Wednesday, Feb 21st

Headlines:

रत्नागिरी

योग्य उपचार न झाल्यानेच ज्ञानदाचा मृत्यू!

E-mail Print PDF
रत्नागिरी ः ज्ञानदा प्रणव पोळेकर यांना वेळेत योग्य उपचार न मिळाल्याने रक्ताच्या गुठळया हृदयात अडकून त्यांची प्राणज्योत मावळली. शनिवारी रात्रीच अत्याधुनिक सोयीनीयुक्त आयसीयुमध्ये शिफ्ट केले असते तर ज्ञानदा यांचा जीव वाचला असता असा निष्कर्ष माता मृत्यू अन्वेषण समितीने काढला आहे. या सर्व प्रकारात हॉस्पीटलचा निष्काळजीपणाच दिसून आला आहे. ज्ञानदा यांना प्रचंड त्रास होत असताना केवळ डोकेदुखीची गोळी देण्यात आली, नेमके उपचार झालेच नाही अशी धक्कादायक माहितीही समितीच्या चौकशीत पुढे आल्याची माहिती जिल्हा शल्यचिकित्सक डॉ. प्रल्हाद देवकर यांनी दिली.
ज्ञानदा पोळेकर मृत्यूप्रकरणाच्या चौकशीसाठी जिल्हा रूग्णालयामार्फत माता मृत्यू अन्वेषण समिती स्थापन करण्यात आली आहे. डॉ. प्रल्हाद देवकर यांच्या अध्यक्षतेखालील या समितीत जिल्हा आरोग्य अधिकारी डॉ. अनिरूध्द आठल्ये, स्त्री रोग तज्ञ डॉ. सुभाष चव्हाण, डॉ. ढवळे, रक्त संक्रमण अधिकारी डॉ. पराग पाथरे, फॉरेन्सीक तज्ञ प्रकाश कुंबरे, डॉ. गिरीश करमरकर यांचा समावेश होता. या समितीची बुधवारी दुपारपर्यंत बैठक सुरू होती. अगदी छोटया-छेटया मुद्यासह विविध बाबींवर यावेळी चर्चा करण्यात आली. पावसकर हॉस्पीटलने वेळेत योग्य उपचार न केल्यानेच ज्ञानदा यांचा मृत्यू झाला, अत्याधुनिक आयसीयु असलेल्या अन्य हॉस्पीटलमध्ये हलवले असते तर त्यांचे प्राण निश्चितच वाचले असते असा निष्कर्ष समितीने आपल्या अहवालात नोंदवला आहे.
यामध्ये शनिवारी रात्री पावसकर हॉस्पीटलमध्ये दुसर्‍या रूग्णाच्या तपासणीसाठी गेलेल्या अन्य डॉक्टरनी डॉ. पावसकर यांच्याशी फोनवर चर्चा करून ज्ञानदा यांना केवळ डोकदुखीची गोळी दिली असल्याचे पुढे आले आहे. प्रसुती झाल्यानंतर ४२ दिवसापर्यंत बाळ आणि संबंधित मातेची पूर्ण जबाबदारी संबंधित हॉस्पीटलची असते, ही जबाबदारी पावसकर हॉस्पीटलने योग्य प्रकारे पार पाडली असल्याचेही अहवालात नमूद करण्यात आले आहे.
समितीचा हा अहवाल आरोग्य संचालकांना पाठविण्यात येणार असून यावर आता आरोग्य विभागच पुढील कारवाई करणार असल्याचे डॉ. देवकर यांनी सांगितले. समिती आपले म्हणणे आरोग्य विभागाकडे मांडणार आहे. कारवाई करण्याचे अधिकारी आरोग्य विभागाच्या वरिष्ठांना आहे असे त म्हणाले.
रत्नागिरीत गेल्या दोन महिन्यात खाजगी हॉस्पीटलमध्ये ६ माता मृत्यू प्रकरणे घडल्याची माहिती डॉ. देवकर यांनी दिली. प्रसुतीनंतर बाळ आणि माता यांच्या उपचराची जबाबदारी हॉस्पीटलची असते, ती टाळल्यास कायदेशीर कारवाई होऊ शकते असेही डॉ. देवकर यांनी सांगितले.

