Saturday, Sep 23rd

Headlines:

सिंधुदुर्ग

आंबोली धबधब्यावरुन दोन ग्रामपंचायतींत वाद; गोपनीय बैठका सुरु

E-mail Print PDF
सावंतवाडी - आंबोली आणि पारपोली या दोन ग्रामपंचायतीत झालेल्या सिमावादात वर्षा पर्यटनासाठी जगाच्या नकाशावर झळकलेला आंबोली मुख्य धबधबा सापडला आहे. हा धबधबा पारपोलीच्या हद्दीत येत असल्यामुळे त्याचे नाव बदलण्याच्या हालचाली सुरू आहेत. त्यासाठी गोपनिय बैठका सुरू आहेत. याला आंबोली ग्रामस्थांचा विरोध असून काही झाले तरी आम्ही नाव बदलण्यास देणार नाही, अशी त्यांची भूमिका आहे.
आंबोली घाटाला आणि येथील वर्षा पर्यटनाला मुख्य आंबोलीच्या धबधब्यामुळे ओळख मिळाली आहे. हा धबधबा आता जगाच्या नकाशावर झळकला आहे. त्यामुळे दिवसाकाळी हजारो पर्यटक या ठिकाणी भेट देताना दिसतात; मात्र यावर्षी पासुन आंबोली धबधब्याच्या या विकासात सिमावाद आला आहे. जिल्ह्याचे पालकमंत्री दीपक केसरकर यांनी पर्यटन स्थळाचा विकास व्हावा, यासाठी आंबोली धबधब्याला भेट देणार्‍या पर्यटकांकडुन प्रत्येकी दहा रुपये पर्यटन कर घेण्याचा निर्णय घेतला होता आणि त्याची अमंलबजावणी सुध्दा करण्यात आली. आज पावसाळ्याच्या अखेरीस त्याठिकाणी नेमण्यात आलेल्या समितीकडे दहा लाखाहून अधिक रक्कम कराच्या स्वरुपात गोळा झाली आहे. येणार्‍या काळात हा आकडा वाढणार आहे.
त्यातून मिळणारे लाखो रुपये हाच कळीचा मुद्दा ठरला आहे. तो धबधबा आपल्या ग्रामपंचायतीच्या ताब्यात आहे. त्यामुळे यातून मिळणारे उत्पन्न आपल्यालाच मिळावे, असा प्रयत्न पारपोली आणि आंबोली या दोन्ही ग्रामपंचायतीकडुन सुरू करण्यात आला आहे. वनविभाग आणि महसुल विभागाने कागदपत्राच्या आधारे दिलेल्या माहीतीनुसार आंबोली धबधबा हा पारपोली गावच्या हद्दीत येत असल्यामुळे त्याची देखरेख आणि मिळणारे उत्पन्न आमच्या ग्रामपंचायतीला देण्यात यावे, अशी मागणी पारपोली ग्रामस्थांकडुन करण्यात आली आहे. एवढ्यावरच न थांबता थेट या धबधब्याचे नाव ‘शिवमुख धबधबा पारपोली’ असे करण्याच्या प्रयत्नात आहेत. त्यासाठी ग्रामस्थ आणि वनसमितीच्या गुप्त बैठका सुरू आहेत. त्यात आचारसंहीता असल्यामुळे त्यांना उघड कोणतीही भूमिका घेणे शक्य नाही.
या नाव बदलाच्या प्रक्रीयेला आंबोली आणि चौकुळ ग्रामस्थांनी विरोध केला आहे. इतकी वर्षे हा आंबोली धबधबा या नावानेच ओळखला जात होता. त्यामुळे काहीही झाले तरी आम्ही त्याचे नाव बदलण्यास देणार नाही, अशी भूमिका या ग्रामस्थांनी घेतली आहे; मात्र दोन गावात वाद लावण्यासाठी वनविभागाचे अधिकारीच जबाबदार आहेत, असा आरोप सुध्दा आंबोली चौकुळ ग्रामस्थाकडुन करण्यात आला. विद्यमान उपसरपंच धबधब्याच्या ठिकाणी कर वसूली करण्यासाठी नेमण्यात आलेल्या पथकात बसतात ते लोकप्रतिनिधी असल्यामुळे असा प्रकार करू शकत नाहीत, असे ग्रामस्थांचे म्हणणे आहे.

