Saturday, Jan 20th

Headlines:

रिफायनरीबाबत शिवसेनेची भूमिका दुटप्पी ः राज ठाकरे

E-mail Print PDF
रत्नागिरी ः कोकणात होणार्‍या रिफायनरी प्रकल्पाबाबत शिवसेना आणि भाजपची भूमिका दुटप्पी असल्याचा घणाघाती आरोप महाराष्ट्र नवनिर्माण सेनेचे अध्यक्ष राज ठाकरे यांनी केला आहे. त्याचबरोबर निवडणूक आयोगानंतर आता न्यायपालिकेच्या कामातदेखील केंद्र सरकार हस्तक्षेप करत असल्याचे सुप्रीम कोर्टाच्या चार न्यायाधीशांनी घेतलेल्या पत्रकार परिषदेनंतर सामोरे आल्याची टीका करत देशाची वाटचाल अराजकतेकडे सुरू असल्याचे ते म्हणाले.
राज ठाकरे हे शुक्रवारी रत्नागिरीत दाखल झाले. शनिवारी ते सागवे कात्रादेवी येथे जावून रिफायनरी प्रकल्पाबाबत तेथील जनतेचे म्हणणे ऐकून घेणार आहेत. रत्नागिरीत आल्यावर त्यांनी शासकीय विश्रामगृहावर पत्रकार परिषद घेतली. या पत्रकार परिषदेत त्यांनी आपली रोखठोक मते मांडली.

उद्योजक बाळासाहेब पित्रे यांचे निधन

E-mail Print PDF
देवरूख ः गेली ५० वर्षे विविध क्षेत्रात उल्लेखनीय कामगिरी बजावलेले समाजसेवक, ज्येष्ठ उद्योजक वसंत मनोहर उर्फ बाळासाहेब पित्रे (९०) वर्षे यांचे शुक्रवारी निधन झाले. डिसेंबर महिन्यात पत्नी सौ. विमल पित्रे यांचे निधन झाले होते. पत्नी निधनाच्या धक्क्यामुळे बाळासाहेब महिनाभर आजारी होते. पुणे शहरातील खाजगी रूग्णालयात उपचार सुरू असताना त्यांची प्राणज्योत मालवली. आज शहरातील स्मशानभुमित बाळासाहेबांवर अंत्यसंस्कार करण्यात येणार आहेत.

वेळंब येथे बेकायदेशीर शस्त्रसाठा

E-mail Print PDF
गुहागर ः गुहागर तालुक्यातील वेळंब येथे रत्नागिरीच्या गुन्हे अन्वेषण शाखेने टाकलेल्या धाडीत तयार झालेल्या तीन बंदुकांसह बंदुका बनविण्याचे साहित्य असा बेकायदेशीर मुद्देमाल जप्त करण्यात आला असून याप्रकरणी शस्त्र बनविणार्‍या रमेश शंकर काताळकर यास अटक करण्यात आल्याची माहिती पोलिसांनी दिली.
गुहागर तालुक्यातील वेळंब येथे रमेश शंकर काताळकर हे बंदुका दुरूस्त करणे, नवीन बंदुका व बंदुकीचे साहित्य तयार करत असल्याची गुन्हा अन्वेषण खात्याला कुणकुण लागली होती. त्यानुसार ११ जानेवारी रोजी गुन्हा अन्वेषण खात्याच्या पथकाने वेळंब येथे काताळकर यांच्या लोहार कामाच्या दुकानावर धाड टाकली व हा शस्त्रसाठा जप्त केला.

