Wednesday, Feb 21st

Headlines:

रत्नागिरी

जेएसडब्ल्यू विरोधात नांदिवडेवासियांचा पुन्हा ‘एल्गार’

E-mail Print PDF
रत्नागिरी ः जयगड येथील जेएसडब्ल्यू कंपनीकडे वारंवार मागणी करून नांदिवडेवासियांच्या प्रलंबित मागण्यांची सोडवणूक होताना दिसत नाही. त्यासाठी नांदिवडे ग्रामपंचायतीसमोर जेएसडब्ल्यू कंपनी व्यवस्थापनाविरोधात येथील ग्रामस्थांनी पुन्हा एकदा उपोषण सुरू केले आहे. जोपर्यंत मागण्यांची पूर्तता होत नाही तोपर्यंत हे उपोषण चालूच ठेवण्याचा निर्धार या ग्रामस्थांनी केला आहे. कंपनी व्यवस्थापनाकडून केलेली चर्चाही निष्फळ ठरली आहे.
नांदिवडे येथील ग्रामस्थांनी यापूर्वीच कंपनी व्यवस्थापनाकडे १२ मागण्या सादर केलेल्या आहेत. त्यासाठी ५ डिसेंबर रोजी उपोषणाचे हत्यार उगारले होते. पण त्यावेळी कंपनी व्यवस्थापनाने लेखी पत्र दिल्यामुळे येथील ग्रामस्थांनी पुकारलेले उपोषण स्थगित केले होते. आजमितीस ग्रामस्थांच्या मागण्यांवर कोणतीच ठोस कार्यवाही झालेली नसल्याचे म्हणणे आहे. त्यासाठी सरपंच दिशा हळदणकर, उपसरपंच स्नेहल चौगुले, निकीता वणके, शरयु कोळंबेकर, माजी सरपंच अमित गडदे, महेंद्र गडदे, रवींद्र गडदे यांच्यासह उपोषणात अन्य ग्रामस्थांचा सहभाग आहे. या आंदोलनकर्त्यांना माजी पं. स. सदस्य विवेक सुर्वे यांनी पाठिंबा दर्शवला आहे.
नांदिवडेवासियांवर या कंपनीमुळे मोठया समस्या उभ्या ठाकल्या आहेत. आरोग्याबरोबरच येथील उदरनिर्वाहाचा प्रश्नही उभा राहिला आहे. कंपनीच्या कुलिंग टॉवरमधून खारे पाणी बाहेर पडते. त्यामुळे येथील कुणबीवाडी आदी परिसरातील ग्रामस्थांच्या टिव्ही डिश ऍन्टेना, वीज जोडणीच्या जीआय ताराही गंजून नुकसान होत आहे. हे नुकसान टाळण्यासाठी कायमस्वरूपी उपाययोजना करण्यात यावी, धामणखोल बंदरात गळाने मासेमारी करण्यास ग्रामपंचायत क्षेत्रातील सर्व ग्रामस्थांना परवानगी द्यावी, कंपनीने कोळसा आणि ऍश उघडयावर ठेवली जाते. त्यामुळे हवेत प्रदुषण होऊन फळबागायतींचे नुकसान होत आहे. हा कोळसा व ऍश कायमस्वरूपी बंद ठेवण्यासाठी उपाययोजना करावी, अशी मागणी आहे.
कंपनीच्या लेबर कॉलनीतील सांडपाणी उघडयावर साठवून ठेवण्यात आले आहे. या पाण्यामुळे गावात रोगराईचा धोका संभवतो असून त्यांची योग्य विल्हेवाट लावण्यात यावी. ज्या स्थानिक ग्रामस्थांकडे कस्टम क्लिअरन्स परवाना आहे त्यांना कस्टम क्लिअरन्सची कामे तत्काळ द्यावीत. कंपनीत कार्यरत असलेल्या स्थानिकांना कायमस्वरूपी करावे, स्थानिक कामगारांच्या वेतनात वाढ करावी, ऍश पॉंडमधील कामांचे वाटप स्थानिकांनाच देण्यासाठी प्राधान्य देण्यात यावे आदी मागण्यांचा समावेश आहे. त्यासाठी हे आंदोलन सुरू करण्यात आले आहे.

