Thursday, Nov 23rd

Headlines:

सिंधुदुर्ग

उंटाने घेतला मालकाचाच चावा!

E-mail Print PDF
मालवण- तारकर्ली समुद्र किनारी गेले काही दिवस पर्यटकाना उंट सफर घडवणार्‍या व्यावसायिकाला त्यांच्याच एका उंटाने चावा घेतला. रविवारी दुपारी दोन उंटांचे लागलेले भांडण सोडवण्यास गेलेल्या लखन शिंदे (४५) हा गेला असता एका संतप्त उंटाने त्याच्या हाताचा जोरकस चावा घेतला.  यामुळे लखन शिंदे याच्या हाताला खोल जखम होवून स्नायू तुटले व मोठ्या प्रमाणात रक्तस्त्राव सुरू झाला. सहकार्‍यांनी लखन याला तातडीने मालवण ग्रामीण रुग्णालयात दाखल केले. वैद्यकीय अधिकारी डॉ. बालाजी पाटील यांनी तातडीने उपचार केले. लखन यांची प्रकृती स्थिर असून त्यांच्यावर उपचार सुरू आहेत. या अनोख्या चाव्याची चर्चा बंदर परिसर व शहरात सुरू होती.

कॉलेज युवतीची गळफास घेऊन आत्महत्या

E-mail Print PDF
मालवण - मालवण-गवंडीवाडा येथे राहणार्‍या प्राची रामदास चव्हाण (१९) या कॉलेज युवतीने रविवारी सकाळी ११.३० वाजण्याच्या सुमारास घराच्या वाशाला ओढणी बांधून गळफास लावून आत्महत्या केल्याची घटना घडली.
प्राची ही कुडाळ येथील संत राऊळ महाविद्यालयात माहिती तंत्रज्ञान शाखेत दुसर्‍या वर्षाला शिकत होती. परीक्षेच्या तणावामुळे तिने आत्महत्या केली असावी, असा कयास पोलिसांनी व्यक्त केला आहे. परीक्षा जवळ आल्याने रविवारी सकाळी ११  वा. च्या सुमारास ती घरातील एका खोलीत अभ्यासासाठी गेली. तिने खोलीचा दरवाजा आतून बंद करून घेतला. बराच वेळ झाला तरी प्राची बाहेर आली नाही म्हणून  आई तिला पाहण्यासाठी खोलीत गेली असता प्राची छपराच्या वाश्याला ओढणीने गळफास घेतलेल्या स्थितीत दिसली. तिला तत्काळ रुग्णालयात दाखल करण्यात आले. मात्र, उपचारापूर्वीच तिचे निधन झाले होते. प्राचीला अभ्यासाचे टेन्शन आल्याने तिने आत्महत्या केली, असे प्राचीच्या वडिलांनी  सांगितल्याची माहिती तपासीक अंमलदार विवेक नागरगोजे यांनी दिली आहे.

