Saturday, Jan 20th

Headlines:

शिक्षक वैजनाथ कांबळे अखेर निलंबीत

E-mail Print PDF
राजापूर ः राजापूर तालुक्यातील तळगाव येथील अंगणवाडी सेविकेशी अश्लील वर्तन करणारा तळगाव केंद्रशाळा क्र. १ मधील शिक्षक वैजनाथ महादेव कांबळे याच्यावर निलंबनाची कारवाई करण्यात आल्याची माहिती सभापती सुभाष गुरव यांनी दिली. या कारवाईमुळे तळगाव परिसरातील ग्रामस्थांतून समाधान व्यक्त होत आहे.
तळगाव केंद्रशाळेतील शिक्षक वैजनाथ महादेव कांबळे यांनी त्यांच्याच दुचाकीवरून अंगणवाडीमध्ये चाललेल्या सेविकेशी अश्लील चाळे करण्याचा प्रयत्न केला होता. याप्रकरणी संबंधित अंगणवाडी सेविकेने राजापूर पोलीस ठाण्यात रितसर तक्रार दाखल केल्यानंतर संशयित आरोपी शिक्षक कांबळे यांच्या विरोधात पोलीस स्थानकात गुन्हा दाखल करण्यात आला आहे. या घटनेचे तीव्र पडसाद तळगाव परिसरासह संपूर्ण तालुकाभर उमटले होते. गैरकृत्य करणाऱया या शिक्षकाला निलंबीत करावे अशी मागणी सर्व स्तरातून करण्यात येत होते.
या घटनेनंतर पंचायत समिती सुभाष गुरव यांनी तात्काळ उपसभापतींसह सर्व सदस्यांना घेऊन जिल्हा परिषद अध्यक्ष, मुख्यकार्यकारी अधिकारी व शिक्षण सभापती यांची रत्नागिरी येथे भेट घेवून कांबळे यांना निलंबीत करण्याची मागणीही केली होती. तसेच तळगाव ग्रामस्थांनीही या घटनेचा निषेध करत जोपर्यंत शिक्षकाचे निलंबन होत नाही, तोपर्यंत गावातील कोणत्याही शाळेत मुलांना न पाठविण्याचा निर्णय घेतला होता. त्यानुसार एक दिवस पाचही शाळा बंद ठेवण्यात आल्या होत्या. त्यानंतर सभापती गुरव यांनी ग्रामस्थांची समजूत काढत कारवाईचे आश्वासन दिल्यानंतर पालकांनी मुलांना शाळेत पाठविले होते.
या पार्श्वभूमीवर अंगणवाडी सेविकेशी गैरकृत्य करणारा शिक्षक वैजनाथ कांबळे याच्यावर शिक्षण विभागाने निलंबनाची कारवाई केली आहे. दि.२ जानेवारीपासून कांबळे यांचे निलंबन करण्यात आले असून तसे पत्र तालुका पंचायत समितीला प्राप्त झाले आहे. गैरकृत्य करणारे शिक्षक कांबळे यांच्यावर निलंबनाची कारवाई झाल्याने तळगाव परिसरातील ग्रामस्थांतून समाधान व्यक्त होत आहे. तसेच सभापती सुभाष गुरव, मुख्य कार्यकारी अधिकारी, जिल्हा परिषद प्राथमिक शिक्षणाधिकारी यांना ग्रामस्थांनी धन्यवाद दिले आहेत.

दुकान नोंदणी परवाने वितरण बंद

E-mail Print PDF
रत्नागिरी ः राज्यातील भाजपा शासनाने हक्काचे आर्थिक उत्पन्न मिळवून देणारे स्त्रोत बंद करण्याचा निर्णय घेतला असून त्याची टप्प्याटप्प्याने अंमलबजावणी सुरू आहे. दुकान नोंदणी परवाना (शॉप ऍक्ट लायसन्स) बंद करण्याचा निर्णय शासनाच्या विचाराधीन असून त्याची अंमलबजावणी झाल्यास रत्नागिरी जिल्ह्यातून मिळणारा हक्काचा ५० लाख रुपयांचा महसूल बुडणार आहे.
इंग्रजांच्या राजवटीत गुमास्ता कायदा लागू करण्यात आला होता. देशाच्या स्वातंत्र्यानंतर शॉप ऍक्ट लायसनचा पर्याय स्वीकारून महानगरपालिका, नगरपालिका क्षेत्रात त्याची अंमलबजावणी सुरू करण्यात आली. ग्रामीण भागातील व्यापार्‍यांना अशा प्रकारचा परवाना घेण्याचे कोणतेही बंद नसल्याने त्यांना त्यातून अनिश्‍चित कालावधीसाठी सूट देण्यात आली आहे. काही ग्रामपंचायतींचे रूपांतर नगर पंचायतीत झाले असून त्या क्षेत्रातही ही अट शासनाने अद्यापपर्यंत लागू केलेली नाही. राजापूर, रत्नागिरी, चिपळूण, खेड नगर पालिका क्षेत्रातील सुमारे १२ हजार व्यापार्‍यांच्या परवानगीची नोंदणी केल्यानंतर दरवर्षानी त्याचे सहाय्यक कामगार आयुक्त कार्यालयात नुतनीकरण केले जाते. १ ते ९ कामगार असलेले दुकान, उपाहारगृह, लॉजिंग आदी आस्थापनांना हा कायदा लागू करण्यात आला आहे.

शाखाधिकार्‍याकडूनच बँकेला ४ लाखांना गंडा

E-mail Print PDF
संगमेश्वर ः संगमेश्वर बाजारपेठेतील कोकण मर्कटाईल को. ऑप. बँकेच्या तत्कालिन शाखाधिकाऱयाने कर्जदाराच्या मदतीने बॅकेची ४ लाख रूपयांची फसवणूक केल्याचा प्रकार उघडकीस आला आहे. कर्जदाराला बनावट कागदपत्रांच्या आधारे गृहकर्ज मंजूर करून बँकेची फसवणूक केल्याप्रकरणी कर्जदार व तत्कालीन शाखाधिकाऱया विरुध्द गुन्हा दाखल करण्यात आला आहे. ५ जुलै २०१२ ते ७ डिसेंबर २०१७ या कालावधीत हा प्रकार घडला.
याबाबत बँकेचे विद्यमान शाखाधिकारी जिनत रफिक अहमद वागळे (४७ रा. उद्यमनगर रत्नागिरी) यांनी संगमेश्वर पोलिस ठाण्यात फिर्याद दिली आहे. सोनगिरी येथील मुबीन इब्राहिम कापडे यांना घर बांधणीसाठी कर्ज हवे होते. त्यांनी संगमेश्वर बाजारपेठेतील कोकण मर्कटाईल को. ऑप. बँककडे कर्जासाठी अर्ज सादर केला होता. मात्र कर्ज मिळविण्यासाठी आवश्यक कागदपत्रे त्यांच्याकडे नव्हती.
त्यामुळे तत्कालीन शाखाधिकारी तौफिक इब्राहिम मालीम यांच्याशी संगनमताने कापडे यांनी कर्जप्रकरणासाठी बनावट कागदपत्रे सादर केली. ही कागदपत्रे खोटी असल्याचे माहित असतानाही मालीम यांनी कर्ज मंजूर करून बँकेची फिर्यादीत म्हटले आहे. तत्कालीन शाखाधिकारी मालीम व कर्जदार मुबीन कापडे यांनी संगनमत करून स्वतःच्या फायद्यासाठी बँकेचा विश्वासघात केला असल्याचे तक्रारीत म्हटले आहे. त्यानुसार या दोघांविरोधात संगमेश्वर पोलिस ठाण्यात गुन्हा दाखल करण्यात आला आहे.