राणेंचा भाजप प्रवेश मुलांच्या भवितव्यासाठी : वैभव नाईक

E-mail Print PDF
कणकवली - नवरात्रोत्सवात होणारा नारायण राणेंचा भाजप प्रवेश हा निव्वळ त्यांच्या दोन मुलांच्या भवितव्यासाठी आहे. सतीश सावंत, रणजित देसाई आदी कार्यकर्ते आमदार व्हावेत, असा विचार राणेंनी कधीच केलेला नाही, अशी टीका शिवसेनेचे आमदार वैभव नाईक यांनी आज येथे केली.
येथील संपर्क कार्यालयात श्री. नाईक यांनी पत्रकार परिषद घेतली. या वेळी नगरसेवक सुशांत नाईक उपस्थित होते. श्री. नाईक म्हणाले, ‘‘कॉंग्रेसच्या नेतृत्वाखाली निवडणुका लढवायच्या, कॉंग्रेस विचारसरणीच्या मतदारांकडून मते मिळवायची, पदांचा लाभ उठवायचा आणि कॉंग्रेसच्या बैठकीलाच विरोध करायचा, अशी दुटप्पी भूमिका कॉंग्रेसचे जिल्हाध्यक्ष घेत आहेत.
माजी मुख्यमंत्री राणे हे आपले दोन सुपुत्र आणि समर्थक कार्यकर्त्यांसह लवकरच भाजपमध्ये प्रवेश करणार आहेत. पण भाजप नेत्यांनी त्यांना गेली अनेक महिने भाजप प्रवेशापासून लटकत ठेवले आहे. राणेंवर ही वेळ त्यांच्या दोन मुलांनी आणली आहे. राणेंचा भाजप प्रवेश हा केवळ त्यांच्या दोन मुलांच्या राजकीय भवितव्यासाठी आहे. समर्थक कार्यकर्त्यांच्या भवितव्यासाठी त्यांनी हा निर्णय घेतलेला नाही. जवळचे कार्यकर्ते आमदार व्हावेत, असेही त्यांना कधी वाटत नाही.’’