मालवणमधील समुद्रात दांडी बीच सी वॉटरपार्क पर्यटकांच्या सेवेला

E-mail Print PDF
मालवण - येथील समुद्राखालील अनोख्या विश्‍वाची भुरळ देशी, विदेशी पर्यटकांना पडली आहे. स्कूबा, स्नॉर्कलिंगचा आनंद लुटण्यास येणार्‍या पर्यटकांना तसेच बच्चे कंपनीला पर्यटनाचा वेगळा आनंद लुटता यावा, यासाठी बेरोजगार, स्थानिक मच्छीमार, पर्यटन व्यावसायिक अशा चाळीस जणांनी या महिन्यात एकत्र येत सुमारे ३५ ते ४० लाख रुपयांची गुंतवणूक करून समुद्रात दांडी बीच सी वॉटरपार्क हा प्रकल्प साकारला आहे.
पर्यटन जिल्ह्यात शासनाकडून वेगळे उपक्रम राबविणे गरजेचे असताना शासनाची कोणतीही मदत न घेता स्थानिकांनी कोकण किनारपट्टीवरील हा पहिला सहकार तत्त्वावरील प्रकल्प प्रत्यक्षात साकारताना वेगळा आदर्श घालून दिला आहे. या महिन्याच्या अखेरीस हा प्रकल्प पर्यटकांच्या सेवेत दाखल होणार आहे.
जागतिक पर्यटनस्थळांच्या ठिकाणी अशाप्रकारचे वॉटरपार्क प्रकल्प समुद्रात उभारले जातात. बच्चे कंपनीसह पर्यटकांची मोठी गर्दी याठिकाणी असते. येथे दाखल होणार्‍या पर्यटकांना नावीन्यता देण्यासाठी स्थानिक पर्यटन व्यावसायिकांनी एकत्र येत या पर्यटन प्रकल्पाची उभारणी केली आहे. स्थानिक मच्छीमारांना व अन्य वॉटर स्पोर्टस व्यावसायिकांना कोणताही त्रास न होता येथे आलेल्या पर्यटकांच्या सुरक्षेला प्राधान्य देत या प्रकल्पाची जागा निश्‍चित करण्यात आली आहे.
बंदर विभागालाही याबाबत पत्र देण्यात आले असून, सर्व प्रकारच्या परवानगीची पूर्तता करून या वॉटरपार्क प्रकल्पाचा शुभारंभ करण्याचा मानसही आज दांडी येथील दांडेश्वर मंदिर येथे झालेल्या व्यावसायिकांच्या बैठकीत घेण्यात आला.
वॉटरपार्क प्रकल्पात पर्यटकांच्या सुरक्षेसाठी लाइफ जॅकेटसह अन्य सर्व सुरक्षेच्या उपाययोजना असणार आहेत. जीवरक्षकांची नियुक्तीही केली जाणार आहे. येथे आलेल्या पर्यटकाला सुरक्षितरीत्या पर्यटनाचा आनंद घेता यावा, यासाठी कोणतीही कमी ठेवली जाणार नाही. अगदी माफक दरात जास्त सुरक्षा व जास्त पर्यटन आनंद ही संकल्पना राबविली जाणार आहे.
कोणत्याही प्रकारे मासेमारी व्यावसायिकांना या वॉटरपार्कचा अडसर होणार नाही. या हेतूने अगदी किल्ले सिंधुदुर्गच्या समोरच केवळ काही फूट कामात या वॉटरपार्कची उभारणी सुरू आहे. उभारणी दरम्यान अनेक पर्यटक वॉटरपार्कमध्ये प्रवेशाची मागणी करत आहेत. मात्र, लवकरच उभारणी पूर्ण झाल्यावर पर्यटकांना प्रवेश दिला जाईल, असे व्यावसायिकांच्या वतीने स्पष्ट करण्यात आले.

