Saturday, Sep 23rd

Headlines:

सिंधुदुर्ग

दोडामार्ग पं.स.सभापती गणपत नाईक अपात्र

E-mail Print PDF
सिंधुदुर्गनगरी - जिल्ह्यातील ३२५ ग्रामपंचायतीच्या सार्वत्रिक निवडणुकांची धामधूम सुरू झालेली असतानाच शिवसेनेला जोरदार धक्का बसला आहे. दोडामार्ग पंचायत समितीचे शिवसेनेचे सभापती गणपत अनंत नाईक व सदस्या धनश्री गणेशप्रसाद गवस या दोघांचेही सदस्यत्व जिल्हाधिकारी उदय चौधरी यांनी रद्द केले आहे. दोडामार्ग पंचायत समिती शिवसेना-भाजप पार्टी या गटाच्या गटनेत्याचा व्हीप डावलल्याचा ठपका त्यांच्यावर ठेवण्यात आला आहे. त्यामुळे दोडामार्ग तालुक्यात शिवसेनेचा एकही पं. स. सदस्य राहिलेला नाही.
मार्च २०१७ मध्ये दोडामार्ग पंचायत समितीच्या झालेल्या सार्वत्रिक निवडणुकीत शिवसेनेचे गणपत नाईक, धनश्री गवस, भाजपचे लक्ष्मण नाईक, भरत जाधव तर संजना कोरगावकर व सुनंदा धर्णे हे कॉंग्रेस-राष्ट्रवादी पक्षाच्यावतीने निवडून आल्या होत्या. यानंतर शिवसेना-भाजप पक्षाच्या चारही सदस्यांनी ११ मार्च रोजी जिल्हाधिकारी यांच्याकडे दोडामार्ग पंचायत समिती शिवसेना-भाजप पार्टी असा गट स्थापन केला होता.
यानंतर १४ मार्च रोजी या पंचायत समितीच्या सभापतीपदासाठी निवडणूक लागल्याने गटनेते भाजप सदस्य लक्ष्मण नाईक यांनी आपण सभापतीपदासाठी उमेदवारी दाखल करणार आहे. तर शिवसेनेच्या धनश्री गवस या उपसभापतिपदाच्या उमेदवार राहणार असल्याने त्यांनाच मतदान करावे, असा व्हीप बजावला होता.
१४ मार्च रोजी झालेल्या प्रत्यक्ष सभापती व उपसभापती निवडणुकीवेळी शिवसेना सदस्य गणपत नाईक यांनी व्हीप डावलत सभापतिपदासाठी उमेदवारी दाखल केली. त्याला शिवसेनेच्या दुसर्‌या सदस्या धनश्री गवस यांनी सूचक म्हणून स्वाक्षरी करत त्यांनाच मतदान केले. याविरोधात गटनेते लक्ष्मण नाईक यांनी जिल्हाधिकारी यांच्याकडे या दोघांचेही सदस्यत्व रद्द करावे, अशी तक्रार दाखल केली होती.
त्यावर जिल्हाधिकारी चौधरी यांची सुनावणी सोमवारी पूर्ण झाली. महाराष्ट्र स्थानिक प्राधिकरण सदस्य अपात्रता अधिनियम १९८६ चे कलम (३),(१),(ब) प्रमाणे व्हीप बजावल्यापासून शिवसेनेचे गणपत नाईक व धनश्री गवस यांना अपात्र ठरवत त्यांचे सदस्यत्व रद्द केले आहे.

ट्रक- दुचाकी यांच्यातील अपघातात दुचाकीस्वार जागीच ठार

E-mail Print PDF
दोडामार्ग - दोडामार्ग येथे आयशर ट्रक आणि दुचाकीमध्ये झालेल्या अपघातात दुचाकिस्वार जागीच ठार झाला तर, एक जण गंभीर जखमी झाला आहे. समीर परमेकर असे अपघातात ठार झालेल्या दुचाकिस्वाराचे नावे आहे. तर,  शुभम जाधव (रा. दोघेही खानयाळे, ता दोडामार्ग) असे जखमी झालेल्याचे नाव आहे.   दोडामार्ग-गोवा गेट पासून ५०० मीटर अंतरावर दुचाकी आणि आयशर ट्रक यांच्यात हा अपघात झाला.

