Saturday, Sep 23rd

Headlines:

रत्नागिरी

भोंदूगिरी करणार्‍या बाबावर कारवाई करण्यासाठी अंनिसचे पोलिसांना निवेदन

E-mail Print PDF
रत्नागिरी (प्रतिनिधी) - रत्नागिरीजवळच्या एका गावात भेंदूगिरी करत असलेल्या बाबाचा व्हीडीओ व्हायरल झाल्यानंतर त्याचे अनेक प्रताप पुढे येत आहे. बाबाकडून फसवणूक झालेले अनेकजण पुढे येत आहेत. दरम्यान, अंधश्रध्दा निर्मूलन समितीच्या रत्नागिरी शाखेने मंगळवारी याबाबत पोलीसांना निवेदन देऊन संबंधित भोंदूबाबा विरोधात जादू टोणाविरोधी कायद्यांतर्गत गुन्हा दाखल करण्याची विनंती केली आहे.
या विक्षिप्त भोंदूबाबाचा व्हिडिओ गेल्या चार-पाच दिवसांपासून सोशल मिडियावर धुमाकूळ घालत आहे. महिलांबाबत त्याने केलेले अशोभनीय आणि गलिच्छ वर्तनाने नागरिकांमध्ये संतापाची लाट निर्माण झाली आहे. मात्र त्याला समाजासमोर उघडा पाडण्यासाठी अद्यापही कोणी पुढाकार घेतलेला नाही. मात्र, या बुवाचा पर्दाफाश करण्यासाठी आता अंधश्रध्दा निर्मूलन समितीने पुढाकार घेतला आहे.
अनिसच्या रत्नागिरी शाखेच्यावतीने जिल्हाध्यक्ष विलास कोळपे व त्यांच्या सहकाऱयांनी मंगळवारी ग्रामीण पोलीस ठाण्याच्या पोलीस निरीक्षकांना याबाबत निवेदन देऊन या बाबावर कारवाईची मागणी केली आहे.
सध्या सोशल मिडियावर व्हायरल झालेला हा व्हिडीओ रत्नागिरीसह महाराष्ट्रात फिरत आहे. व्हि डिओमध्ये हा बाबा मी विष्णूचा अवतार आहे, स्वामी समर्थांचा अवतार आहे असे विविध प्रकारचे दावे करत आहे. मेलेल्या मुलाला जीवंत केल्याचा अवैज्ञानिक दावाही तो करताना दिसत आहे. तसेच महिलांचा उल्लेख अत्यंत अश्लिल पध्दतीने करण्यात आला आहे. त्यामुळे या बाबाविरोधात जादूटोणा विरोधी कायद्यांतर्गत योग्य तो गुन्हा दाखल करुन बंदोबस्त करावा असे निवेदन अंनिसने दिले आहे.

जोरदार पावसाने मंडणगड तालुक्यातील भारजा, निवळी नद्या धोक्याच्या पातळीवर

E-mail Print PDF
मंडणगड (प्रतिनिधी) - तालुक्यात पावसाचा जोर वाढला असून सतत तीन दिवसांपासून पाऊस सुरू असून तालुक्यातील भारजा, निवळी नद्या धोक्याची पातळी ओलांडून वाहू लागल्या आहेत. भारजा नदीचे पाणी पुन्हा एकदा चिंचघर पुलावरून वाहू लागल्याने वाहतूक ठप्प झाली आहे. परिसरातील शेती पाण्याखाली गेली आहे. तिडे तळेघर गावांना जोडणारा कुंबळे येथील पूल पाण्याखाली गेल्याने गावांचा संपर्क तुटला.
गेल्या तीन दिवसांपासून मंडणगड तालुक्याला अक्षरशः पावसाने गारठवून टाकले आहे. या पावसामुळे नद्या, नाले, ओहोळ दुथडी भरून वाहू लागले आहेत. भारजा व निवळी नद्यांच्या पुराचे पाणी लगतच्या शेतात घुसल्याने भातशेती पाण्याखाली गेली आहे. परिणामी हाताशी आलेले पीक नुकसान होण्याच्या भीतीने शेतकर्‍यांचे चेहरे चिंतेने ग्रासले आहेत. येणारे पीक वाया जाण्याची शक्यता निर्माण झाली आहे. संततधार पावसामुळे मंडणगड दापोली मार्गावरील चिंचघर व मंदिवलीला जोडणार्‍या पुलावरून भारजा नदीचे पाणी सकाळी अकरा वाजल्यानंतर वाहू लागले.
अद्यापही रस्ता पाण्याखाली असल्याने या मार्गावरील वाहुतक बंद आहे. तसेच या पुलाला दोन्ही बाजूला रेलिंग नसल्याने मोठा धोका निर्माण झाला आहे. त्यामुळे दोन्ही बाजूकडील गाड्या चिंचघर व मांदीवली गावात थांबवण्यात आल्या. गावांचा संपर्क तुटल्याने परिसरातील नागरिक व शाळेतील विद्यार्थ्यांचे हाल झाले. मात्र सुदैवाने तालुक्यात अद्याप तरी जीवितहानी झालेली नाही.

मासेमारीला लवकरच शेतीचा दर्जा मिळणार : मत्स्योद्योगमंत्री जानकर

E-mail Print PDF
रत्नागिरी (प्रतिनिधी) - मासेमारीला शेतीचा दर्जा मिळावा यासाठी कृषी खात्याकडे प्रस्ताव सादर केलेला आहे. लवकरच या प्रस्तावाला मंजूरी मिळणार आहे. हा दर्जा मिळाल्यास मच्छीमारीला अधिक चालना मिळेल, असा विश्वास मत्स्य उद्योग मंत्री महादेव जानकर यांनी पत्रकार परिषदेत व्यक्त केला.
रत्नागिरी तालुका भंडारी समाज संघाच्यावतीने सोमवारी सावरकर नाटयगृहात आरमार विजय दिन साजरा करण्यात आला. या कार्यक्रमापूर्वी त्यांनी पत्रकारांशी संवाद साधला. देशातील तामिळनाडू, गुजरात, छत्तीसगढ यासारखे राज्य मच्छीव्यवसायात प्रगतीपथावर आहेत मग आपला राज्य का मागे? नवनवीन मच्छीमारीची कौशल्ये आपल्या मच्छीमारांनी आत्मसात केले पाहिजे. ट्रॉलर वापरण्याची हिंमत इथल्या व्यावसायिकांनी केली पाहिजे, आपली परिस्थिती नाही म्हणून हार न पत्करता आलेल्या स्पर्धेला तोंड दिलेच पाहिजे यासाठी मत्स्य विभागाचे सहकार्य कायम राहिल, असेही त्यांनी सांगितले.
शासनाने मत्स्य विभागाच्या १०० टक्के जागा भरण्यास परवानगी दिली आहे. त्यामुळे आता मच्छीमारांच्या अडचणी, समस्या सोडवण्यासाठी सोयीस्कर होईल. मच्छीमारांसाठी ट्रेनिंग सेंटर्सही राज्यात ठिकठिकाणी सुरू करण्यात येत आहे. या ट्रेनिंगचा फायदा व्यावसायिकांनी घ्यावा, असे आवाहनही त्यांनी केले. त्यामुळेच मच्छी व्यवसायाला कृषी दर्जा मिळावा यासाठी आपण प्रयत्न करत असून लवकरच याला मंजुरी मिळणार आहे. सोयाबीन, ऊस, आणि कापूस या पिकांना नाबार्डचा निधी मिळतो मग मासेमारीला का नाही याचा एक अहवालही सादर केल्याचे त्यांनी सांगितले.
पर्ससीननेट आणि पारंपारिक मच्छीमार हा वाद लवकरच मिटणार आहे यासाठी एक कमिटी स्थापन करण्यात आली आहे. या कमिटीच्या अहवालानंतर यावर निर्णय होईल असेही जानकर यांनी सांगितले. येथील मिरकरवाडा जेटी मच्छी व्यवसायाचे केंद्रस्थान बनावे यासाठी कोटयावधीचा निधीही आपण मंजूर केल्याचे जानकर यांनी आवर्जुन सांगितले.
जलयुक्त शिवार योजनेच्या यशानंतर याच धर्तीवर मासळीयुक्त तलाव योजना सुरू करण्यात येत आहे. या तलावात तयार झालेल्या माशांना बाजारपेठ मिळवून देण्याचे काम मत्स्य विभाग करेल. एकंदरीत मच्छी व्यवसायाला चालना मिळावी यासाठी वेगवेगळे प्रयोग आपण करत असल्याचेही महादेव जानकर यांनी यावेळी पत्रकारांशी बोलताना सांगितले.