खेडमध्ये वरिष्ठ स्तर दिवाणी न्यायालयास मान्यता

E-mail Print PDF
खेड ः खेड येथे वरिष्ठ स्तर दिवाणी न्यायालय स्थापनेस मान्यता देण्याचा महत्वपूर्ण निर्णय बुधवारी झालेल्या मंत्रिमंडळाच्या बैठकीत घेण्यात आला. या निर्णयामुळे आता उत्तर रत्नागिरीतील ५ तालुक्यांमधील पक्षकारांचे न्यायालयीन कामकाज खेडमधील न्यायालयात होणार आहे. या न्यायालयात ५ लाखांच्या पुढील दावे चालवणे शक्य होणार असून पाचही तालुक्यातील जनतेच्या पैसा व वेळेची बचत होणार आहे. या न्यायालयासाठी राज्याचे पर्यावरणमंत्री रामदास कदम यांनी विशेष प्रयत्न केले.
गेली अनेक वर्षापासून येथे वरिष्ठ स्तर दिवाणी न्यायालय सुरू होण्यासाठी प्रयत्न सुरू होते. हे न्यायालय स्थापन करण्यास व त्यासाठीची आवश्यक पदे निर्माण करण्यास मंत्रिमंडळाने मान्यता दिला आहे. या निर्णयामुळे खेडसह दापोली, चिपळूण, मंडणगड, गुहागर या तालुक्यातील जनतेला आता रत्नागिरीत जाण्याची आवश्यकता भासणार नाही. ही कामे खेडमध्येच होणार असल्याने वेळ व पैसा यांची बचत होईल. घटस्फोट, मॅरेज पिटीशन आदी स्वरूपाची कामे देखील या वरिष्ठ स्तर दिवाणी न्यायालयात चालविण्यात येणार आहेत.
सध्या खेड येथे कनिष्ठ स्तर दिवाणी न्यायालय आहे. या न्यायालयात ५ लाख रूपये मर्यादेपर्यंतचे दिवाणी कामकाज चालते. आता त्यापुढील दावेही खेडमध्येच वरीष्ठ स्तर न्यायालयात चालवता येणार आहेत. या निर्णयाचे खेडमधील नागरिकांबरोबरच वकीलांकडूनही जोरदार स्वागत होत आहे.
खेडमध्ये वरिष्ठ स्तर दिवाणी न्यायालय स्थापनेचा निर्णय अतिशय स्वागतार्ह आहे. उत्तर रत्नागिरीतील खेड, दापोली, मंडणगड, गुहागर व चिपळूण या पाचही तालुक्यातील जनतेचा पैसा, वेळ व श्रमही वाचतील.

गुहागर किनार्‍यावरील जेटी बेकायदेशीरच

E-mail Print PDF
गुहागर ः गुहागर समुद्रकिना़र्‍यावर सुमारे ९६ लाख खर्च करून बांधण्यात आलेली जेटी राज्याच्या वनसंरक्षकांनी नियुक्त केलेल्या उच्चस्तरीय समितीने अवैध ठरविली आहे. सीआरझेड परवाना नसल्याने ही जेटी बेकायदेशीर ठरवताना जेटी हटवून किनारा पुर्ववत करण्याच्या सूचना आपल्या अहवालात दिल्या आहेत. बळवंत परचुरे यांनी हरित लवादाकडे दाखल केलेल्या दाव्याच्या पार्श्वभुमीवर हा निर्णय झाला आहे. दरम्यान, या अहवालामुळे पतन विभाग व जिल्हाधिकारी कार्यालय अडचणीत आले आहे.
आमदार भास्कर जाधव यांच्या मंत्रीपदाच्या काळात पतन अभियंता आणि पर्यटन विकास महामंडळ अंतर्गत बाराव्या वित्त आयोगाच्या सागर किनारा पर्यटन विकास कार्यक्रमांतर्गत ९६ लाख रूपये खर्च करून या सॉलिड जेटीची उभारणी करण्यात आली आहे. भास्कर जाधव यांच्याहस्ते उद्घाटन झालेली ही जेटी १२ जून २०१४ च्या पहिल्याच पावसात उधाणामध्ये उद्ध्वस्त झाली. जेटीवरील बाके, स्टील रेलिंग, सौरपथदीपांची लाटांमुळे दुरवस्था झाली तर जेटीला तडे गेल्याने ती धोकादायक असल्याचा फलक लावण्यात आला.
गेली चार वर्षे ही जेटी बंद अवस्थेत आहे. या जेटीच्या दुरूस्तीपेक्षा संरक्षणासाठी ऑगस्ट २०१५ मध्ये पतन विभागाने महाराष्ट्र पर्यटन विकास महामंडळाकडे ९३ लाखाच्या संरक्षण बंधा़र्‍याचा प्रस्ताव केला होता. त्यांनतर २०१७ च्या अर्थसंकल्पातून आमदार भास्कर जाधव यांनी या जेटीच्या संरक्षणासाठी तब्बल १ कोटी रूपये मंजूर करून घेतले. सदर संरक्षक बंधारा कशाप्रकारे असावा यासाठीचे डिझाईन ‘सेंटर वॉटर ऑन्ड रिसर्च स्टेशन, पुणे’ यांच्याकडून तयार करून पुढील मंजुरीसाठी पाठवण्यात आला आहे.