खेडमध्ये ८९ मोबाईल टॉवर विनापरवाना

E-mail Print PDF
खेड ः शहरासह ग्रामीण भागात विविध ठिकाणी बीएसएनएल कंपनीचे २३ मोबाईल टॉवर तर टाटा, आयडिया, विओम, रिलायन्स, वोडाफोन, जी.टी.एल. आदी कंपन्यांचे ६६ मोबाईल टॉवर उभारण्यात आले आहेत. मात्र यातील एका कंपनीने टॉवर उभारणी करताना अकृषिक परवाना घेतलेला नाही. बीएसएनएल कंपनीकडून स्थानिक ग्रामपंचायत कर वगळता महसूल विभागाला स्वामित्व धन मिळत नसून उर्वरित कंपन्यांकडूनही अनियमितपणे स्वामित्व भरले जात असल्याची माहिती उपलब्ध झाली आहे.
भ्रमणध्वनीची अद्ययावत सुविधा विनाविलंब दूरच्या ठिकाणापर्यंत पोहचवण्याच्या उद्देशाने भारतातील अनेक कंपन्यांनी आपले मोबाईल टॉवर उभारले आहेत. यात भारत सरकारची बीएसएनएल कंपनी मागे नाही. तालुक्यात बीएसएनएल कंपनीचे २३ टॉवर उभारण्यात आले आहेत. तर टाटा, आयडिया, विओम, रिलायन्स, वोडाफोन, जी.टी.एल., अमेरिकन कंपनी, इंडस टॉवर कंपनी व एअरटेल या ९ कंपन्यांनी शहरासह ग्रामीण भागातील २३ गावांमध्ये २००६ ते २०११ या कालावधीत ६६ मोबाईल टॉवर उभारले आहेत.
या सर्व टॉवर्ससाठी १३ हजार २२५ चौ. मी. भूक्षेत्र अधिगृहीत करण्यात आले आहेत. तरीही यातील एकाही कंपनीचा टॉवर उभारणी केल्यापासून आजतागायत अकृषिक परवाना नसल्याची माहिती महसूल विभागाकडून उपलब्ध झाली आहे. राज्य शासनाच्या धोरणानुसार घर बांधणीसाठी सध्या अकृषिक परवान्याची आवश्यकता भासते किंवा काही महिन्यात ही परवानगी घ्यावी लागते. अन्यथा बांधकाम तोडण्याची तरतूद करण्यात आली आहे. मात्र ६६ मोबाईल टॉवरची १२ वर्षात कोणतीही अकृषिक परवानगी घेतलेली नाही. याबाबत बीएसएनएल कंपनीला सवलत देण्यात आल्याचे सांगण्यात येते.

प्रधानमंत्री ग्रामसडकच्या कंत्राटी कर्मचाऱयांचा बेमुदत बंद

E-mail Print PDF
रत्नागिरी ः प्रधानमंत्री ग्रामसडक योजनेतील कंत्राटी कर्मचार्‍यांनी गुरूवार १५ फेब्रुवारीपासुन बेमुदत संपाचे हत्यार उगारले आहे. रत्नागिरी कार्यालयातील या योजनेचे सर्व कर्मचारी बेमुदत बंद आंदोलनात सहभागी झाले असून गुरूवारी येथील कार्यालयासमोर या कर्मचार्‍यांनी निदर्शने केली.
प्रधानमंत्री ग्रामसडक योजनेंतर्गंत कार्यरत असलेल्या कंत्राटी कर्मचा़र्‍यांना २०१२ पासून त्यांना वेतनवाढ मिळावी. वैद्यकीय रजा, अपघाती विमा संरक्षण दिले जावे. नियमित कर्मचाऱयांप्रमाणे प्रवास भत्ता मिळावा, अशा अनेक मागण्यांचा समावेश आहे. महाराष्ट्र ग्रामीण रस्ते विकास संस्थाअंतर्गंत संपूर्ण राज्यात या कर्मचार्‍यांनी आंदोलन पुकारले आहे. गेल्या ६ वर्षापासून पगारवाढ तसेच इतर सुविधा शासनाकडून मिळाल्याने या कर्मचार्‍यांमध्ये शासनाच्या कारभाराविषयी तीव्र नाराजीचे वातावरण पसरले आहे.
त्यासाठी या कर्मचार्‍यांनी बेमुदत काम बंद आंदोलन हाती घेतले आहे. जोपर्यंत शासन आपल्या प्रलंबित मागण्यांचा प्रकर्षाने विचार करत नाही व त्यावर ठोस कार्यवाही करत नाही तोपर्यंत काम बंद आंदोलनाचा निर्धार या कर्मचार्‍यांनी व्यक्त केला आहे. रत्नागिरीतील आंदोलन संघटनेचे जिल्हा समन्वयक रवींद्र वाडकर यांच्या नेतृत्वाखाली सुरू आहे. कर्मचा़र्‍यांच्या या बंद आंदोलनामुळे योजनेच्या कामकाजावर परिणाम झालेला दिसून येत आहे.

