Monday, Sep 25th

Headlines:

रत्नागिरी

उच्च न्यायालयातील याचिका मागे घेण्यासाठी मुख्याध्यापकांवर दबाव

E-mail Print PDF
चिपळूण (प्रतिनिधी) - जिल्ह्यातील ३०३ मुख्याध्यापकांचे वेतन गेले सात महिने रोखण्यात आले आहे. या प्रकरणी जिल्ह्यातील मुख्याध्यापकांनी उच्च न्यायालयात याचिका दाखल केली आहे. या मुद्यावरून शिक्षण विभाग अडचणीत आला आहे. उच्च न्यायालयात आणखी नामुष्की होऊ नये, यासाठी शिक्षण विभागाकडून या मुख्याध्यापकांवर याचिका मागे घेण्यासाठी दबाव टाकला जात आहे.
मार्च ते सप्टेंबरअखेरपर्यंत मुख्याध्यापकांचे वेतन रोखण्यात आले आहे. शिक्षण हक्क कायद्यानुसार, पटसंख्या कमी झालेल्या शाळांमध्ये मुख्याध्यापकपद रद्द करून त्या ठिकाणी उपशिक्षक नेमण्याचा निर्णय झाला. तसे पत्र शिक्षण विभागाने संबंधित मुख्याध्यापकांना दिले. ही पदावनती करताना त्यांच्या बदल्यांचा देखील प्रस्ताव आला. अतिरिक्त ठरणारे हे मुख्याध्यापक शिक्षण विभागाच्या व्याख्येत ‘ऑफलाईन’ म्हणून संबोधले गेले. या नंतर या शिक्षकांसमोर प्रश्‍न निर्माण झाला.
संबंधित मुख्याध्यापक या निर्णयाविरोधात उच्च न्यायालयात गेले. या याचिकेवर न्यायालयात दोनवेळा सुनावणी झाली. यावेळी न्यायालयाने वेतन कायद्यानुसार मुख्याध्यापकांचा पगार रोखता येत नाही, असे स्पष्ट केले. दुसरी बाजू लक्षात घेतल्यास संबंधित मुख्याध्यापक त्या-त्या शाळांमध्ये कार्यरत आहेत. त्यांचे दैनंदिन कामकाज सुरू आहे. असे असताना देखील जि. प. शिक्षण विभागाने हे वेतन रोखले आहे.
मुख्याध्यापक आणि जि. प.चा शिक्षण विभाग यांच्यातील हा वाद आता न्यायप्रवीष्ठ असल्याने कोणताच तोडगा निघालेला नाही. दरम्यान, संबंधित मुख्याध्यापकांनी उच्च न्यायालयातील ही याचिका मागे घ्यावी यासाठी दबाव टाकण्यात येत आहे. न्यायालयातील याचिका मागे घेतल्यानंतर रोखलेले वेतन करण्यात येईल, असाही प्रस्ताव या मुख्याध्यापकांसमोर ठेवण्यात येत आहे.

‘ग्रीन’ रिफायनरी सांगून जनतेची फसवणूक!

E-mail Print PDF
राजापूर ः जगातील कुठलीही रिफायनरी हरीत नसते. त्यामुळे राजापूर तालुक्यातील नाणार परिसरातील १४ गावांमध्ये होऊ घातलेली रिफायनरी ‘ग्रीन’ असूच शकत नाही. किंबहुना शासन ‘ग्रीन’ हा शब्द वापरून येथील भोळयाभाबडया जनतेच्या डोळयात धूळफेक करत असल्याचा आरोप रिफायनरी प्रकल्पाचे दुष्परिणाम सांगण्यासाठी आलेल्या अभ्यासकांनी केला. यावेळी त्यांनी नाणार येथील प्रस्तावित रिफायनरी प्रकल्पामुळे होणा़र्‍या गंभीर परिणामांची जाणीव ‘स्लाईड शो’द्वारे करून दिली.
राजापूर तालुक्यातील नाणारसह परिसरातील १४ गावांमध्ये होऊ घातलेल्या रिफायनरी प्रकल्पाला सध्या जोरदार विरोध केला जात आहे. गावागावात रिफायनरी विरोधात बैठकांवर बैठका आयोजित केल्या जात असून जनजागृती करण्याचे काम सुरू आहे. त्या पार्श्वभूमीवर राजापुरात कोकण विनाशकारी रिफायनरी संघर्ष समितीच्यावतीने रिफायनरीपासून होणार्‍या दुष्परिणामांची माहिती देण्यासाठी एका ‘स्लाईड शो’चे आयोजन केले होते. त्यामध्ये या प्रकल्पामुळे भविष्यात कसे दुष्परिणाम होतील, त्याची माहिती दिली.
यावेळी सर्वस्वी राजेंद्र फातर्पेकर, सचिन चव्हाण, मंगेश चव्हाण, डॉ. मंगेश सावंत, योगेश कांबळे, ओमकार देसाई यांसह अनेकजण उपस्थित होते. यावेळी देशात असलेली मुंबईच्या माहुलसह, मथुरा, मेंगलोर आदी ठिकाणच्या रिफायनरीचे कसे दुष्परिणाम झाले आहेत, याची माहिती दिली. यमुना नदीजवळील तसे जगप्रसिद्ध ताजमहलानजीक असलेल्या रिफायनरीमुळे कसे वाईट परिणाम झाले आहेत, त्याची माहितीही देण्यात आली.
या रिफायनरी प्रकल्पातून ६ कोटी मेट्रीक टनाची रिफायनरी होणार असून प्रती वर्षाला १ कोटी मेट्रीक टन कार्बन डाय ऑक्साईड, ५५०० मेट्रीक टन सल्फर डाय ऑक्साइड व ७२२७० मेट्रीक टन नायट्रोजन ऑक्साईडचे उत्सर्जन होणार आहे. त्याचा वायु, पाणी व जमीन यावर विपरित परिणाम होणार आहे. यामध्ये मानवी जीवन, बागायती, मासेमारी धोक्यात येतील, अशी भीती व्यक्त करण्यात आली. या प्रकल्पातील तेलाची पाईपलाईन समुद्रातून जाणार असल्याने त्यातील होणाऱया तेल गळतीमुळे समुद्रकिनारे प्रदुषित होतील, अशीही माहिती देण्यात आली. मात्र आमचे मुख्यमंत्री या प्रकल्पातून शुन्य प्रदूषण होणार असल्याचे खोटे सांगत असल्याचा आरोप करण्यात आला. मुळात नाणार परिसरातील जी जमीन अधिग्रहित केली आहे, ती एम.आय.डी.सी.च्या नावाने त्यासाठी बजावण्यात आलेल्या ३२/२ नोटीसमध्ये रिफायनरी प्रकल्पासाठी असा उल्लेखच नाही, असा दावा करण्यात आला.