रिफायनरी प्रकल्पविरोधी संघटनेच्या अध्यक्षपदी तिघांची निवड

E-mail Print PDF
राजापूर (प्रतिनिधी) - राजापूर तालुक्यातील नाणार परिसरात होऊ घातलेल्या रिफायनरी प्रकल्पाविरोधात नव्यानेच स्थापन करण्यात आलेल्या रिफायनरी विरोधी प्रकल्पग्रस्त मच्छीमार, जमिनमालक व शेतकरी संघटनेची बैठक सोमवारी कुंभवडे येथील गंभीरेश्वर मंदिरात संपन्न झाली. या बैठकीत संघटनेच्या अध्यक्षपदी ओंकार प्रभुदेसाई, कमलाकर कदम व मजीद भाटकर या तिघांची निवड करण्यात आली. तर सचिवपदी अरविंद सामंत व अब्दुल्ला सोलकर यांची निवड करण्यात आली आहे.
राजापूर तालुक्यातील नाणार परिसरातील १४ गावांमध्ये ग्रीन रिफायनरी हा जगातील सर्वात मोठा प्रकल्प होऊ घातला आहे. या प्रकल्पाचे काहीजणांनी आपल्या मागण्या शासनासमोर ठेऊन प्रकल्प समर्थनाची भूमिका घेतली असली तरी या प्रकल्पाला स्थानिक जनतेमधून मोठया प्रमाणात विरोध होत आहे. ९ सप्टेंबर रोजी राजापूर तहसीलदार कार्यालयावर काढण्यात आलेल्या राजकीय पक्ष विरहीत मोर्चाने आपली ताकद दाखवून देण्याचा प्रयत्न केला आहे. प्रकल्प हद्दपार केल्याशिवाय माघार नाही असा सुतोवाच प्रकल्प विरोधकांनी शासनाला दिला आहे. मात्र शासन येथील मच्छीमार, बागायतदार व देशाचा कणा असलेल्या शेतकरी बांधवांच्या या मागणीकडे सपशेल दुर्लक्ष करत प्रकल्प रेटून नेण्याचा प्रयत्न करत आहे.
त्यामुळे प्रकल्प विरोधी वातावरण आणखीणच तापले आहे. प्रकल्पाला विरोध करण्यासाठी प्रकल्प बाधित १४ गावांसह या गावांमध्ये येत असलेल्या कुंभवडे गाव अशा प्रत्येक गावाच्या कमिटीमधून काही प्रतिनिधींना घेऊन रविवारी कुंभवडे येथील श्री गंभीरेश्वर मंदिरात पार पडलेल्या बैठकीत रिफायनरी विरोधी प्रकल्पग्रस्त मच्छीमार, जमिनमालक व शेतकरी संघटनेची स्थापना करण्यात आली. या संघटनेचे अध्यक्ष तसेच अन्य पदाधिकारी निवडीसाठी सोमवारी श्री गंभीरेश्वर मंदिरातच संघटनेची बैठक पार पडली.
या बैठकीमध्ये तब्बल ३ अध्यक्ष निवडण्यात आले. ओंकार प्रभुदेसाई, कमलाकर कदम व मजीद भाटकर यांची यापदी निवड करण्याचा निर्णय सर्वानुमते घेण्यात आला. उपाध्यक्षपदी संजय राणे (सागवे), अनंत भडेकर (चौके), रविकांत राऊत (साखर), रूपेश अवसरे (पडवे) व दशरथ कुवरे, सेक्रेटरीपदी भाई सामंत व अब्दुल्ला सोलकर (नाणार), खजिनदारपदी मनोज देसाई (कुंभवडे), सलमान अ. सोलकर (नाणार), निमंत्रक म्हणून श्रीपाद देसाई (कुंभवडे) यांची तर सल्लागार म्हणून नंदकुमार कुलकर्णी (सागवे) यांची नियुक्ती करण्यात आली. उर्वरीतांची सदस्य म्हणून निवड झाली. या संघटनेच्या माध्यमातून प्रकल्पाला विरोध करण्याचा निर्णय यावेळी घेण्यात आला.

प्रत्येक बोटीवरील खलाशांकडे ओळखपत्र आवश्यक : कॅप्टन संजय उगलमुगले

E-mail Print PDF
रत्नागिरी (प्रतिनिधी) - मच्छीमारांच्या सुरक्षेच्यादृष्टीने प्रत्येक बोटींवरील खलाशांकडे ओळखपत्र असणे अत्यावश्यक आहे. हे ओळखपत्र देण्याची प्रक्रिया मेरिटाईम बोर्डाकडून सुरू असून त्याचप्रमाणे बोटींचे रजिस्टर यापुढे ऑनलाईन प्रक्रियाव्दारे होणार असून यासंदर्भात बोटी मालक व खलाशांना ऑनलाईन प्रक्रियेसंदर्भात डेमोही मेरिटाईम बोर्डाकडून एका कार्यशाळेच्या मार्फत देण्यात आल्याची माहिती मेरिटाईमचे अधिकारी कॅप्टन संजय उगलमुगले यांनी दिली.
मेरिटाईम बोर्डाने नुकतीच एक ऑनलाईन प्रक्रियेसंदर्भात कार्यशाळा घेतली यावेळी जिल्हयातील बहुतांश सर्व फेरीबोट मालक, बोटीमालक खलाशी उपस्थित होते. यावेळी खलाशांकडे ओळखपत्र असणे सक्तीचे असून हे ओळखपत्र बायोमॅट्रीक पध्दतीने देण्याची प्रक्रिया मेरिटाईम बोर्डाकडून सुरू आहे. यावेळी बोटींचा सर्व्हे, रजिस्टर, ओळखपत्र व अन्य महत्वाच्या बाबींसंदर्भात उगलमुगले यांनी मार्गदर्शन केले. रत्नागिरीतील बहुतांश खलाशांकडे ओळखपत्र वगैरे नसून ती लवकरात लवकर मिळावीत यासाठी या विभागाने ही प्रक्रिया सुरू केली आहे. एकंदरीत सागरी सुरक्षेच्या व मच्छीमारांच्या सुरक्षेच्या दृष्टीने या सगळया नियमांची अंमलबजावणी काटेकोरपणे होणे गरजेचे असून मच्छीमारांनी सहकार्य करण्याचे आवाहनही यावेळी मेरिटाईम बोर्डाने केले आहे. या कार्यशाळेला सागरी पोलीस अधिकारी, कर्मचारी व मेरिटाईमचे इतर कर्मचारी, अधिकारी उपस्थित होते.

Page 5 of 3144