सर्जेकोट समुद्रात हायस्पीड ट्रॉलर पकडला

E-mail Print PDF
मालवण - सर्जेकोट बंदरापासून अकरा वाव खोल समुद्रात अनधिकृत मासेमारी करणारा मलपी कर्नाटक येथील एक हायस्पीड ट्रॉलर सागरी व मालवण पोलिसांनी सागरी गस्तीदरम्यान ताब्यात घेतला. हायस्पीड नौकेत बांगडा, बळा, म्हाकुल, सौंदाळा, दोडी आदी प्रकारची २७ क्रेट मासळी सापडली. पोलीस व मत्स्य विभागाच्या अधिकाऱयांनी पंचनामा केला असून कारवाईचा प्रस्ताव शुक्रवारी तहसीलदारांकडे सादर करण्यात येणार आहे. दरम्यान, देवगड पाठोपाठ मालवण येथील सागरी पोलिसांनी गस्ती दरम्यान अनधिकृत मासेमारी करणाऱया नौकेला जेरबंद केल्याने स्थानिक मच्छीमारांनी पोलिसांचे थेट पकडलेल्या नौकेवर जाऊन अभिनंदन केले.
सर्जेकोट समुद्रात हायस्पीड नौकेला अनधिकृत मासेमारी करताना सागरी पोलिसांच्या ‘सिंधुदुर्ग ५’ या गस्ती नौकेने पकडले. त्यानंतर मालवण बंदरात आणून पोलीस व मत्स्य विभागाच्या अधिकाऱयांनी पंचनामा केला. कर्नाटक येथील गणेश पालन यांच्या मालकीची ‘कस्तुरी फिशर्स बाबा’ (केए ०२ एमएम ४७३४) ही नौका पकडण्यात आली. बोट पकडल्याची माहिती सागरी पोलीस उपनिरीक्षक अनिल साठे यांनी मालवण पोलीस निरीक्षक अरविंद बोडके व मत्स्य विभागाला दिली. त्यानंतर नौका मालवण बंदरात आणून पोलीस व मत्स्य विभागाच्या अधिकाऱयांनी पंचनामा केला. सागरी पोलीस उपनिरीक्षक अनिल साठे, विलास तोरसकर, सोमनाथ पवार, ए. जी. ढोलये, जवूर शिरगावकर, हरिश्चंद्र जायभाय, संदीप सरकुंडे आदींच्या पथकाने कारवाई केली. मालवण पोलीस ठाण्याचे पोलीस उपनिरीक्षक दशरथ चव्हाण, विल्सन डिसोझा, आशिष भाबल, भाऊ नाटेकर तसेच मत्स्य विभागाचे परवाना अधिकारी श्रीकांत वारुंजीकर यांनी पंचनामा केला.

डंपर उलटून पाचजण जखमी

E-mail Print PDF
मालवण- आचरा मार्गावर भरधाव वेगाने जाणारा डंपर ओझर हायस्कूलजवळील रस्त्यावर उलटून झालेल्या अपघातात डंपरमधील पाच कामगार जखमी झाल्याची घटना गुरुवारी सकाळी आठ वाजण्याच्या सुमारास घडली. जखमींवर ग्रामीण रुग्णालयात प्राथमिक उपचार केल्यावर कुडाळ येथे हलविण्यात आले.
उत्तर प्रदेशमधील १४ वाळू कामगारांना घेऊन हा डंपर देवली येथून हडी येथे जात होता. वेगात असलेला हा डंपर ओझर येथे आला असता चालकाचा ताबा सुटून उलटला. यात डंपरच्या हौद्यातील आणि केबीनमधील कामगार बाहेर फेकले गेले. यामध्ये सुरेश यादव, लव यादव, परमजीत राय, रविशंकर, राम प्रसाद, शाम विहारी, रमेश पटेल, रमेश यादव, राजमिंदर राम, सुग्रीम राम यांचा समावेश होता. जखमींना स्थानिक ग्रामस्थांनी तात्काळ ग्रामीण रुग्णालयात हलविले.
अपघातानंतर रुग्णवाहिकेशी संपर्क होऊ न शकल्याने डंपर मालकाने कोळंब येथील रिक्षा व्यावसायिक गोपाळ शेलटकर यांच्याकडे सहकार्य मागितले. शेलटकर यांनी तात्काळ आपली रिक्षा घटनास्थळी नेऊन जखमींना रिक्षामधून ग्रामीण रुग्णालयात आणले. अन्य जखमींना मार्गावरून जाणाऱया रिक्षा टेम्पोतून उपचारासाठी हलविण्यात आले. अपघातानंतर काही तासांनंतर रुग्णवाहिका घटनास्थळी दाखल झाली.
सुग्रीम राम याचा उजवा कान फाटला आहे, तर अन्य चौघांनाही दुखापत झाली. या मार्गावरून आचरा पोलीस स्टेशनला डयुटीवर जाणाऱया कृष्णा परुळेकर आणि सुनील चव्हाण यांनी जखमींना उपचारासाठी हलविण्यासाठी सहकार्य केले. हा डंपर भरधाव वेगाने जात होता. या मार्गावरून आडवली येथे जात असलेल्या महिला पशुवैद्यकीय अधिकारी मिताली कवटकर सुदैवाने बचावल्या.

Page 1 of 668

  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »