Saturday, Sep 23rd

Headlines:

रत्नागिरी

चिरेखाणीत बुडून प्रौढाचा मृत्यू

E-mail Print PDF
देवरुख (प्रतिनिधी) - देवरूख नजीकच्या ओझरे खुर्द बौध्दवाडी येथील अनंत कदम (५०) यांचा खाणीत बुडून मृत्यू झाल्याची घटना शुक्रवारी सकाळी १२ वा. च्या सुमारास घडली. गुरे चारण्यासाठी गेले असता ही दुर्घटना घडली.
देवरूख पोलिस ठाण्यातून मिळालेल्या माहितीनुसार कदम हे नेहमीप्रमाणे शुक्रवारी सकाळी गुरे चरवण्यासाठी घेवून गेले होते. कदम हे गुरे चारुन नेहमी ११ वा. सुमारास सुमारास गुरांना परत घेवून येत असत.  शुक्रवारी दुपारपर्यंत कदम हे परत न आल्यामुळे त्यांचा शोध नातेवाईकांनी सुरू केला असता ओझरे खुर्द येथील पडिक चिर्‍याच्या खाणीत  त्यांचा मृतदेह आढळून आला.
ग्रामस्थांनी कदम यांचा मृतदेह खाणीतून बाहेर काढून देवरूख ग्रामीण रूग्णालयात आणला. या  घटनेबाबत देवरूख पोलिसांनी पंचनामा केला. घटनास्थळी ग्रामस्थांमधून कदम यांचा  मृत्यू संशयास्पद असल्याची चर्चा सुरु होती. या पार्श्‍वभूमीवर पोलिस तपास करीत आहेत.
या घटनेबाबत आकस्मिक मृत्यू  म्हणून देवरूख पोलिस ठाण्यात नोंद करण्यात आली आहे. अधिक तपास हे. कॉ. प्रशांत शिंदे व राजेंद्र जाधव करत आहेत.

मांदिवली बाजारपेठेतून ९ हजाराचा मद्यसाठा जप्त

E-mail Print PDF
दापोली (प्रतिनिधी) - मांदिवली येथे सोमवारी स्थानिक गुन्हे अन्वेषण पथकाने बेकायदा मद्यविक्री करणार्‍यांविरोधात धडक कारवाई करत ९ हजार रुपयांचा मद्यसाठा जप्त केला आहे.
रत्नागिरी येथून आलेल्या पथकाने सोमवारी सायंकाळी साडेसात वाजता मांदिवली बाजारपेठेत हे छापे टाकले. यावेळी नवल वेदपाठक यांच्याकडून २ हजार रुपयांचा, तर रामचंद्र जालगावकर यांच्याकडून ७ हजार रुपयांचा मद्यसाठा जप्त करण्यात आला आहे. गुन्हा अन्वेषण शाखेचे उदय वाजे व राकेश बागूल यांच्या नेतृत्वाखाली ही मोहीम आखण्यात आली होती.

चिपळूण- कराड रेल्वेमार्गासाठी नवा प्रस्ताव रेल्वे बोर्डाला सादर

E-mail Print PDF
चिपळूण (प्रतिनिधी) - चिपळूण-कराड या महत्त्वाकांक्षी रेल्वे मार्ग निर्मिती भागीदारीतून शापूरजी पालनजी कंपनीने अंग काढल्याने या प्रकल्पाचे भवितव्य अंधारमय झालेले असतानाच कोकण व पश्‍चिम महाराष्ट्राच्या जोडणार्‌या या जीवनवाहिनीचा प्रवास सुखकर करण्यासाठी आता रेल्वे मंत्रालयाने पुढाकार घेतला आहे. कोणाचेही सहकार्य होवो अथवा न होवो मात्र रेल्वे मंत्रालयाकडून हा प्रकल्प पूर्ण करू, असा निर्धार व्यक्त करून या प्रकल्पाचा नवा प्रस्ताव रेल्वे बोर्डाला सादर करण्यात आला आहे. याबाबत लवकरच घोषणा होणार आहे.
पृथ्वीराज चव्हाण मुख्यमंत्री असताना कोकण व पश्‍चिम महाराष्ट्र जोडण्यासाठी त्यांनी विशेष प्रयत्न केले. त्यावेळी राज्य शासनाकडून १०० कोटींची तरतूद करून या प्रकल्पाचा मार्ग सुकर केला. या प्रकल्पासाठी सर्व्हेक्षण पूर्ण झाले आहे. १०३ कि.मी.चा हा रेल्वेमार्ग खासगी भागीदारीतून पूर्ण करण्याच्या करारावर सह्या झाल्या. त्यानंतर या प्रकल्पाचे काम प्रसिद्ध अशा शापूरजी पालनजी या कंपनीला मिळाले. त्यामुळे हा प्रकल्प आता मार्गी लागेल, असा विश्‍वास वाटत असतानाच या कंपनीने काही दिवसांपूर्वी आपले अंग काढून घेतले.
कंपनीने प्रकल्पातून अंग काढून घेतल्याने हा महत्त्वाकांक्षी प्रकल्प अडचणीत येणार, असे वाटू लागले. त्यानंतर रेल्वे मंत्रालय, राज्य सरकार यांच्या सहकार्याने हा प्रकल्प होईल, अशी अपेक्षा असतानाच राज्य सरकारही या प्रकल्पामध्ये भागीदार राहणार नसल्याचे स्पष्ट झाले आहे. सुरेश प्रभू रेल्वेमंत्री असताना मुहूर्तमेढ रोवला गेलेला हा प्रकल्प गेले काही दिवस अंधारात चाचपडत होता. मात्र, रेल्वे मंत्रालयाने पुढाकार घेतल्याने या प्रकल्पाचा मार्ग आता सुकर झाला आहे. रेल्वे मंत्रालयाने खासगी भागीदारीशिवाय हा प्रकल्प पूर्ण करण्याचा संकल्प केला असून तसा प्रस्ताव रेल्वे बोर्डाकडे पाठवला असल्याचे रेल्वे मंत्रालयाकडून सांगण्यात येत आहे.