अशोक वालम यांना अटक, जामीन, पुन्हा अटक

E-mail Print PDF
राजापूर ः तालुक्यातील नाणार पसिरातील प्रस्तावित रिफायनरी प्रकल्पावरून रविवारी कुंभवडे येथे झालेली हाणामारी व मनाई आदेश असताना नाटे पोलीस ठाण्यात जमावाने केलेला प्रवेश अशा दोन गुह्यात उभय बाजुच्या २८ जणांवर गुन्हे दाखल करण्यात आले. मनाई आदेश भंगप्रकरणी कोकण विनाशकारी रिफायनरी विरोधी संघटनेचे अध्यक्ष अशोक वालम यांच्यासह १० जणांना सोमवारी अटक करण्यात आली. त्यांना राजापूर न्यायालयात हजर केले असता प्रत्येकी १५ हजाराच्या सशर्थ जामीन मंजूर करण्यात आला. मात्र, पंढरीनाथ आंबेरकर यांना झालेल्या मारहाण प्रकरणी पोलीसांनी लगेच अशोक वालम व मंगेश चव्हाण यांना पुन्हा अटक केली.
नाणार परिसरात होऊ घातलेल्या रिफायनरी विरोधात रविवारी कुंभवडे हायस्कूलमध्ये बैठक सुरू असताना तेथे मारहाणीचा प्रकार घडला. यामध्ये कुंभवडे येथील पंढरीनाथ विद्याधर आंबेरकर यांना जबर मारहाण करण्यात आली होती. त्यानंतर आंबेरकर यांना राजापूर ग्रामीण रूग्णालयात दाखल करण्यात आले. आंबेरकर यांनी राजापूर पोलीस ठाण्यात अशोक वालम, त्यांची पत्नी व मंगेश चव्हाण यांच्या विरोधात तक्रार दाखल केली होती.
दरम्यान, या मारहाणीनंतर सुमारे आठशे जणांचा जमाव मनाई आदेशाचा भंग करत नाटे पोलीस ठाण्यात गेला होता. त्यामुळे नाटे पोलीसांनी अशोक वालम यांच्यासह २३ जणांविरूध्द गुन्हा दाखल केला होता. याप्रकरणी सोमवारी अशोक वालम, विलास नार्वेकर, सचीन कोरगावकर, मंगेश चव्हाण व नितीन जठार यांना अटक करण्यात आली. अटकेनंतर सुरक्षीततेच्या कारणास्तव वालम यांना रत्नागिरीत नेण्यात आले होते. या सर्वांना राजापूर न्यायालयापुढे हजर करण्यात आले असता प्रत्येकी १५ हजाराच्या जामीनावर सुटका करण्यात आली. त्याचवेळी दर रविवारी नाटे पोलीस ठाण्यात हजेरी लावण्याचे आदेश देण्यात आले आहेत.

उद्या एस.टी.चे वेळापत्रक कोलमडणार!

