Wednesday, Feb 21st

Headlines:

रत्नागिरी

मुंबई नर्सिंग कायद्याचे डॉ. पावसकर हॉस्पिटलकडून उल्लंघन

E-mail Print PDF
रत्नागिरी ः पत्रकार प्रणव पोळेकर यांची पत्नी ज्ञानदा यांना प्रसुतीनंतर सहाव्या दिवशी जीव गमवावा लागला. पावसकर हॉस्पीटलच्या निष्काळजीपणाची गंभीर दखल घेत जिल्हा शल्यचिकित्सक डॉ. देवकर यांनी दखल घेत नर्सिंग होम परवाना निलंबित केला आहे. दरम्यान यावेळी करण्यात आलेल्या तपासणीत हॉस्पिटलमध्ये अनेक त्रुटी व नियमभंग आढळून आल्याची माहिती डॉ. देवकर यांनी दिली.
ज्ञानदा प्रणव पोळेकर यांची सिझरद्वारे प्रसुती झाल्यानंतर डॉ. दिपा व डॉ. संजीव पावसकर कॉन्फरन्सच्या निमित्ताने बाहेर गेले होते. हॉस्पीटलमध्ये एकही डॉक्टर नसताना परिचारिकांनी रूग्णांना ऍडमिट करून घेणे हा मोठा गुन्हा आहे. ज्ञानदा यांना शुक्रवारी डिस्चार्ज देण्यात आला, मात्र शनिवारी पुन्हा त्रास होवू लागल्याने पावसकर हॉस्पिटलमध्ये दाखल करण्यात आले. हॉस्पीटलमध्ये डॉक्टर नसल्याची कल्पना न देताच नर्सिंग स्टाफने त्यांना दाखल करून घेतले. जेव्हा ज्ञानदा यांची प्रकृती अतिशय नाजूक झाली तेव्हा नातेवाईकांनीच पुढाकाराने दुसरीकडे हलविण्याचा निर्णय घेतला.
हॉस्पिटलच्या हलगर्जीपणामुळे ज्ञानदा यांचा नाहक बळी गेला. आमदार उदय सामंत आणि राजन साळवी यांनी ज्ञानदा यांची उपचाराची फाईल नर्सकडे मागितले असता फाईल डॉक्टरांच्या कपाटात असल्याचे सांगितले. मात्र ऍडमिट करताना डॉक्टर पुण्याला होते मग फाईल त्यांच्या कपाटात कशी? असा संतप्त सवाल आमदारांनी विचारला असता एक कागद परिचारीकेच्या घरात सापडला. एकंदरीत आपला निष्काळजीपणा बाहेर पडू नये यासाठी डॉ. पावसकर यांनी फोनाफोनी करून परिचारिकांना मॅनेज केले होते हेदेखील सिध्द झाले आहे.
सोमवारी रत्नागिरीतील सर्व पत्रकारांनी पुन्हा जिल्हा शल्यचिकित्सक डॉ. देवकर यांची भेट घेवून कारवाईसंदर्भात माहिती घेतली. यावेळी डॉ. देवकर यांनी हॉस्पीटलमध्ये अनेक अनधिकृत बाबी आढळल्याचे सांगितले. एका विवाहितेचा केवळ हलगर्जीपणामुळे नाहक बळी गेल्याचे प्राथमिक अहवालात स्पष्ट झाले असले तरी मॅटर्निटी डेथ रेव्हयू कमिटी मार्फत दोन दिवसात याबाबत सखोल चौकशी करण्यात येईल असे डॉ. देवकर यांनी सांगितले.