एमआयडीसी भूखंड वाटप प्रकरणी प्रादेशिक अधिकारी पाटील दोषी

E-mail Print PDF
राजापूर ः एमआयडीसीच्या रत्नागिरी, साडवली, गाणे-खडपोली, लोटे परशुराम, खेर्डी, चिपळूण या औद्योगिक क्षेत्रातील भूखंड वाटप प्रकरणात अनियमितता आणि त्रुटी आढळून आल्या आहेत. याप्रकरणी तत्कालीन प्रादेशिक अधिकारी पी. एस. पाटील यांना दोषी ठरवत त्यांची विभागीय चौकशी करून तात्काळ कारवाई करण्याचे निर्देश उद्योगमंत्री सुभाष देसाई यांनी दिल्याची माहिती रत्नागिरी जिल्हा लघु उद्योजक संघटनेचे अध्यक्ष जावेद ठाकूर यांनी पत्रकारांना दिली.
याप्रकरणी ज्या उद्योजकांवर अन्याय झाला आहे त्यांच्या पाठीशे रत्नागिरी जिल्हा लघु उद्योजक संघटना उभी राहणार असल्याचेही ठाकूर यांनी सांगितले. या प्रश्नी संघटनेने सातत्याने पाठपुरावा केला. आमदार हुस्नबानू खलिफे यांनीही औचित्याचा मुद्याद्वारे शासनाचे लक्ष वेधले होते, असे ते म्हणाले.
तत्कालीन प्रादेशिक अधिकारी पी. एस .पाटील यांनी भूखंड वाटपात अनियमितता केली असल्याचे आढळून आल्याने त्यांचे विरूध्द म. ना. से. शिस्त व अपील नियम १९७९ मधील नियम ८ अन्वये विभागीय चौकशी प्रस्तावित करण्यात आली आहे. पाटील हे मूळ महसूल विभागाचे उपजिल्हाधिकारी संवर्गाचे अधिकारी आहेत. ते प्रतिनियुक्तीवर महाराष्ट्र औद्योगिक विकास महामंडळात कार्यरत होते. ते सध्या महसूल विभागांतर्गत कार्यरत असल्याने विभागीय चौकशी सुरू करण्याबाबत प्रधान सचिव महसूल यांना कळविण्यात आले असल्याचे उद्योगमंत्र्यांनी लेखी कळविल्याचे ठाकूर यांनी सांगितले.

कोकणी माणूस हाताळायला सोपा ः राज ठाकरे

E-mail Print PDF
रत्नागिरी ः कोकणी माणूस सरकारच्या दृष्टीने हाताळायला अगदी सोपा झालाय, त्यामुळे वेगवेगळे प्रकल्प माथी मारण्याचा प्रयत्न होत आहे. कोणीही येऊन येथील माणसांची फसवणूक करताना दिसत आहे. राजकीय पक्षही एकमेकांना आरोपीच्या पिंजऱयात उभे करून आपले भाव वाढवून घेत आहेत. परप्रांतीय येथे घुसून जमिनी खरेदी करतात तरीही आम्ही गप्पच, ही स्थिती आता सुधारणे आवश्यक असल्याचे प्रतिपादन महाराष्ट्र नवनिर्माण सेनेचे अध्यक्ष राज ठाकरे यांनी पत्रकार परिषदेत केले.
नाणार येथील प्रस्तावित ग्रीन रिफायनरी विरोधात गेल्या अनेक दिवसांपासून आंदोलनाचा वणवा पेटत आहे. स्थानिक प्रकल्पग्रस्तांसह शिवसेनेनेही या प्रकल्पाला विरोध दर्शवला असून त्यावरून जोरदार राजकारणही उसळले आहे. या वातावरणात मनसेचे अध्यक्ष राजक ठाकरे यांचा रत्नागिरी दौरा सुरू झाला आहे. शुक्रवारी सायंकाळी रत्नागिरी आगमन झाल्यानंतर ठाकरे यांनी शासकीय विश्रामगृहावर पत्रकारांशी संवाद साधला. ग्रीन रिफायनरीला होत असलेल्या विरोधाच्या पार्श्वभूमीवर स्थानिकांचे शिष्टमंडळ आपणाला भेटल्याचे त्यांनी सांगितले.
विविध राजकीय पक्षांच्या भुमिकांबाबत बोलताना कोणी काय भुमिका घेतो याचे देणघेणं नसून स्थानिक जनतेला काय हवे हे महत्वाचे असल्याचे ते म्हणाले. प्रत्येक राजकीय पक्षांचे स्वतःचे अजेंडे असतात, भूमिका असतात, आपली भूमिका नाणार येथील स्थानिकांशी चर्चा करून मांडणार असल्याचे त्यांनी स्पष्ट केले.