सिंधुदुर्गात कॉंग्रेसचे अस्तित्व टिकवण्यासाठी प्रदेश कॉंग्रेसच्या हालचाली

E-mail Print PDF
सावंतवाडी - माजी मुख्यमंत्री नारायण राणे भाजपात जाणार की नाहीत? जाणार तर कधी हा प्रश्‍न महाराष्ट्रात गेले चार-सहा महिने ‘कट्टाप्पाने बाहुबली को क्यूँ मारा!’ यापेक्षा जास्त चघळला गेला. सगळ्या पक्षाच्या नेत्यांनी या विषयात तोंड घातले; मात्र कॉंग्रेसच्या वरिष्ठ नेत्यांनी मौन सोडले नाही. राणे गेलेच तर सिंधुदुर्गात संघटनेचे अस्तित्व टिकवायचे प्रयत्न प्रदेश कॉंग्रेसने आता सुरू केले आहेत; मात्र हे उशिरा सुचलेले शहाणपण असल्याने त्यांची इकडे आड तिकडे विहीर अशी स्थिती झाली आहे.
कॉंग्रेसनेही शिवसेनेच्याच कार्यपद्धतीचे अनुकरण करत जिल्ह्यातील संघटना राणेंकडे सुपूर्द केली. अर्थात कॉंग्रेसच्या वरिष्ठ नेत्यांसाठी दुसरा पर्यायही नव्हता. कारण राणेंनी कॉंग्रेसमध्ये आल्यानंतर आपल्या आक्रमक शैलीने आपले स्थान निर्माण केले. त्यामुळे त्यांच्या कार्यक्षेत्रात ढवळाढवळ करण्याचा प्रयत्न कुठच्याच कॉंग्रेसच्या वरिष्ठ नेत्यांनी केला नाही. हळूहळू राणेंनी कॉंग्रेसच्या जुन्या कार्यकर्त्यांनाही आपलेसे केले. ज्यांनी हा बदल स्वीकारला नाही ते राजकीय प्रवाहातून बाहेर फेकले गेले. यामुळे जिल्ह्यात आता अस्तित्वात असलेली कॉंग्रेसची बहुसंख्य संघटना राणेंच्या प्रभावाखालचीच आहे.
या सगळ्या पार्श्‍वभूमीवर राणे कॉंग्रेसमध्ये अस्वस्थ असल्याची चर्चा गेल्या काही वर्षांपासून सुरु आहे. राणेंनी पक्षाविरोधात उघड बंड पुकारल्याची भूमिकाही अनेकदा घेतली; मात्र कॉंग्रेसने राणेंना वगळून सिंधुदुर्गात कॉंग्रेसचे वेगळे अस्तित्व निर्माण करण्याचा प्रयत्न केला नाही. यामुळे हळूहळू कॉंग्रेसच्या जुन्या ज्येष्ठ नेत्यांनीही राणेंचे नेतृत्व मान्य केले.
आता राणे भाजपमध्ये जातील अशी चर्चा गेले काही महिने सुरू आहे. शिवसेना, भाजपच्या नेत्यांनी यावर उघड प्रतिक्रियाही दिल्या. राणेंनीही आपण कॉंग्रेस सोडणार नाही अशी ठाम भूमिका कधीच जाहीर केली नाही. असे असूनही कॉंग्रेसच्या वरिष्ठ नेत्यांनी मौन सोडले नाही. आता मात्र प्रदेश कॉंग्रेस अचानक सक्रीय झाली आहे. चारच दिवसापूर्वी कॉंग्रेसने निष्ठावंतांची बैठक बोलावली होती. यात राणे आणि त्यांच्या समर्थकांना निमंत्रण नव्हते. राणेंनी त्याचवेळी कॉंग्रेसची समांतर बैठक बोलावली. राणेंकडील बैठक हाऊसफुल्ल आणि प्रदेशकडून आलेल्या हुसेन दलवाई, राजन भोसले, विश्‍वनाथ पाटील यांच्या उपस्थितीतील बैठकीला कार्यकर्त्यांचा दुष्काळ असे चित्र होते. प्रदेशकडून आलेल्या या नेत्यांनी राणेंना विश्‍वासात घेतले नसल्याची भूमिका राणेसमर्थकांकडून घेतली. राणेंनीही त्याला पाठींबा दिला.

कामळेवीरात कारमधून दोन लाखाची दारू जप्त

E-mail Print PDF
कुडाळ - झारापच्या दिशेने येणार्‍या अल्टो कारला राज्य उत्पादन शुल्क विभागाच्या पथकाने थांबविण्याचा प्रयत्न केला असता, चालकाने झाराप येथे महामार्गावरून कार कामळेवीर बाजारपेठेच्या दिशेने पळविली. त्या कारचा पथकाने पाठलाग सुरू केल्यावर रेल्वे पुलानजीक आंबा कलमबागेत कार घुसवून तेथेच ती सोडून त्याने पलायन केल्याची घटना मंगळवारी पहाटे साडेतीनच्या सुमारास घडली. गोवा बनावटीच्या दारूचे ५७ खोके कारमध्ये खचाखच भरण्यात आले होते. यात २ लाख १८ हजार ८८० रुपयांची दारू जप्त करण्यात आली.
मिळालेल्या माहितीवरून राज्य उत्पादन शुल्क विभागाच्या पथकाने पत्रादेवी-झाराप महामार्गावर कामळेवीर दरम्यान थांबून सापळा रचला होता. पहाटे साडेतीनच्या सुमारास एमएच-०४-डीजे-४२६३ क्रमांकाची अल्टो कार सुसाट वेगाने झारापच्या दिशेने येत होती. पथकातील अधिकाऱयांनी कार थांबविण्याचा प्रयत्न केला. मात्र, कार न थांबवता चालकाने कार पळवत कामळेवीर बाजारपेठेच्या दिशेने नेली. पथकाने कारचा पाठलाग सुरू केल्यानंतर रेल्वे पुलाच्या बाजूला असलेल्या कच्च्या रस्त्यावरून कार एका बागेत घुसविली. बागेतील लाकडाच्या ओंडक्याला लागून कार अडकली असता, चालकाने कार तेथेच सोडून पलायन केले. त्यानंतर ती कार टोचन लावून कुडाळ येथे आणण्यात आली. हनीबेंल्ड ब्रॅन्डीचे ५७ बॉक्स कारमध्ये सापडले. २ लाख १८ हजार ८८० रुपयांची दारू व दीड लाख रुपयांची कार मिळून ३ लाख ६८ हजार ८८० रुपयांचा मुद्देमाल जप्त करण्यात आला.
विभागीय उपायुक्त संगीता दरेकर व अधीक्षक प्रदीप वळुंजकर यांच्या मार्गदर्शनाखाली निरीक्षक अमित पाडाळकर, दुय्यम निरीक्षक संजय साळवे, सुनील सावंत, जवान हेमंत वस्त, प्रसाद माळी, अवधूत सावंत, प्रशांत परब व विजय राऊळ यांनी या मोहिमेत भाग घेतला.

वाळूची वाहतूक करणारा ट्रक पुलावरुन कोसळला

E-mail Print PDF
कणकवली - गोव्याहून कोल्हापूरकडे वाळूची वाहतूक करणारा दहाचाकी ट्रक मुंबई-गोवा महामार्गावरील वागदे-टेंबवाडी येथील एका अरुंद पुलावरून सुमारे १५ ते २० फूट अंतरावरील ओहोळात कोसळला. या अपघातात ट्रकचा चकाचूर झाला असून ट्रकची पुढील दोन्ही चाके निखळून पडली; मात्र सुदैवानेच चालक बचावला. हा अपघात रविवारी मध्यरात्री १२ वा.च्या सुमारास घडला. या अपघाताने मुंबई-गोवा महामार्गावरील अरुंद पूलांचा प्रश्‍न पुन्हा एकदा ऐरणीवर आला आहे.
मुंबई-गोवा महामार्गावर वागदे-टेंबवाडी येथे ओहोळावर असलेला अरुंद पूल वारंवार अपघातांचे कारण ठरत आहे. मुळात हा पूल अरूंद आहे, शिवाय रेलिंग नाही तसेच याच पूलावर सुरूवातील खड्डे पडले आहेत. त्यातच पुलावरील झाडीमुळे पूलाचा अंदाज वाहन चालकांना येत नाही. असे असतानाही महामार्ग प्राधिकरणने त्याकडे दुर्लक्षच केल्याने अनेक वाहनांना यापूर्वी अपघात झाला आहे. याच अरूंद पूलाचा अंदाज न आल्याने या वाळूवाहू ट्रकला अपघात झाला. त्यात तो २० फूट खाली कोसळला, चाके वर आणि हौदाखाली अशा स्थितीत कोसळला . यात ट्रकची चाकेही निखळून पडली. सुदैवाने ट्रक चालक बचावला. त्याला किरकोळ दुखापत झाली. ट्रक कोल्हापूरचा असून चालक कणकवली नजीक एका गावातील आहे. मात्र, या अपघाताची नोंद सोमवारी सायंकाळी उशिरापर्यंत कणकवली पोलिस स्थानकात नव्हती.

Page 3 of 655