भोस्ते-जगबुडी पूल खचल्याच्या अफवेने घबराट

E-mail Print PDF
खेड ः मुंबई-गोवा महामार्गासाठी पर्यायी मार्ग असलेला भोस्ते-जगबुडी पूल खचल्याच्या अफवेने सोमवारी नागरिकांमध्ये भीतीचे वातावरण पसरले. याबाबतची माहिती मिळताच विविध खात्यांचे अधिकारी व लोकप्रतिनिधींनी घटनास्थळी धाव घेतली. मात्र, पुलाच्या एका बाजूची तांब्याची पट्टी गायब होऊन काहीशी पोकळी निर्माण झाल्याचे लक्षात येताच यंत्रणांनी काहीसा निःश्वास टाकला. पुलाच्या एका टोकाला निर्माण झालेल्या पोकळीत तांब्याची पट्टी बसवण्याचे काम तातडीने हाती घेण्यात आले असून अवजड वाहनांना बंदी घालण्यात आली आहे. दरम्यान पुलाला कोणाताही धोका नसल्याचा निर्वाळा बांधकाम विभागाने दिला आहे.
महामार्गावर दुर्घटना घडल्यास भोस्ते-जगबुडी पुलाचा पर्यायी मार्ग म्हणून वापर केला जातो. कोंडिवली, शिव, आष्टी, वेरळ, भोस्ते आदी गावांसह अन्य गावांतील ग्रामस्थ याच पुलावरून शहरात बाजाररहाटसाठी येत असतात. याशिवाय वाहनांचीही याच पुलावरून सतत रेलचेल सुरू असते. विशेषतः रेल्वे स्थानकाकडे जाण्यासाठी या पुलाचा रिक्षा व्यावसायिक अधिक वापर करतात. सोमवारी नेहमीप्रमाणे या पुलावरून रिक्षा व्यावसायिकांची वर्दळ सुरू असतानाच पुलाच्या एका बाजूला पोकळी निर्माण झाल्याचे दृष्टीस पडले. ही बाब कर्णोपकर्णी होत पूल खचल्याची अफवा पसरली.
याबाबत माहिती मिळताच सार्वजनिक बांधकाम खात्याचे अधिकारी, जि. प. बांधकाम खात्याचे अधिकारी, पोलीस यंत्रणांसह अन्य यंत्रणा तातडीने घटनास्थळी दाखल झाल्या. आमदार संजय कदम यांनीही घटनास्थळी भेट देत अधिका़र्‍यांना सूचना केल्या. खबरदारीचा उपाय म्हणून सुरूवातीला काही वेळ पुलावरील वाहतूक बंद करण्यात आली. पुलाच्या एका बाजूला निर्माण झालेल्या पोकळीची संबंधित अधिकार्‍यांनी सखोल पहाणी केली असता या भागातील तांब्याची पट्टी गायब असल्याचे दृष्टीस पडले.
या घटनेच्या पार्श्वभूमीवर दोन्ही बाजूंना बॅरिगेटस् लावून एकेरी वाहतुकीचा अवलंब करण्यात आला. पोकळी निर्माण झालेल्या ठिकाणी तांब्याची पट्टी टाकण्याचे काम दुपारच्या सुमारास हाती घेण्यात आले. या मार्गावरून धावणार्‍या अवजड वाहनांना बंदी घालण्यात आली आहे. पुलास कोणत्याहीप्रकारचा धोका नसल्याचे स्पष्ट करत नागरिकांनी कुठल्याही अफवांवर विश्वास ठेवू नये, असे आवाहन बांधकाम खात्याने केले आहे.
हा पूल सार्वजनिक बांधकाम खात्याच्या अखत्यारित होता. मात्र त्यानंतर हा पूल जि. प. बांधकाम खात्याकडे हस्तांतरीत करण्यात आला आहे. या पुलाची उर्वरित प्रलंबित राहिलेली कामेही तातडीने हाती घेण्यात येणार असल्याचे येथील जि. प.चे बांधकाम उपअभियंता एम. बी. खेडेकर यांनी सांगितले.

१५०० रुपये डझन भावाने हापूस शहरात विक्रीला

E-mail Print PDF
रत्नागिरी ः रत्नागिरी शहरातील गोखलेनाका येथे आंबा विक्रेत्या सौ. लता भंडारे यांच्या स्टॉलवर हापूस आंबा विक्रीसाठी आला आहे. आंब्याचे दर १२०० ते १५०० रुपये डझन आहे. आठवड्याला आंबा बागायतदारांकडून त्यांच्याकडे ३ ते ४ पेट्या विक्रीसाठी येत आहेत.
गोखले नाका येथील आंबा विक्रेत्या सौ. लता भंडारे यांच्या स्टॉलवर कसोप, गोळप येथून हापूस आंबे विक्रीसाठी येत आहेत. हापूसबरोबर रायवळ कैरी, पायरी, आंबे विक्रीला आले आहेत. रायवळ कैरी १००, १२० रु. किलो आहे. पायरी आंबा ८००, ९००, १२०० रुपये डझन आहे.