राजापूर नगराध्यक्ष काझींचे पद पुन्हा एकदा धोक्यात

E-mail Print PDF
राजापूर ः राजापुरचे नगराध्यक्ष हनीफ मुसा काझी यांचे नगराध्यक्षपद पुन्हा एकदा अडचणीत सापडले आहेत. थेट नगराध्यक्षपदाची निवडणूक लढविताना काझी यांनी सादर केलेला मच्छीमार दालदी समाजाचा दाखला जिल्हा जात पडताळणी समितीने फेरतपासणीमध्येही अवैध ठरवून तो जप्त करण्याचा निर्णय घेतला आहे. दरम्यान, निर्णयाविरोधात काझी उच्च न्यायालयाचे दरवाजे ठोठावण्याची शक्यता आहे.
नगराध्यक्ष हनिफ काझी यांनी थेट नगराध्यक्षपदाची निवडणूक लढवताना मच्छीमार दालदी समाजाचा दाखला सादर केला होता. मात्र याबाबत स्विकृत नगरसेवक अनिल कुडाळी व नगराध्यक्षपदाचे सेनेचे पराभूत उमेदवार अभय मेळेकर यांनी जोरदार आक्षेप घेत जिल्हा जात प्रमाणपत्र पडताळणी समितीकडे तक्रार दाखल केली होती. याप्रकरणी जिल्हा जात प्रमाणपत्र पडताळणी समितीने चौकशी करून काझी यांना उपविभागिय अधिकारी राजापूर यांनी वितरीत केलेला मच्छिमार या जातीचा दाखला अवैध ठरविला होता. त्यानंतर काझी जिल्हा जात प्रमाणपत्र पडताळणी समितीच्या निर्णयाविरोधात मुंबई उच्च न्यायालयात धाव घेत अपिल दाखल केले होते. त्यानुसार मुंबई उच्च न्यायालयाने जिल्हा जात प्रमाणपत्र पडताळणी समितीच्या निर्णयाला स्थगिती देत जिल्हा जात प्रमाणपत्र पडताळणी समिताला फेरतपासणी करण्याचे आदेश दिले होते.
या पार्श्वभूमीवर जिल्हा जात प्रमाणपत्र पडताळणी समितीने याप्रकरणी फेरतपासणी करून आदेश जारी केला आहे. यामध्ये कागदोपत्री पुरावे, पोलीस दक्षता पथकाचे अहवाल, अर्जदार हनिफ काझी तर्फे विधीज्ञ, तक्रारदार अभय मेळेकर, अनिल कुडाळी व त्यांच्यातर्फे विधीज्ञ यांनी मांडलेले म्हणणे व युक्तीवाद विचारात घेता अर्जदार हनिफ काझी यांची जात मच्छीमार (दालदी) इतर मागासवर्ग असल्याचे सिध्द होत नाही. त्यामुळे अर्जदार काझी यांना उपविभागिय अधिकारी राजापूर यांनी वितरीत केलेला मच्छिमार या जातीचा दाखला क्र २१६०/ १६ निर्गम दि.१८/१०/२०१६ हा अवैध ठरविण्यात येऊन रद्द व जप्त करण्यात येत आहे. असा फेर निकाल दिला आहे. या निकालाने शहरातील राजकारणात पुन्हा एकदा खळबळ उडाली आहे.

Page 6 of 2712