जि. प. सभागृहाचे सिलिंग कोसळले; ७० लाखाचा निधी वाया

E-mail Print PDF
सिंधुदुर्गनगरी - स्लॅबच्या गळतीचा गेली २ वर्षे सामना करणारा जिल्हा परिषद छत्रपती शिवाजी महाराज सभागृहाचा पीओपी छताचा काही भाग आज पडला आहे. स्लॅब गळतीकडे गेली दोन वर्षे जि.प. पदाधिकारी व प्रशासनाने दुर्लक्ष केल्याने या सभागृहाच्या सजावटीसाठी केलेला सुमारे ७० लाख रुपयांचा निधी वाया गेला आहे. मात्र, सभागृहाच्या स्लॅबला गळती असतानाही ती दुरुस्ती करण्याचे सोडून अंतर्गत सजावटीवर लाखो रुपये निधी खर्च करण्यामागचे गौडबंगाल काय? असा प्रश्‍न या निमित्ताने उपस्थित होत आहे.
सिंधुदुर्ग जिल्हा परिषदेच्या छत्रपती शिवाजी महाराज सभागृहामध्ये स्लॅबला गळती असल्याने सभागृहातील किंमती वस्तू, टेबल, खुर्च्या, कार्पेट यासारख्या वस्तू खराब होवून नुकसान होत होते. यासाठी दोन वर्षापूर्वी सभागृहाचे नूतनीकरण करण्याचा निर्णय घेण्यात आला होता. त्यानुसार जि.प. स्वउत्पन्नातून लाखो रुपयांच्या निधीची तरतूद करण्यात आली  व या सभागृहाच्या डागडुजीसाठी सुमारे ७० लाख रुपयांचा निधी खर्च करण्यात आला. या निधीतून या सभागृहाच्या छताला पीओपी सिलिंग करण्यात आले. मात्र सभागृहाच्या डागडुजीवर खर्च करण्यापेक्षा सभागृहाच्या सजावटीवर जादा निधी खर्च करण्यात आला. सभागृहाच्या छताला असलेली गळतीची दुरुस्तीच करण्यात आली नाही. परिणामी सभागृहात गळती सुरूच होती. या गळतीमुळे सभागृहाच्या सिलिंगचा काही भाग काळपट पडला होता. ठिकठिकाणी काळपट भाग झाल्याने सभागृहाचे सौंदर्य गायब झाले होते. सभागृहात एक विचित्र प्रकारचा दुर्गंध येत होता. तसेच गळती सुरूच असल्याने या सभागृहाचे सिलिंग केव्हाही पडण्याची स्थिती निर्माण झाली होती. त्यामुळे जि.प.चे तत्कालीन  आणि विद्यमान सदस्यांनी गेली दोन वर्षे या सभागृहाच्या दुरुस्तीसाठी जि.प. पदाधिकारी व प्रशासनाचे लक्ष वेधले होते.
मात्र, या मागणीकडे पदाधिकारी व प्रशासनाने दुर्लक्ष केल्याने या सभागृहातील पीओपी सिलिंगचा काही भाग कोसळून पडला आहे. तर काही भाग कोसळण्याच्या स्थितीत आहे. मात्र, या सर्व प्रकारात जि.प.चा ७० लाखाचा निधी वाया गेला आहे.

एकाच दोरीला गळफास घेऊन दांपत्याची आत्महत्या

E-mail Print PDF
वेंगुर्ले - शिरोडा-शिसामुंणगे येथील मयेकर वृद्ध दाम्पत्याने घरातच एकाच दोरीला गळफास घेऊन आत्महत्या केली. मृत हे पती-पत्नी असून सुरेश राजाराम मयेकर (वय ७५) तर पत्नी सौ. सुनीता सुरेश मयेकर अशी त्यांची नावे आहेत. या दोघांनी आजाराला कंटाळून आत्महत्या केल्याची माहिती पोलिसांनी दिली आहे. याबाबत आकस्मिक मृत्यूची नोंद झाली आहे.
शिरोडा-शिसामुंणगे येथील पती-पत्नी असलेले मयेकर दाम्पत्य हे गेली कित्येक वर्षे वृद्धापकाळाच्या आजाराने ग्रस्त होते. त्यातही त्यांचा आजार दिवसेंदिवस अधिकच बळावत गेल्यामुळे त्यांची प्रकृती आणखीनच खालावली होती. त्यामुळे या घरातील सुरेश राजाराम मयेकर व त्यांची पत्नी सौ. सुनीता सुरेश मयेकर यांनी सकाळी ९ वा. आपल्या राहत्या घरात एकाच दोरीने गळफास लावून घेत एकाच वेळी आत्महत्या केली. ही बाब उघडकीस आल्यानंतर मयत यांचा भाऊ सीताराम मयेकर यांनी याबाबत पोलिसांना कल्पना दिली. शिरोडा दूरक्षेत्राचे पोलिसांनी घटनास्थळी धाव घेत हे मृतदेह बाजूला केले. याबाबत वेंगुर्ले पोलिस ठाण्यात आकस्मिक मृत्यूची नोंद करण्यात आली आहे.