हलगर्जीपणामुळे विवाहितेचा मृत्यू झाल्याचा गंभीर आरोप

E-mail Print PDF
रत्नागिरी ः प्रसुतीनंतर सहाव्या दिवशी महिलेवर मृत्यूची दुर्दैवी वेळ ओढवली. या प्रकरणात रत्नागिरीतील खासगी रूग्णालयाकडून हलगर्जीपणा झाल्याचा आरोप पोळेकर कुटुंबियांतर्फे करण्यात आला. जिल्हा शल्य चिकित्सकांनी या गंभीर प्रकाराची दखल घेऊन रूग्णालयाचा परवाना निलंबित करण्याचे आदेश दिले.
रत्नागिरी येथील इलेक्ट्रॉनिक मिडियाचे पत्रकार प्रणव पोळेकर यांच्या पत्नी ज्ञानदा पोळेकर (२६, सिध्दीविनायकनगर, रत्नागिरी) यांना प्रसुतीसाठी ५ फेब्रुवारी रोजी येथील शहरातील आरोग्य मंदिरच्या पावसकर हॉस्पीटलमध्ये दाखल करण्यात आले होते. यशस्वी शस्त्रकियेनंतर त्यांना कन्यारत्न प्राप्त झाले. यावेळी नवजात बाळाला श्वसनाचा त्रास होवू लागल्याने डॉ.सूर्यगंध यांच्या रूग्णालयातील अतिदक्षता विभागात ठेवण्यात आले होते. त्यानंतर २ दिवसांनी बाळाला पावसकर हॉस्पीटलमध्ये आणण्यात आले. ३ दिवसात त्यांना घरी जाण्याची परवानगीही देण्यात आली. मात्र त्यानंतर पाचवीच्या धार्मिक कार्यक्रमानंतर ज्ञानदा यांची प्रकृती बिघडली. त्यांना उलटी होवू लागली. त्यामुळे त्वरित पुन्हा पावसकर हॉस्पीटलला उपचारासाठी दाखल केले गेले.
यावेळी तेथील परिचारिकांनी प्राथमिक पाहणी करून फोनवरून डॉ.पावसकर यांच्याशी संपर्क साधून ज्ञानदाच्या परिस्थितीची माहिती दिली. पत्रकार प्रणव पोळेकर यांनी वारंवार परिचारिकांना गंभीर बाब आहे का? दुसरीकडे न्यावे लागेल का? अशी विचारणाही केली. मात्र घाबरण्यासारखे काही नाही, म्हणून धीर देण्यात  आला. याचवेळी हॉस्पीटलमध्ये दुस़र्‍या मातेच्या सिझरसाठी आलेल्या डॉ. करमरकर यांनीही तिची तपासणी करून औषधे दिली. रात्रभर ज्ञानदा यांना त्रास होत होता. डॉ. पावसकर यांच्या सूचनेप्रमाणे परकार हॉस्पीटलमधील वैद्यकीय अधिका़र्‍यांना पाचारण करण्यात आले. त्यांनी तपासल्यावर ज्ञानदा यांना पहाटे ५.४५ वा.च्या दरम्यान परकार हॉस्पीटलला अधिक उपचारासाठी हलवण्यात आले.
ज्ञानदा यांची तोपर्यंत तब्येत पूर्ण खालावली होती. परकार हॉस्पीटलने त्वरित अतिदक्षता विभागात दाखल करण्यात आले. व्हेंटीलेटर जोडण्यात आला. त्यांच्याकडून उपचारांना प्रतिसाद मिळत नव्हता आणि ज्ञानदा यांनी आपला प्राण सोडला. यावेळी परकार हॉस्पीटलच्या वैद्यकीय तज्ञांनी नातेवाईकांना सांगितले  की, ज्ञानदा यांना मृत्यूपूर्वी आकडी येवून गेली होती तसेच पायात रक्ताच्या गुठळया तयार झाल्या होत्या. त्या गुठळयांचा दाब हृदयापर्यंत वाढत गेल्यामुळे हृदयाचे कामकाज थांबले.
याची माहिती मिळताच खासदार विनायक राऊत, आमदार उदय सामंत, राजन साळवी यांनी या घटनेचे गांभिर्य ओळखून भविष्यात अशा घटनांना आळा बसावा, म्हणून प्रसारमाध्यम प्रतिनिधींसह पावसकर हॉस्पीटल प्रशासनाला धारेवर धरले. मात्र यावेळीही डॉ.पावसकर उपस्थित नव्हत्या. एका कॉन्फरन्सनिमित्त त्या बाहेर गेल्याची माहिती त्यांनी फोनवरून दिली.
जिल्हा शल्य चिकित्सक डॉ.प्रल्हाद देवकर यांची भेट आमदार उदय सामंत, आमदार राजन साळवी व इतर पदाधिकार्‍यांनी घेतली. यावेळी रत्नागिरीतील  पत्रकार मोठया संख्येने उपस्थित होते. यासंदर्भात आलेल्या आक्षेपांची गांभिर्याने दखल घेत डॉ.देवकर यांनी त्वरित पावसकर नर्सिंग होमचा परवाना निलंबित केला.  या प्रकरणाची सखोल चौकशी करण्याचा निर्णय जाहीर केला.

