Sunday, Feb 18th

Headlines:

सिंधुदुर्ग

नदीपात्रात बुडून मायलेकीचा मृत्यू

E-mail Print PDF
sheetal-talekar1कणकवली - दिगवळे-गावडेवाडी येथील गडनदी पात्रातील कोल्हापूर टाईप बंधार्‍याच्या सुमारे १५ फूट खोल असलेल्या पाण्यात कपडे धुण्यासाठी गेल्या असताना पाय घसरुन तृप्ती संतोष तळेकर (१४) आणि सौ. शीतल संतोष तळेकर (४०, दोन्ही रा. मुंबई- सांताक्रुझ, मूळ वैभववाडी) या मायलेकीचा बुडून मृत्यू झाला. त्यांना वाचवण्यासाठी गेलेली सौ. शीतल हिची आई सुशीला रमेश नार्वेकर (६५) ही सुदैवानेच बचावली. दिगवळे- गावडेवाडी येथील प्रकाश पांडुरंग आचरेकर यांच्या मुलीच्या लग्नासाठी आचरेकर यांची आत्येबहीण सुशीला नार्वेकर, तिची मुलगी सौ. शीतल तळेकर ही आपल्या तीन मुलांसमवेत चार दिवसांपूर्वी मुंबईहून दिगवळे येथे आली होती.

रास्त दराचे धान्य दुकान पुन्हा सुरु करण्यासाठी किंजवडेवासीयांचे उपोषण, तहसीलदारांचे आश्‍वासन

E-mail Print PDF
kinjawade-villagers1देवगड - किंजवडे गावात बंद असलेले रास्त दराचे धान्य दुकान सुरु करण्यासाठी वेळोवेळी मागणी करुनही प्रशासनाने दुर्लक्ष केल्याने अखेर किंजवडेवासीयांनी तहसील कार्यालयासमोर उपोषण सुरु केले. तहसीलदार के.डी. नाडेकर यांनी उपोषणकर्त्यांची भेट घेऊन १५ दिवसांत रास्त धान्य दुकान सुरु करण्याची कारवाई करतो, असे लेखी आश्‍वासन दिल्यानंतर ग्रामस्थांनी उपोषण मागे घेतले. किंजवडे गावातील रास्त दराचे धान्य दुकान बंद असून, गावातील लोकांना आरे गावातून रेशन आणावे लागत आहे. या गावात रास्त दराचे धान्य दुकान व केरोसीन विक्रीचा परवाना मंजूर करावा, अशी मागणी केली होती.

एक हजार पक्के बंधारे बांधणार : ई. रवींद्रन

E-mail Print PDF
देवगड - भविष्यातील संभाव्य पाणीटंचाई दूर होण्यासाठी सिंधुदुर्गात सुमारे एक हजार पक्के बंधारे बांधण्याचा संकल्प आहे. यासाठीचे सर्वेक्षण सुरू असून मेअखेर ते पूर्ण होईल, असे जिल्हा परिषदेचे मुख्य कार्यकारी अधिकारी ई. रवींद्रन यांनी येथे पत्रकारांशी बोलताना सांगितले. आजवर देवगडात २१ ठिकाणी पक्के बंधारे बांधणे शक्य आहे अशा जागांचे सर्वेक्षण झाले असून आणखी त्यात वाढ होईल, असेही त्यांनी सांगितले. येथील पंचायत समिती कार्यालयात ई. रवींद्रन आले होते. त्यांच्यासोबत जिल्हा परिषदेचे उपमुख्य कार्यकारी अधिकारी (ग्रामपंचायत विभाग) सुनील रेडकर, शिक्षणाधिकारी (प्राथमिक) आर. पी. धाकोरकर होते. येथील पंचायत समिती कार्यालयात उपसभापती रवींद्र जोगल यांनी ई. रवींद्रन यांचे पुष्पगुच्छ देऊन स्वागत केले. या वेळी गटविकास अधिकारी विजय चव्हाण, गटशिक्षणाधिकारी महेश जोशी तसेच विविध खात्यांचे अधिकारी, कर्मचारी उपस्थित होते.

शिडवणे येथे साखर कारखाना होणारच : विजय सावंत

E-mail Print PDF
वैभववाडी - ’शिडवणे येथील नियोजित साखर कारखान्याच्या उभारणीत कुणीही कितीही अडथळे निर्माण केले तरी शेतकर्‍यांच्या हितासाठी हा साखर कारखाना होणारच’’, असा ठाम विश्‍वास आमदार विजय सावंत यांनी येथे व्यक्त केला. शासकीय विश्राम गृहावर श्री. सावंत यांची पत्रकार परिषद झाली. कणकवलीचे माजी सभापती मधुकर सावंत, जिल्हा परिषद सदस्य सुगंधा दळवी, मंगेश लोके, अरुण मुरकर आदी उपस्थित होते.श्री. सावंत म्हणाले,जिल्ह्यात ऊस शेतीचे क्षेत्र झपाट्याने वाढत आहे. येथे साखर कारखाना झाला तर उसाच्या क्षेत्रात अजूनही वाढ होईल. ऊस शेतीपासून दोनशे कोटींची उलाढाल होईल. त्यामुळे आपण शिडवणे येथे साखर कारखाना उभारणीकरिता प्रयत्न करीत आहोत. या नियोजित साखर कारखान्याला आवश्यक विभागाची मान्यता मिळाली आहे. शुगर कमिशनरचे प्रमाणपत्र मिळाले आहे. त्यामुळे आता कारखाना सुरू करण्यात कोणतीही अडचण नाही. मात्र काहींनी अडथळा निर्माण करण्याचा प्रयत्न सुरू केलेला असला तरी शेतकर्‍यांच्या पाठबळावर आपण सर्व अडचणींवर मात करणार आहोत’’.

जिल्ह्यातील महामार्गावरील पुलांच्या उंचीचा प्रश्‍न जैसे थे

E-mail Print PDF
पणदूर - महामार्गावरील पीठढवळ, भंगसाळ, कसाल पुलांची उंची वाढविण्याचा प्रश्‍न यंदाही मार्गी लागलेला नाही. यामुळे येत्या पावसाळ्यातही महामार्गावर पुरामुळे वाहतूक कोंडीचा प्रश्‍न निर्माण होण्याची शक्यता आहे. मुंबई-गोवा मार्गावरील कसाल, पीठढवळ, भंगसाळ या पुलांचे घोंगडे भिजतच पडलेले आहे. दोन वर्षांपूर्वी या पुलांच्या ठिकाणी नवीन पूल बांधण्यास मंजुरी मिळाली; मात्र यावर पुढची कार्यवाही झाली नाही. त्यामुळे मंजुरीनंतर दोन वर्षे लोटली तरी नवीन पूल उभारण्याबाबत कार्यवाही झालेली नाही. आता तर पावसाळा अगदी तोंडावर येऊन ठेपला आहे. त्यामुळे येत्या पावसाळ्यातही पुलावर पाणी येऊन वाहतूक ठप्प होणार आहे. महामार्ग प्राधिकरणाने वेळीच पुलाचे काम सुरू करावे यासाठी लोकप्रतिनिधींनी पाठपुरावा करणे गरजेचे आहे.

Page 653 of 678