E-mail Print PDF
रत्नागिरी ः एस. टी. कर्मचाऱयांची खात्यांतर्गत लिपीक टंकलेखक परीक्षा १७ जानेवारी रोजी होत असून त्याचा परिणाम एस. टी. वेळापत्रकावर होणार आहे. जिल्हयातून २०० वाहक व ६८ चालक व अन्य कर्मचारी या परीक्षेला बसले आहेत. त्यामुळे बुधवारी २६८ कर्मचार्‍यांची कमतरता विभागाला भासणार असून त्याचा परिणाम एस. टीच्या फे़र्‍यांवर होणार आहे. या दिवशी विद्यार्थ्यांची गैरसोय होऊ नये याची खबरदारी घेतली जाणार असून प्रवाशांनी एक दिवस सहकार्य करण्याचे आवाहन विभाग नियंत्रक अनघा बारटक्के यांनी केले आहे.
रत्नागिरी विभागात मुळातच ३०० चालक-वाहकाची कमतरता आहे. त्यातच बुधवारी २६८ कर्मचारी लिपीक पदाच्या खातेंतर्गत परीक्षेसाठी जाणार आहेत. त्यामुळे उर्वरीत मनुष्यबळावरच कामचे नियोजन करावे लागणार आहे. अडीचशेहून अधिक कर्मचारी या परीक्षेला जाणार असल्याने वेळापत्रक कोलमडणार आहे. त्यामुळे प्रवाशांचे सहकार्य अपेक्षित आहे. विद्यार्थी वर्गाचा फटका बसून यासाठी विशेष प्रयत्न केले जाणार असल्याचे बारटक्के यांनी सांगितले.
ही परीक्षा एस. टी. विभाग खात्यांतर्गत असल्याने इतक्या मोठया संख्येने कर्मचारी परीक्षा देत आहेत. त्यामुळे शेकडो फे़र्‍या रद्द कराव्या लागणार असून याची नोंद सर्व प्रवाशांनी घ्यावी असे आवाहनही रत्नागिरी विभागाकडून करण्यात आले आहे.

जिल्ह्यात नेपाळी खलाशांचे प्रमाण घटले

E-mail Print PDF
रत्नागिरी ः रोजगाराच्या शोधात मच्छिमार नौकांवर काम करण्यासाठी जिल्हयात येणा़र्‍या नेपाळी खलाशांच्या संख्येत मोठया प्रमाणावर घट झाली आहे. सागरी सुरक्षेबाबतच्या कडक निर्बंधांमुळे नेपाळी खलाशांची संख्या ३०० ने कमी झाल्याचे दिसून आले आहे. कामगार म्हणून आलेले नेपाळी लोक विविध बेकायदेशीर कृत्यांमध्ये आढळल्यानंतर या खलाशांसाठी नोंदणी व ओळखपत्र सक्तीचे करण्यात आले असून या नियमांमुळे खलाशांची संख्या रोडावली आहे.
केंद्र शासनाकडून नेपाळी कामगारांची नोंदणी अत्यावश्यक करण्यात आली असून कस्टम विभाग व सागरी सुरक्षा विभाग यांच्यामार्फत ओळखपत्र नसलेल्या खलाशांवर कारवाई करण्याचे धारण शासनाने राबविले आह़े रत्नागिरी जिल्हा सागरी सुरक्षा विभागाकडे झालेल्या नोंदणीनुसार २०१६ साली विविध नौकांवर काम करणाऱया नेपाळी खलाशांची संख्या २ हजार इतकी होती. २०१७ मध्ये खलाशांची ही संख्या घटून १७६३ वर आली आहे.
गेल्या काही दिवसांपासून भारतात बांग्लादेश मार्गावरून म्यानमारमधील रोहिंग्या लोक येत असल्याची माहिती समोर आली होती रत्नागिरी जिह्यात देखील अशा प्रकारे अनेक रोहिंगे बेकायदेशीरपणे राहत असल्याचे समोर आल्यानंतर पोलीसांकडून कडक पावले उचलण्यात आली होती.
कमी पैशात पडेल ते काम व कष्ट करण्याची तयारी असल्याने स्थानिक मच्छिमार व्यावसायिकांकडून नेपाळी खलाशांना नेहमीच पसंती दिली जात़े त्यामुळे मच्छिमार नौकांवर हे कामगार सर्रास पहायला मिळतात. नेपाळहून येणार्‍या या कामगारांना व्हिसा व पासपोर्टची आवश्यकता नसल्याने त्यांना भारतात येणे सुलभ आहे. कष्टाचे काम करण्याच्या तयारी असल्याने त्यांना रोजगारही सहजपणे उपलब्ध होतो. रत्नागिरीच्या विविध बंदरात तर या लोकांनाच पहिली पसंती मिळते.

Page 3 of 2712