लोटेत विचित्र अपघातात ‘घरडा’चा कामगार ठार

E-mail Print PDF
लोटे ः खेड तालुक्यातील लोटे औद्योगिक वसाहतीतील घरडा कंपनीत लोखंडी प्लेटस् वाहून नेणारा टेम्पो कंपनीच्या गेटवर मागे घेत असताना कामगारांच्या दुचाकीला धडक बसली. या विचित्र अपघातात एका कामगाराचा मृत्यू झाला, तर अन्य तिघेजण जखमी झाल्याची घटना शनिवारी सायंकाळी ५.३० वाजता घडली.
स्वप्नील सुनील मांडवकर (२३, कोतवली) असे ठार झालेल्या कामगाराचे नाव आहे. चालक मंगेश राजाराम कांडेकर (४२, शेल्डी-पवारवाडी) हा आपल्या ताब्यातील टेम्पोमधील हौद्यामध्ये लोखंडी प्लेटस् लोड करून लोटे औद्योगिक वसाहतीतील घरडा कंपनीत नेत होता. या प्लेटस् हौद्यापासून ५ फूट बाहेर आल्या होत्या. टेम्पोचालक कंपनीच्या गेटवर आला असता घरडा कंपनीतून बाहेर पडणाऱया एका ट्रकला वाट करून देण्यासाठी टेम्पो रिव्हर्स घेतला. याचवेळी घरडा कंपनीतील काही कामगार कामाची पाळी संपवून दुचाकींवरून घराकडे चालले होते. टेम्पो मागे घेत असताना चालकाच्या बेजबाबदारपणामुळे व दुर्लक्षामुळे पाठीमागून येणाऱया स्वप्नील मांडवकर व गणेश शिंदे यांच्या दुचाकीला या प्लेटस्‌ची धडक बसली. त्यामुळे ते दुचाकीसह जमिनीवर कोसळले. त्यातच त्यांच्या पाठीमागच्या अशोक गजमल व आशिष बकवे (सोनगाव) यांचेही दुचाकीवरील नियंत्रण सुटून ते ही स्वप्नील मांडवकर यांच्या दुचाकीवर कोसळले.
या विचित्र तिहेरी अपघातात स्वप्नील यांच्या डोक्याला व छातीला गंभीर दुखापत झाली. तसेच गणेश शिंदे, अशोक गजमल व आशिष बकवे हे देखील जखमी झाले. चारही जखमी कामगारांना चिपळूण येथील लाईफ केअर रूग्णालयामध्ये दाखल करण्यात आले. मात्र स्वप्नील यांचा उपचारादरम्यान मृत्यू झाला, तर उर्वरित तिघा कामगारांना किरकोळ स्वरूपाच्या दुखापती झाल्या आहेत.

Page 10 of 3279