उपनगराध्यक्ष पदासाठी शिवसेनेत रस्सीखेच

E-mail Print PDF
रत्नागिरी ः राजेश सावंत यांच्या राजीनाम्यामुळे रिक्त झालेल्या उपनगराध्यक्ष पदासाठी शिवसेनेत जोरदार रस्सीखेच सुरू झाली आहे. सदरचे पद आपल्यालाच मिळावे यासाठी ज्येष्ठ, कनिष्ठ नगरसेवकांनी सेना नेत्यांशी संपर्क साधण्यास सुरूवात केली आहे.
नगर पालिकेच्या सार्वत्रिक निवडणुकीत प्रभाग क्र ३ ब मधून शिवसेनेच्या तिकिटावर निवडून आलेल्या राजेश सावंत यांना पहिल्या वर्षासाठी उपनगराध्यक्ष पदासाठी संधी देण्यात आली होती. हक्काचे उपनगराध्यक्षपद मिळाल्यानंतर सावंत यांनी त्यासोबत आरोग्य, स्वच्छता समिती सभापतीपदाची मागणी स्थानिक सेना पदाधिकार्‍यांकडे केली होती. ह मागणी नाकारून सावंत यांच्याकडे उपनगराध्यक्षासह शिक्षण, क्रीडा, सांस्कृतिक समितीचे सभापती पद देण्यात आले होते.

३३ हजार शेतकर्‍यांनी केली ऑनलाईन नोंदणी

E-mail Print PDF
रत्नागिरी ः राज्य सरकारने कर्जमाफीची घोषणा केल्यानंतर थकीत कर्जदार शेतकर्‍यांना ऑनलाईन नोंदणी बंधनकारक करण्यात आली होती. शुक्रवारी ऑनलाईन नोंदणीचा अखेरच्या दिवशी ३३ हजार शेतकर्‍यांनी ऑनलाईन नोंदणी केली आहे. तर सुमारे २९ हजार शेतकर्‍यांनी नोंदणी न केल्याने ते या कर्जमाफीच्या सवलतीपासून वंचित राहण्याची शक्यता आहे.

गुहागरचे माजी सभापती नंदू पवार यांचे निधन

E-mail Print PDF
गुहागर ः माजी जिल्हा परिषद सदस्य व गुहागर पंचायत समिती सभापती नंदकिशोर उर्फ नंदू राजाराम पवार यांचे शनिवारी सकाळी ११.४५ वाजता चिपळुणातील निवासस्थानी दीर्घ आजाराने निधन झाले. ते ६५ वर्षांचे होते.
पवार हे मुळचे तालुक्यातील पवारसाखरी येथील आहेत. मात्र व्यवसायानिमित्त ते चिपळूण येथे स्थायिक झाले. राष्ट्रवादीचे खंदे नेतृत्व म्हणून त्यांची ओळख होती. १९९७मध्ये ते अडूर जिल्हा परिषद गटातून राष्ट्रवादीकडून निवडून आले होते. तालुक्यावर भाजप-सेनेचे वर्चस्व असताना तालुक्यात राष्ट्रवादी पक्ष वाढवण्यासाठी युवावर्गाची संघटनात्मक बांधणी त्यांनी केली होती. परिणामी २००२च्या पंचायत समिती निवडणुकीत सदस्य म्हणून ते निवडून आले. पंचायत समितीवर राष्ट्रवादी ५, तर भाजप-शिवसेना ५ असे संख्याबळ असताना शिवसेनेच्या सदस्याला बरोबर घेऊन त्यांनी पंचायत समितीचे सभापतीपद भूषवले. युतीमधील एक मत फोडण्याची किमया त्यांनी करून दाखवली होती. पंचायत समितीवर ते सलग पाच वर्षे सभापतीपदी कार्यरत होते. प्रशासनाची उत्तम जाण असलेले तसेच युवावर्गाला संघटीत करण्याची कला असल्याने तालुक्यात त्यांनी राष्ट्रवादी वाढवण्याचा प्रयत्न केला. पंचायत समिती सभापती असताना अनेक विकासकामे मार्गी लावत त्यांनी सभापती कसा असावा, याची जाणिव सर्वच पक्षांना करून दिली होती. पंचायत समितीचा कारभार अधिक गतीमान करण्यामध्ये त्यांचा मोलाचा हात आहे.

Page 2 of 3147