बनावट जमीन कागदपत्रांद्वारे ७६ लाखाची फसवणूक

E-mail Print PDF
रत्नागिरी ः जमीन मालकाच्या परवानगीविना बनावट कागदपत्रे तयार करून जमिनीची परस्पर विक्री करून ७६ लाख रुपयांची फसवणूक करणा़र्‍या चौघांविरूद्ध ग्रामीण पोलीस ठाण्यात गुन्हा दाखल करण्यात आला आह़े संजय मधुकर साळवी (५५, ऱा लोकमान्यनगर पनवेल) यांनी यासंदर्भात तक्रार दाखल केली आह़े
सुरेंद्र व्यंकटेश साळवी (ऱा झाडगाव), शकिल हमीद डिंगणकर (ऱा नेवरे), अल्ताफ जाफर संगमेश्वरी (एमआयडीसी रत्नागिरी) व इम्तीयाज रेहमान मुजावर (एमआयडीसी रत्नागिरी) अशी फसवणूक करणार्‍या संशयितांची नावे आहेत़ तक्रारदार साळवी यांनी आरोपी सुरेंद्र साळवी यांना आपल्या कसोप येथील जमीनीची विक्री करण्याकरता वटमुखत्यारपत्र १७ डिसेबर २०१२ रोजी करून दिले होत़े या वटमुखत्यारपत्राचा गैरवापर करत चारही आरोपी यांनी त्यामधील पानांमध्ये बदल करत तक्रारदार यांच्या कसोप येथील जमीनीऐवजी भंडारपुळे येथील जमीनीचा उल्लेख कागदपत्रांमध्ये केल़ा
या पद्धतीचा वापर करत चारही आरोपी यांनी तक्रारदाराच्या भंडारपुळे येथील २७ जमींनींची बनावट मुखत्यार पत्र करून घेतली व त्याआधारे मुळ जमीन मालकाची परवानगी न घेता परस्पर जमीनींची विक्री करून ७६ लाखाची फसवणूक केल़ी ही घटना तक्रारदार यांना समजल्यानंतर त्यांनी यासंबंधी ग्रामीण पोलीस ठाण्यात तक्रार दाखल केली असून चारही संशयित आरोपींविरूद्ध गुन्हा दाखल करण्यात आला आह़े ग्रामीण पोलीस ठाण्यातील सहाय्यक पोलीस निरिक्षक ओटवणकर हे याप्रकरणी तपास करत आहेत़.

शिवसेना-भाजप युती पुन्हा झाल्यास नव्याने जागावाटप

E-mail Print PDF
रत्नागिरी ः आगामी निवडणुका दोन कॉंग्रेस पक्ष एकत्र येवून लढणार असल्याचे संकेत मिळताच भाजपने शिवसेनेसमोर युतीचा प्रस्ताव ठेवला आहे. शिवसेनेने हा प्रस्ताव स्वीकारला तर नव्याने जागावाटप होईल आणि त्यामध्ये रत्नागिरी जिल्ह्याचा विचार करता भाजपच्या पदरात किती जागा पडतील याविषयी राजकीय वर्तुळात चर्चा सुरू झाली असुन जर युती झालीच तर शिवसेना भाजपाला गुहागरची एकमेव जागा सोडू शकते अशी चर्चा राजकीय वर्तुळात रंगली आहे.

Page 8 of 3279