शिवसेनेतील नाराज राजेश सावंत, गजानन पाटील भाजपच्या वाटेवर?

E-mail Print PDF
रत्नागिरी (प्रतिनिधी) - आमदार उदय सामंत यांचे कट्टर समर्थक असलेले राजेश सावंत आणि गजानन पाटील हे दोघे नाराज असल्याचे उघड झाले आहे. लवकरच ते त्यांच्या समर्थकांसह भाजप प्रवेश करणार असल्याची खात्रीलायक वृत्त आहे. त्यामुळे हे दोघे काय भूमिका स्पष्ट करतात, याकडे राजकीय वर्तुळाचे लक्ष लागले आहे.
सावंत आणि पाटील हे आ. उदय सामंत यांचे कट्टर समर्थक असल्याने जेथे आ. सामंत तेथे ते असतातच! आ. सामंत यांनी राष्ट्रवादीतून पहिली निवडणूक लढविली, त्यावेळेपासून अगदी आ. सामंत शिवसेनेत आल्यापर्यंत, अगदी काल-परवा पर्यंत हे दोघे आ. सामंत समर्थक म्हणून सर्वपरिचित आहेत. मात्र, सेनेतील अंतर्गत राजकारणाचे बळी ठरले आहेत. त्यांच्याविरुद्ध काहींनी कट-कारस्थान रचून वरिष्ठांपुढे त्यांना पुरते गद्दार ठरविले. जिथे विश्वास नाही, तिथे काम कसे करायचे म्हणून टोकाची भूमिका त्यांनी घेतल्याचे समजते. सावंत आणि पाटील यांच्या या निर्णयाने सेनेला हादरा बसणार हे निश्चित. अगदी भाजप प्रवेश त्यांनी केला तर राजेश सावंत  आणि गजानन पाटील यांना मानणारा एक गट संपूर्ण मतदारसंघात कार्यरत आहे.
गजानन पाटील यांच्या पाठिशी ग्रामीण भागात मोठा वर्ग आहे तर राजेश सावंत यांच्या पाठिशी संपूर्ण शहरासह ग्रामीण भागात कार्यकर्ते आहेत. त्यामुळे या दोघांनी त्यांच्या समर्थकांसह शिवसेनेला ‘जय महाराष्ट्र’ केले आणि भाजपमध्ये प्रवेश केला तर भाजपला ‘अच्छे दिन’ येणार हे निश्‍चित. शिवसेनेचे उपजिल्हाप्रमुख आणि विद्यमान उपनगराध्यक्ष राजेश सावंत स्पष्टवक्ते आहेत. त्यामुळे काहींना त्यांचे बोलणे खटकते; परंतु माणसे जोडण्याचे कसब त्यांच्याकडे आहे.नगरपरिषदेत नगराध्यक्षांच्या केबिनपेक्षा त्यांच्या केबिनमध्येच लोकांची गर्दी पहावयास मिळते. कारण त्यांनी एखादा विषय मनावर घेतला की तो तडीस नेण्याचा त्यांचा स्वभाव आणि हातोटी आहे. त्यामुळे सावंत हे भावी नगराध्यक्ष तर सोडाच परंतु भाजप प्रवेश केला तर आमदारकीचेही उमेदवार असू शकतात, असा कयास बांधला जात आहे.

भाट्येतील वृध्दाच्या अकाउंटमधून १ लाख १८ हजार लंपास

E-mail Print PDF
रत्नागिरी (प्रतिनिधी) - बँक  अधिकारी बोलत आहे असे सांगत वृद्धाकडून एटीएमचा १६ अंकी नंबर तसेच आधार कार्ड नंबर घेऊन सुमारे १ लाख १८ हजार ९९८ रुपयांचा चुना लावणार्‍या अज्ञाताविरुद्ध शहर पोलिस ठाण्यात गुन्हा दाखल करण्यात आला आहे. ही घटना बुधवार १३ सप्टेंबर रोजी सकाळी १० वा. सुमारास घडली. मिळालेल्या माहितीनुसार, बशीर अली महंमद साखरकर (५६, रा. भाट्ये नवानगर, रत्नागिरी) यांनी याबाबत शहर पोलिसांकडे तक्रार दिली आहे.
त्यानुसार बुधवार १३ सप्टेंबर रोजी सकाळी १० वा. सुमारास साखरकर यांच्या मोबाईलवर एक फोन कॉल आला. बोलणार्‌याने मी बँकेतून अधिकारी बोलत असून तुमच्या एटीएमची मुदत संपत आली आहे, असे सांगितले. त्याची मुदत वाढवण्यासाठी तुम्ही मला  तुमच्या एटीएमचा १६ अंकी नंबर आणि आधारकार्डचा नंबर मला द्या, असे सांगितले.
त्याच्या बोलण्यावर विश्‍वास ठेवून बशीर साखरकर यांनी दोन्ही नंबर फोन करणार्‍या तोतया अधिकार्‍यास दिले. त्यानंतर काही वेळाने साखरकर यांच्या मोबाईलवर त्यांच्या बँक खात्यातून सुमारे १ लाख १८ हजार ९९८ रुपयांची ऑनलाईन खरेदी केल्याचे मेसेज आले. त्यानंतर आपली फसवणूक झाल्याचे समजताच साखरकर यांनी तातडीने शहर पोलिसांकडे धाव घेत तक्रार दिली. अधिक तपास शहर पोलिस करत आहेत.

Page 10 of 3144