परप्रांतीय पाण्यात जाळी टाकून पसार

E-mail Print PDF
रत्नागिरी ः जिल्ह्याच्या समुद्र हद्दीत मासेमारी करणार्‍या चार परप्रांतीय नौकांचा चित्तथरारक पाठलाग होताच मासेमारी जाळे पाण्यात टाकून या नौका पसार झाल्याची घटना बुधवारी दुपारी २ वाजण्याच्या सुमारास घडली.
एकीकडे पारंपारिक आणि पर्ससीननेट वाद चिघळला असतानाच परप्रांतीय मच्छिमारांची घुसखोरी दिवसागणिक वाढू लागली आहे. समुद्रात कोणत्याही क्षणी ठिणगी उडण्याची शक्यता निर्माण झालेली असतानाच चार परप्रांतीय मच्छिमारी नौका जिल्ह्याच्या समुद्र हद्दीत घुसून २० वावामध्ये मासेमारी करीत होत्या. परप्रांतीय नौका घुसल्याची माहिती मत्स्य विभागाला मिळाली होती. त्याचवेळी परवाना अधिकारी जीवन सावंत व सुरक्षा पर्यवेक्षक पुरूषोत्तम घवाळी हे गस्ती नौका घेवून समुद्रात गस्त घालीत असताना या चार नौका त्यांच्या निदर्शनास आल्या.

टोईंग व्हॅनच्या त्रासाने वाहनधारक हैराण

E-mail Print PDF
रत्नागिरी ः वाहतूक पोलिसांच्या टोईंग व्हॅनचा त्रास दिवसेंदिवस वाढीस लागला असून पार्किंग पट्ट्याच्या आत उभ्या केलेल्या गाड्या उचलून नेत वाहन चालकांना अव्वाच्या सव्वा दंड आकारण्याचा कार्यक्रम सुरू असल्याचा गंभीर आरोप वाहनधारक करत आहेत. या कारभाराविरोधात उघडपणे नाराजी व्यक्त केली जात आहे.
शहरात वाहतूक व्यवस्था सुरळीत व्हावी यासाठी स्वतंत्र वाहतूक पोलीस विभाग स्थापन करण्यात आला. या विभागामार्फत शहरातील ट्रॅफीक सेक्शनच्या ठिकाणी कर्मचारी तैनात केले जातात. आता तर सिग्नल यंत्रणादेखील सुरू झाली आहे. मात्र शहरात पार्किंगचा प्रश्‍न आजही भेडसावत असल्याने गाड्या उभ्या करायच्या कुठे? असा प्रश्‍न सवानाच पडतो. त्यातच वाहतूक पोलिसांनी शिस्तीच्या नावाखाली टोईंग व्हॅन सुरू केली. सुरूवातीला चांगल्या पद्धतीने कारभारसुद्धा सुरू झाला. मात्र आता या टोईंग व्हॅनवरील कर्मचार्‍यांवर अंकुश नसल्याने आपण म्हणू तो नियम याप्रमाणे कारवाई केली जात आहे, असा आरोप वाहनधारकांकडून केला जात आहे.

Page 7 of 3279