आहे. यामुळे त्याचा चेहराही ओळखू येत नव्हता. रक्त बाहेर पडू नये यासाठी ठेचलेले डोके प्लास्टिक पिशवीत बांधले होते. तर मृतदेहाच्या अंगावर केवळ अंडरवेअर होती. त्याचा मृत्यू ४ ते ५ दिवसांपूर्वी झाल्याचा अंदाज आहे. पोलिसांनी घटनास्थळीच पंचनामा करून  मृतदेह  विच्छेदनासाठी  आंबोली आरोग्य केंद्रात पाठवून दिला. मृतदेहाची ओळख पटविणारा कोणताही पुरावा सापडला नसल्याचे पोेलिसांनी सांगितले.

कुडाळ पं.स.सदस्या संपदा पेडणेकर यांचा तापाने मृत्यू

E-mail Print PDF
कुडाळ - कुडाळ पंचायत समितीच्या शिवसेना सदस्या संपदा संदीप  पेडणेकर (३७, पिंगुळी-चिंदरकरवाडी) यांचे गोवा-बांबोळी रुग्णालयात उपचारादरम्यान शनिवारी दुपारी १२.१५ वा.च्या सुमारास निधन झाले. त्यांचा मृत्यू तापसरीने झाला असला तरी याबाबत निश्‍चित निदान झाले नाही. रविवारी सकाळी १० वा. पिंगुळी येथील स्मशानभूमीत त्यांच्या मृतदेहावर अंत्यसंस्कार करण्यात येणार आहेत.  
संपदा पेडणेकर यांना गेले चार दिवस ताप येत होता.  अंत्यविधीला त्यांची आई मुंबईहून येत असल्याने   शव सिंधुदुर्गनगरी येथे शवागृहात  ठेवण्यात आले आहे. पेडणेकर यांना समाजकारणाची आवड होती. यापूर्वी त्या  पिंगुळी ग्रा. पं. सदस्य म्हणून कार्यरत होत्या. तीन महिन्यांपूर्वी झालेल्या  जि.प., पं.स. निवडणुकीत त्या  याच मतदरासंघातून शिवसेनेच्या  उमेदवार म्हणून विजयी झाल्या. त्यांच्या निधनाची माहिती समजताच खा. विनायक राऊत यांनी  बांबोळी रुग्णालयात धाव घेतली.

३५४ हेक्टर जागा रानटी हत्तींच्या उद्यानासाठी निश्‍चित

E-mail Print PDF
सावंतवाडी - सिंधुदुर्ग जिल्ह्यासह कोल्हापूर जिल्ह्यातील आजरा, चंदगड, गडहिंग्लज या भागात धुमाकूळ घालणार्‌या रानटी हत्तींच्या संरक्षक उद्यानासाठी कोल्हापूर आणि सिंधुदुर्ग जिल्ह्याच्या सीमेवर दोडामार्ग व चंदगड येथील एकूण ३५४ हेक्टर जागा निश्‍चित करण्यात आली आहे. वन विभागाने हा प्रस्ताव शासनाकडे मंजुरीसाठी पाठविला आहे.
कोल्हापूर जिल्ह्यात हत्ती पकडण्यासाठी केंद्राच्या एलिफंड बोर्डने परवानगी दिल्यामुळे दोन्ही जिल्ह्यातील हत्तींना ट्रँग्युलाईज करून या संरक्षित उद्यानामध्ये सोडण्यात येणार आहे. या उद्यानामध्ये असलेल्या हत्तींचा वापर पर्यटनासाठी करण्याचाही विचार वन विभागाने प्रस्तावामध्ये नमूद केला आहे. चंदगड-घाटकरवाडी, तसेच दोडामार्ग-तिलारी या ठिकाणी कोल्हापूर जिल्ह्यातील १०८, तर २४६ हेक्टर सिंधुदुर्गातील जमीन या हत्ती उद्यानासाठी प्रस्तावित करण्यात आली आहे. सद्यस्थितीमध्ये कोल्हापूर जिल्ह्यात सहा हत्तींचा वावर सुरू आहे. त्यातील चार हत्ती यापूर्वी सिंधुदुर्ग-दोडामार्ग तिलारी बुडीतक्षेत्र भागात वावरत होते. दोडामार्ग तालुक्यातील बाबरवाडी-तिलारी भागामध्ये गेले काही महिने हत्तींचा वावर सुरू होता. अधूनमधून हे हत्ती अतिक्रमण करून या भागात मोठ्या प्रमाणात नुकसान करतात.
ऑक्टोबर २००२ पासून  सिंधुदुर्ग जिल्ह्यात हत्तींचा उपद्रव सुरू आहे. हा उपद्रव रोखण्यासाठी या प्रस्तावाला तत्काळ मंजुरी मिळाल्यास सहाही हत्तींना ट्रँग्युलाईज करून तयार करण्यात आलेल्या हत्ती संरक्षक उद्यानात ठेवण्यात येणार आहे.

Page 5 of 375