वैभववाडीत फुले- आंबेडकरी साहित्य संमेलनाचे आयोजन

E-mail Print PDF
वैभववाडी - सम्यक साहित्य संसद, सिंधुदुर्ग व सहसंयोजक वैभववाडी तालुका बौध्द सेवा संघ यांच्यावतीने दिवंगत कवी आ.सो.शेवरे, कवी व कार्यकर्ते उत्तम पवार यांच्या स्मृतीप्रित्यर्थ रविवार १७  सप्टेंबर रोजी डॉ. बाबासाहेब आंबेडकर स्मारक भवन पंचशील उद्यान येथे ‘तिसरे फुले-आंबेडकरी साहित्य संमेलन’ आयोजित करण्यात आले आहे, अशी माहिती सम्यक साहित्य संसद सिंधुदुर्गचे अध्यक्ष सुनील हेतकर व कार्यवाह सिध्दार्थ तांबे यांनी दिली.
वैभववाडी येथील डॉ. बाबासाहेब आंबेडकर भवन येथे आयोजित पत्रकार परिषदेत या साहित्य संमेलनाची त्यांनी अधिकृत घोषणा केली. संस्थेचे अनिल जाधव, राजेश कदम, संतोष पाटणकर, यशवंत कांबळे, प्रा. गुलदे, रवींद्र पवार, अभय शेवरे, सुभाष कांबळे, प्रफुल्ल जाधव, रूपेश कांबळे आदी उपस्थित होते.
जिल्ह्यातील बहुजन समाजाती युवकांना मानव मुक्तीचा विचार मांडणारे साहित्य निर्माण करण्यासाठी प्रेरणा व प्रोत्साहन देण्यासाठी व वैचारीक प्रबोधनासाठी या साहित्य संमेलनाचे आयोजन करण्यात आल्याचे त्यांनी सांगितले. संमेलनाच्या अध्यक्षस्थानी महाराष्ट्रातील आघाडीचे कथाकार प्रा.जी. के. ऐनापुरे आहेत. तर संमेलनाचे उद्घाटन मराठी कवी व साहित्याचे ज्येष्ठ समीक्षक मोतीराम कटारे यांच्या हस्ते होईल.
प्रमुख अतिथी म्हणून डॉ. प्रतिमा परदेशी, स्वागताध्यक्ष वैभववाडी तालुका बौध्द सेवा संघाचे उपाध्यक्ष संजय जाधव असणार आहेत. या संमेलनास कवी अजय कांडर, प्रा. नामदेव गवळी, विजय चव्हाण, तालुका संघाचे अध्यक्ष यशवंत यादव आदी मान्यवर उपस्थित राहणार आहेत. संमेलनाची प्रस्तावना अध्यक्ष सुनील कांबळे तर सूत्रसंचलन राजेश कदम करणार आहेत.
दुपारी १२ वा. डॉ. परिसंवाद होणार असून अध्यक्षस्थानी समीक्षक मोतीराम कटारे हे असतील तर डॉ. श्रीधर पवार, आनंद देवडेकर, प्रा. गंगाधर अहिरे, अंकुश कदम आदी मान्यवर सहभाग घेणार आहेत. सूत्रसंचलन अनिल जाधव तर आभार प्रफुल्ल जाधव मानतील. दु. १.३० वा. स्नेहभोजन त्यानंतर संमेलनाचे दुसर्‌या सत्रात सांस्कृतिक अध:पतन आणि भविष्यकालीन या परिसंवादामध्ये कॉ. किशोर ढमाले, प्रा. प्रवीण बांदेकर, डॉ. अनिल फराकटे, डॉ. देवेंद्र जाधव, प्रा. सोमनाथ कदम, डॉ. महेंद्र भवरे यांच्या अध्यक्षतेखाली  होणार्‌या या परिसंवादाचे सूत्रसंचलन विठ्ठल कदम करतील तर आभार सूर्यकांत चव्हाण मानतील.
सायं. ४ वा. ज्येष्ठ कवी डॉ. अनिल धाकू कांबळी यांच्या अध्यक्षतेखाली कवी संमेलन होणार आहे. निमंत्रित कवी संमेलनामध्ये वीरधवल परब, प्रा. प्रवीण बांदेकर, अजय कांडर, संध्या तांबे, अरूण नाईक, सुनील कांबळे, विठ्ठल कदम, मनिषा जाधव, नामदेव गवळी, सफरअली इसफ, राजेश कदम, सरिता पवार, अनिल जाधव, सूर्यकांत चव्हाण, पी. एल. कदम, अभया कदम, प्रतिक पवार, धुरंधर मिठबांवकर आदी कवी या कवी संमेलनामध्ये भाग घेणार आहेत. सूत्रसंचलन सिध्दार्थ तांबे तर आभार अभय शेवरे करतील. संपूर्ण दिवसभर चालणार्‌या या तिसर्‌या फुले, आंबेडकर साहित्य संमेलनात सर्व साहित्य रसिकांनी परिवर्तनवादी तसेच फुले, आंबेडकरवाडी विचारवंत, कार्यकर्ते, कवी, लेखक यांची उपस्थित रहावे, असे आवाहन सम्यक साहित्य संसद सिंधुदुर्ग यांच्यावतीने अध्यक्ष सुनील हेतकर, कार्यवाही सिध्दार्थ तांबे यांनी केले आहे.

Page 6 of 655